Šulerjo sej zhromadny produkt nadźěłali
Budyšin (SN/BŠe). Cyle wosebite dožiwjenje měješe wčera a dźensa 19 šulerjow 4. lětnika Pančičanskeje zakładnje šule. W Budyskim studiju mdr woni spěwaj nahrawachu. „Spěchujemy dorost a dźěćace produkcije“, rozłoži Handrij Špitank z hudźbneje redakcije Serbskeho rozhłosa. Iniciator noweho projekta je hudźbnik Měrćin Weclich. Wón wobroći so zaměrnje na Pančičansku zakładnu šulu pytajo za nowymi talentami. Wuzwolił je dwaj spěwaj ze cyklusa „Mjezwočo“ spisowaćelki Lubiny Hajduk-Veljkovićoweje. Cyłkownje wobjima cyklus sydom spěwow na temu mjezwočo.
Sakska: Nowy minister za kubłanje
Drježdźany (SN/mb). Za Serbow najwažniši nowy minister w sakskim knježerstwje je bjezdwěla 41lětny Conrad Clemens (CDU), dotal šef statneje kenclije. Tutu funkciju je wón pak jenož poł lěta wukonjał, doniž njebu wčera na kultusoweho ministra a naslědnika Christiana Piwarza (CDU) powołany, kiž je nětko financny minister. Do toho běše Clemens jako statny sekretar pjeć lět nawoda zastupnistwa Sakskeje w Berlinje a je zwiski do zwjazkoweje politiki pěstował. Runja Piwarzej njeje Clemens pedagoga, ale ma bohate mjezynarodne nazhonjenja. Wón je so drje w NDR narodźił – w Schönebe-cku nad Łobjom –, po přewróće pak je tež w južnoameriskim Surinamje wotrostł. Mjezynarodne zawodne hospodarstwo studowaše w Frankfurće nad Wódru, Maastrichće, Kanadźe a Berlinje. Wón je syn fararja a z čłonom Ochranowskeho bratrowstwa.
Kniha k jubilejej šule nastała
Ralbicy (SN). „Šula je wutroba wsy“ je titul knižki, kotruž su šulerjo 8. lětnika Serbskeje wyšeje šule Ralbicy lětsa nazymu zhromadnje z Ludowym nakładnistwo Domowina nadźěłali. Jutře chcedźa ju na adwentničce zjawnosći předstajić. Knižna premjera započnje so we 18 hodź. w sportowni šule.
Nowostka wobsahuje 30 tekstow, kiž rysuja dopomnjenki bywšich šulerjow na swój šulski čas w delanskim kubłanišću. Za to su šulerjo interviewy z časowymi swědkami wjedli. Tež fota interviewowanych w njej namakaš. Ideja za temu zrodźi so hladajo na klětuši jubilej 50lětneho wobstaća dźensnišeje Ralbičanskeje šule. Knihu budu jeničce w šuli předawać. W ramiku marketingoweho projekta „Naša serbska kniha“ je LND před pjeć lětami prěnju šulersku publikaciju wudało, tohorunja z Ralbičanskimi šulerjemi. Mjeztym su so dźěći a młodostni z Worklečanskeje a Radworskeje wyšeje šule kaž tež z Budyskeho Serbskeho gymnazija na projekće wobdźělili. Při tym přewodźeja šulerjo aktiwnje proces nastaća knihi, zeznaja nakładnistwo a přichodne powołanske móžnosće.
Kubłanje ludźom kóždeje staroby stajnje poskićili
Smjerdźaca (mdź/SN). W kulturnym srjedźišću LIPA w Smjerdźacej je Serbske šulske towarstwo (SŠT) zašły pjatk swoju hłownu zhromadźiznu přewjedło. Při tym zhladowaše předsydstwo na dźěławosć towarstwa wróćo. Fokus dźěławosće předsydstwa ležeše w nadźěłanju postajenja za serbske šule, a to w zhromadnym dźěle z Domowinu.
Na lońšej hłownej zhromadźiznje bě SŠT wosom politiskich žadanjow nastupajo šulstwo schwaliło. W měrcu wotmě so w Chrósćicach kubłanska debata, na kotrejž diskutowachu přitomni wo kubłanskich prašenjach. Kaž rěka w dźěłowej rozprawje, „wuńdźe z diskusije jasne, zo ma kóžda šula wosebite nadawki a wužadanja zmištrować a zo su wuměnjenja na městnje jara rozdźělne. Towarstwo je swoje politiske stejnišća na kubłanišćach předstajiło a to žněješe dobry wothłós“.
Z rěčneho hnězda do hornjoserbskeho swěta
Budyšin (SN/MG). Druhi lětnik Zorjakow, potajkim kursistow rěčneho projekta Zorja, poby wčera na wulěće w Sprjewinym měsće. Přeprosył bě jich předsyda Domowiny Dawid Statnik. Po rozmołwje z nim w Serbskim domje a wopyće Smolerjec kniharnje podachu so wšitcy hišće na wobjed do Wjelbika.
Druhe lěto je tež sobuiniciator projekta Maksimilian Hasacki, zhromadnje z kursistami po puću. Wulět do Budyšina je t. mj. imersiwny dźeń, wón rozkładuje. Tak wotkrywaja sej wobdźělnicy město Budyšin, jako „druhe wulke serbske město“ nimo Choćebuza. Dokelž přebywaja Zorjacy nětko hižo něšto časa w swojim rěčnym hnězdźe w Dešnje, rozumja a rěča woni tež hižo chětro derje delnjoserbsce. Jako pak woni za blidami z knihami stejachu, so přiwšěm jedne abo tamne němske słowčko wusunje. Ale to dale njewadźi, wšako móža wobdźělnicy swoje znajomosće delnjoserbšćiny hišće hač do lěća wukmanić.
Na swjedźenju rěčow, mody a hudźby
We Wodowych Hendrichecach wotmě so minjeny tydźeń njedźelu do srjedy regionalny rěčny seminar, na kotrymž wobdźělichu so najlěpši šulerjo Budyskeho wokrjesa. Lětsa stejachu rěče francošćina, španišćina, łaćonšćina, rušćina, pólšćina a čěšćina w srjedźišću, a tema rěkaše „Fashion and Music“.
Hłowny zaměr seminara njebě jenož znajomosće a kmanosće druheje cuzeje rěče pohłubšić, ale tež přihot prezentacije, kotruž dyrbjachu šulerjo na poslednim dnju předstajić. Ze Serbskeho gymnazija wobdźělichu so šulerjo Gabriel Wirth z rjadownje 8-3 (rušćina – pod nawodom knjenje Bräueroweje) kaž tež Rosalie Baierec, Annelie Kummerec (wobě rjadowanja 8-3) a Józef Mittag z rjadownje 8-1 (čěšćina – pod nawodom knjenje Štilleroveje).
Šulerjo wotmołwy na wšě prašenja dóstali
Budyšin (SN/lmc). Kak je poprawom žiwjenje jako student? Kajke wužadanja mje jako studenta wočakuja a kak mam je zmištrować? Wotmołwy na tute a dalše prašenja dóstachu šulerjo 11. lětnika minjeny pjatk w Budyskim Serbskim gymnaziju.
Před krótkim hakle je kubłanišćo kóždolětnu tradiciju – dźeń wotewrjenych duri – pěstował. Minjeny pjatk je wone tamnu tradiciju, kotruž je před něhdźe dźesać lětami w kooperaciji ze serbskim młodźinskim towarstwom PAWK posledni raz přewjedło, wožiwiło: Zarjadowanje pod hesłom „Studenća pomhaja šulerjam“.
Za wosom blidami sedźo rozprawješe něhdźe 20 studentow a studentkow šulerjam a šulerkam wo swojim studentskim žiwjenju – a to na cyle wosebite wašnje. Wosobinsce, sprawnje a awtentisce powědachu na přikład wo prěnich kročelach na uniwersiće, wo wužadanjach wšědny dźeń, ale tež wo najrjeńšich wokomikach w studiju. Na kóžde prašenje dóstachu šulerjo tež wotmołwy.
Na centralnym rěčnym seminarje so wobdźělili
Werdau. We Werdauwje njedaloko Šwikawy wotmě so minjeny tydźeń, wot srjedy do soboty centralny rěčny seminar, na kotrymž wobdźělichu so najlěpši šulerjo cyłeje Sakskeje. Lětsa bě tam dohromady pjeć rěčow zastupjenych: čěšćina, rušćina, łaćonšćina, španišćina a francošćina. Z Budyskeho Serbskeho gymnazija wuzwolichu so za čěšćinu slědowacy šulerjo: Luisa Hančikec a Marta Handrikec (wobě 10. lětnik) kaž tež Filip Malink (9. lětnik).
Z kófrom wučbu wobohaćataj
Nowy projekt na polu medijoweje pedagogiki so tuchwilu na serbskich šulach wotměwa. Medijowaj pedagogaj studija LUCIJA stajitaj „medijowy kófr“ šulam k dispoziciji.
Budyšin (SN). Kolegaj – team medijowych pedagogow studija Lucija – stajitaj swojim projektnym partneram modernu medijowu techniku w kófru k dispoziciji. Techniku a ekwipment hodźi so we wobłuku tutoho projekta wupožčić. Studijo LUCIJA dźiwa při tym na indiwiduelne přeća a metody šulow, haj samo rjadownjow. „Nochcemy nikomu ničo noweho nanuzować, ale skerje zhromadnje wuslědźić, kotra digitalna metoda by w přichodźe kubłanski wšědny dźeń na serbskich šulach wobohaćała“, projektny koordinator Michał Cyž zwurazni.
Serbja trjebaja mjeńšu šulu
W Braniborskej so rozšěrjenju Delnjoserbskeho gymnazija spjećuja
Choćebuz (SN/mb). Digitalnje je Mina Witkojc (1893-1975) zaso z rowa stanyła: Pod jeje mjenom je mejlka z pokazku na wčerawše wuradźowanje wuběrka za kubłanje, sport, kulturu a serbske naležnosće Choćebuskeje měšćanskeje rady dóšła. Po zhromadnym posedźenju z wuběrkom za twar a wobchad su so wuběrkownicy swójskemu dnjowemu porjadej wěnowali, na kotrymž steješe tema „zaručenje a zesylnjenje serbskeho profila specielneje šule Delnjoserbski gymnazij“. Za to bě šula, kotraž je w nošerstwje Choćebuza, prezentaciju přihotowała.
