Policija (13.09.24)
Podhladna namakanka
Halštrowska Hola. Wosebiteje namakanki dla, zazwoni srjedu popołdnju wobydler gmejny Halštrowska Hola policiju. Wón zastojnikam zdźěli, zo je w lěsu mjez Blunjom a Zabrodom wjacore „podhladne“ metalowe objekty wuhladał a zo tuka na to, zo pod zemju dalšich tajkich objektow je. Na to je specialna jednotka za rozbuchliny mjenowany areal přeslědźiła. Při tym namaka dohromady štyrnaće patronow municije za třělby.
Kontrolu nad swojim awtom zhubił
Čorny Chołmc. Na wjesnym puću w Čornym Chołmcu je srjedu rano k wobchadnemu njezbožu dóšło. Z njeznatych přičiny, zhubi 41lětny šofer kontrolu nad swojim awtom typa VW. Wón zrazy najprjedy do štoma, po tym do płota a na kóncu do chěžki za klumpanje wody. Wohnjowa wobora dyrbješe jězdźidło z rołow klumpy „wuswobodźić“, zo by wotwlečenska słužba pozdźišo awto wottransportować móhła. Šofer wosta njezranjeny. Škodu wučinja něhdźe 14 500 eurow.
Policija (12.09.24)
Znateho z nožom nadběhował
Běła Woda. Njedźelu popołdnju zetka 34lětny muž na Měrowej w Běłej Wodźe 29lětneho znateho, kotryž běše ze swojej dwulětnej dźowku po puću. W rozmołwje so mužej na so roznjemdrištaj, rozeńdźeštej pak so, bjez wukonjenja namocy. Něšto časa po tym so 34lětny z nožom w ruce wróći a z nim do nana dźowki kałaše. Při tym jeho wjace króć zwjeršnje zrani. Nanej pak poradźi so, z njezranjenej holčku nadběhowarjej wućeknyć a policiju informować. Zastojnicy policije skućićela bórze po tym zajachu a to bjeze spjećowanja. W tesće kreje zwěsćichu mnóstwo alkohola z 1,48 promilow kaž tež dopokaz konopje. Muž je druheho njeskutka dla hižo předchłostany.
Policija (11.09.24)
Zhubjeny so zaso nawróćił
Budyšin. Zastojnicy Budyskeho policajskeho rewěra su wot 31. awgusta sem za zhubjenym 63lětnym w Strowotnej studni bydlacym mužom slědźili a w tutym zwisku tež wjace króć w medijach wo podpěru ze stron wobydlerstwa prosyli. Nětko policija zdźěla, zo je so Klaus Dieter T. nawróćił. Zastojnicy běchu jeho póndźelu we wobwodźe Zhorjelskeho policajskeho rewěra stroweho a čiłeho nadešli. Zjawne pytanje je z tym zakónčene.
Policija (10.09.24)
Bjez jězbneje dowolnosće lepjeny
Łaz. Wojerowska policija je njedźelu we Łazu młodostneho na mopedźe kontrolowała. 16lětny běše ze swojim lochkim elektro-mopedom po puću, hačrunjež jězdźidło zawěsćenskeho škita njeměješe. Nimo toho so wukopa, zo młodostny ani jězbneje dowolnosće nima. Nětko dyrbi so přeńdźenja přećiwo zakonjej winowatostneho zawěsćenja a jězdźenja bjez jězbneje dowolnosće dla zamołwić.
Motorske pokradnyli
Wulki Šunow. We Wulkim Šunowje je so njedźelu popołdnju motorsportowy event za lubowarjow oldtimerow wotměł. W běhu zarjadowanja pokradnychu njeznaći skućićeljo čorne motorske typa KTM, kotruž běše wopytowar na zjawnym parkowanišću na Jonsdorfskej dróze wotstajił. Motorske kaž tež nahłownik běštej přizamknjenej. Škoda rubjenstwa wučinja něhdźe 6 000 eurow. Zastojnicy policije za jězdźidłom slědźa.
Policija (09.09.24)
Šwarny dobytk z njeskutka
Biskopicy. Sobuwobydlerjo wjaceswójbneho domu w Biskopicach zwěsćichu pjatk w nocy šěroko wotewrjene bydlenje a informowachu policiju podhlada zadobyća dla. To zastojnicy policije pozdźišo na městnje tak zwěsćichu. Njeznaći skućićeljo běchu so w běhu dnja do bydlenja w druhim poschodźe z namocu zadobyli. Wšitke kamory běchu wočinjene a přeborkane zawostajili. Policisća njemóžachu podružnikow docpěć, tak dyrbješe so wohnjowa wobora wo zawěsćenje bydlenja starać. Po tuchwilnych dopóznaćach su paduši wjetšu sumu w bydlenju składowanych pjenjez rubili. Wěcna škoda na twarjenju a durjach wučinja něhdźe 1 000 eurow.
Policija (06.09.24)
Policija prosy wo pokiwy
Budyšin. Hižo wot 31. awgusta sem pyta Budyska policija za 63lětnym Klausom Dieterom T. Na tutym dnju su jeho susodźa jeho bydlenja w Strowotnej studni něhdźe w 5.30 hodź. w krótkich jeansach, zelenym T-shirće a běłych sportowych črijach z ćmowozelenym nachribjetnikom wuhladali. Zasadźity muž je něhdźe 1,75 m wulki a ma šěre włosy. Pokiwy podajće prošu pod tel. čo. 03591 356 0.
Policija (03.09.24)
Tramwajka z kolijow skočiła
Zhorjelc. Sobotu připołdnju běše 75lětny muž ze swojim wosobowym awtom typa VW w Zhorjelcu na kružnym wobchadźe na dróze W zelenym přirowje po puću. W samsnym času jědźeše tam tež tramwajka do směra nutřkowneho města. Wočiwidnje přewidźa šofer VWja čerwjenu amplu na kružnym wobchadźe, tak, zo do njeje zrazy. Zražka běše tak mócna, zo tramwajka z kolijow skoči. Ličba sobujěducych znata njeje, dokelž běchu nimale wšitcy městno njezboža wopušćili, prjedy hač jednotki wuchowanskeje słužby kaž tež zastojnicy policije dojědźechu. 74lětna sobujězdźerka we wosobowym awće so lochce zrani. Wěcna škoda wučinja dohromady 40 000 eurow.
Krótka njekedźbliwosć – wulka škoda
Policija (02.09.24)
Njezbožo ze zranjenymaj
Połčnicy. W Połčnicy dóńdźe tydźenja pjatk k wobchadnemu njezbožu. 54lětna šoferka awta typa Opel Corsa chcyše nalěwo na parkowanišćo wotbočić. Wobchada dla dyrbješe na swojej jězdnej čakać. 18lětny młodostny, kotryž běše w swojim awće typa Mercedes za njej po puću, pak situaciju prawdźepodobnje přepozdźe wopřimny a zajědźe do čakaceho Opela. Zražka běše tak sylna, zo so Mercedes přećisny a do awta na napřećiwnej jězdnej zrazy. Při tym so młody muž a kaž tež šoferka Opela zraništaj. Wěcna škoda wučinja něhdźe 60 000 eurow.
Policija (30.08.24)
Spomóžne sobudźěło
Habrachćicy. Kedźbliwi swědkojo su srjedu dopołdnja pozdatneho paducha při swojim njeskutku na Sakskej dróze w Habrachćicach mylili. Woni běchu zwuki zasłyšeli, jako spyta njeznaty durje do bydlenskeho domu rozłamać. Jako njeskutka podhladny zwěsći, zo bu wobkedźbowany, ćekny. Wot swědkow na pomoc zwołanym zastojnikam policije pak poradźi so, muža w bliskosći městna njeskutka popadnyć. Spěšneho sobudźěła swědkow dla njebě zadobyće 23lětneho čěskeho staćana wuspěšne. Tež wulka wěcna škoda njeje nastała. Wukopa so, zo je skućićel mnohich dalšich zadobywanjow w Hornim kraju podhladny. Po zapodaću statneho rěčnistwa je so štwórtk hižo jatbowy sudnik z padom zaběrał. Wón wukaza přepytowansku jatbu za skućićela.
Policija (29.08.24)
Njesćerpnosće dla njezbožo zawiniłoj
Słona Boršć. Wopačne zadźerženje w situaciji kopjenja wobchada je wutoru rano njezbožo na zwjazkowej awtodróze A 4 zawinowało. 71lětny muž běše ze swojim wosobowym awtom typa Audi do směra Zhorjelc po puću. Před wotjězdku Budyšin-zapad kopješe so njezboža dla wobchad. Šofer Audija pak nochcyše čakać a zajědźe na za wobchad zakazane bóčne pasmo, zo by dale jěć móhł. Tohorunja njesćerpny běše 46lětny němski šofer, kotryž ze swojim awtom typa Tesla w kolonje steješe a na zakazane pasmo wujědźe. Tak zrazy do bližaceho so Audija. Zranił so při njezbožu nichtó njeje. Nasta pak wěcna škoda w rozměrje něhdźe 25 000 eurow. Wobaj šoferaj mataj so tohodla nětko zakazaneho wužiwanja bóčneho pasma dla před sudnistwom zamołwić.
