Policija (18.07.24)
Warnuje před wobšudnikami
Jěžow. Póndźelu wječor su wobšudnicy 78lětnu žonu w Jěžowje přelesćili a sej dohromady 22 000 eurow spakosćili. Dotal njeznaći njeskutka podhladni běchu so telefonisce ze stawiznu wo znjezboženej dźowce pola njeje přizjewili. Jedyn ze skućićelow wuda so jako zastojnik kriminalneje policije a zdźěli žonje, zo dyrbjała dźowka do jastwa. Jenož z 35 000 eurami kawciju móhła wona tomu zadźěwać. Seniorka da so wot stawizny zaslepić a je chwilu pozdźišo cyłe swoje zamóženstwo, dohromady 22 000 eurow, wot swojeho konta wotzběhnyła. Na parkowanišću při Łučinskej dróze je pjenjezy njeznatej žonje přepodała. Po wopisanju swědkow je wona 30 do 50 lět stara, něhdźe 160 cm wulka, zasadźita a pozdatnje aziskeho pochada. Policija warnuje před tutym wupruwowanym trikom wobšudnikow.
Policija (17.07.24)
Zabłudźena čorna wowca
Łuty. Wot póndźele popołdnja błudźi so ćeknjena čorna wowca kołowokoło wjeski Łuty (Lauta). Swědk je zwěrjo na parkowanišću nakupowanskich wikow při tym wobkedźbował, kak wone zas a zaso do sćěny wobchoda bodźeše. Jako policija dojědźe, běše so wowca hižo do směra Wuchodneje dróhi zminyła. Nimale tři hodźiny pozdźišo wuhladachu swědkojo zwěrjo podłu železniskich kolijow mjez Čornym Chołmcom a Wojerecami. Němska železnica je wobchad na čarje tohodla přechodnje wobmjezowała. Dalši swědk wuhlada wowcu pozdźišo při skale w Čornym Chołmcu. Po tym přebytk zwěrjeća hižo znaty njeje. Wojerowska policija prosy wo pokiwy pod tel. čo. 03571 4650.
Policija (16.07.24)
Značce na policiskim awće pokradnył
Žitawa. 23-lětny je njedźelu w nocy wobchadnej znamješce na policiskim awće lokalneho policiskeho rewěra w Žitawje pokradnył. To sčini w času, jako zastojnicy policije runje pada kaženja měra dla w domje přebywachu. Jako so wróćichu jim falowacej značce njenapadnyštej. Hakle swědk njeskutka jich na to skedźbni. Zastojnikam poradźi so, skućićela wuslědźić a w susodstwje popadnyć.
Policija (15.07.24)
Njezboža dla tunl přez Limas zawrěli
Zhorjelc. Před zapadnym zajězdom do tunla přez Limas sta so sobotu dopołdnja njezbožo, kotrehož dla je jón policija na dwě hodźinje dospołnje zawrěć dyrbjała. Pólski staćan běše ze swojim awtom typa Renault Kangoo na jězdni awtodróhi A4 do směra Zhorjelc po puću. Krótko před tunlom zajědźe z dotal njeznatych přičin na lěwy bok čary a zrazy do wodźaceje planki. Při tym so awto masiwnje wobškodźi, tak zo móžeše je hakle wotwlečenska słužba wot jězdnje wottransportować. Wuchowanska słužba wotwjeze 51lětneho šofera do chorownje, kotryž běše so wočiwidnje jenož lochce zranił. Wěcowna škoda wučinja po prěnich trochowanjach něhdźe 6 000 eurow. Fachowa firma je so wo wurjedźenje městna njezboža postarała.
Pytanska akcija wuspěšna
Policija (12.07.24)
Wopačna zdźělenka
Budyšin. Po telefoniskej zdźělence wo schowanej bombje na tankowni Aral w Strowotnej studni wčera rano, je policija bjezposrědnje ležownosć ewakuěrowała a areal kołowokoło zašlahała. Specialisća za rozbuchliny pak po systematiskim pytanju ničo njenamakachu. Kriminalna policija přepytuje nětko wopačneje zdźělenki dla.
Policija (11.07.24)
Diesel a připowěšak pokradnyli
Dźěžnikecy. Njeznaći skućićeljo su póndźelu 800 litrow diesela a připowěšak z ležownosće w Dźěžnikecach pokradnyli. Paduši su so na areal firmy podali a najprjedy wotstajene nakładne awto přeparkowali. Awtowe klučiki za nje běchu w transporteru na ležownosći namakali. Potom su z kolesowym nakładowakom tank z něhdźe 300 litrami diesela na připowěšak połožili a sej na susodnu ležownosć dojěli. Z tam wotstajeneho nakładneho awta napjelnichu dieselowy tank z dalšimi 500 litrami diesela. Cyłkowna škoda wučinja něhdźe 7 000 eurow. Kriminalny technikar je slědy zawěsćił. Zastojnicy Budyskeho policajskeho rewěra su pad wosebje ćežkeho padustwa dla sudnistwu přepodali.
Policija (10.07.24)
Wobruči prasnyłoj
Zhorjelc. Hnydom dwaj wodźerjej nakładneju awtow staj předwčerawšim njerjane wokomiki na A4 mjez Zhorjelcom a Drježdźanami dožiwiłoj. Jimaj běštej wobruči na připowěšakomaj prasnyłoj. Po podawkomaj staraše so wobchadna policija wo wěstotu na awtodróze kaž tež wo wotstronjenje zbytkow wobručow.
Policija (09.07.24)
Wobchadna kontrola ze sćěwkami
Budyšin. Zastojnicy Budyskeje policije zadźeržachu pjatk dopołdnja awto typa Audi A 6 na Dróze Thomasa Manna, dokelž awtowej značce hižo płaćiwej njeběštej. W běhu kontrole zwěsćichu, zo šofer tež płaćiwu jězbnu dowolnosć nima. Z tym běše jězba za 21lětneho němskeho staćana zakónčena. Policisća wotewzachu jemu awtowe klučiki a wotšrubowachu njepłaćiwej awtowej znamjeni. Młody muž ma so nětko jězdźenja bjez jězbneje dowolnosće a bjeze zawěsćenja dla před sudnistwom zamołwić.
Policija (08.07.24)
Njekedźbliwosće dla woheń wudyrił
Budyšin. Žehliweho popjeła dla zapali so sobotu rano na ležownosći w Budyskej Dróze Gerharta Hauptmanna wotpadkowa tona. Lětacych škričkow dla zapalichu so bórze po tym tež kólnja a někotre štomy w susodstwje. Dohromady sydom wohnjowych woborow ze 37 wohnjowymi wobornikami přichwata a woheń na kóncu zhaša. Wosoby so zranili njejsu. Wěcna škoda wučinja něhdźe 30 000 eurow.
Njezbožo z ćežko zranjenymaj
Wojerecy. Pólske nakładne awto zrazy sobotu na Grodkowskej šoseji do směra Čorneje Pumpy do před nim jěduceho awta typa Renault a suny je do awta typa Seat, kotrež při čerwjenej ampli steješe. 58lětny šofer nakładneho awta běše čerwjenu swěcu ample prawdźepodobnje přewidźał. 36lětna šoferka Seata a 38lětny šofer Renaulta so ćežko zraništaj. Chorobna słužba jeju do chorownje dowjeze. Šofer nakładneho awta zwosta njezranjeny. Wěcna škoda na wobdźělenych jězdźidłach wučinja něhdźe 22 000 eurow.
Policija (05.07.24)
Njeskutka podhladneju lepili
Budyšin. Zastojnicy Drježdźanskeje slědźenskeje jednotki su wutoru rano na wotpočnišću A 4 Hornja Łužica-sewjer awto typa BMW X5 zadźerželi. Tute bu na předwječoru jako pokradnjene přizjewjene. Woni zajachu 32lětneho pólskeho šofera. W přewodźacym awće su policisća Zhorjelskeje policajskeje direkcije pozdźišo 20lětneho pólskeho staćana a sobuskućićela lepili. Njeskutka podhladnaj su srjedu do jastwa „zaćahnyłoj“, po tym zo bě sudnik přikaz zajeća wuprajił.
Ze strašnym nakładom w tunlu
Zhorjelc. Zastojnicy wobchadneje policije su srjedu wospjet nakładne awto ze strašnym nakładom w tunlu přez Limas zadźerželi. Nakładowane běchu bleše, napjelnjene z płunom, kotryž so spěšnje zapłomjeni. 58lětny słowakski šofer dósta wozjewjenje přeńdźenja dla.
