Prawy pokiw dał
Budyšin. Po pokiwje wobydlerja je policija srjedu dopołdnja na zwjazkowej dróze B 6 mjez Budyšinom a Lubijom šofera lepiła, kiž pod wliwom drogow steješe. Wón bě napadnył, dokelž razantnje jězdźeše a riskantnje přesćahowaše. Alarměrowana wobsadka policajskeho awta móžeše 40lětneho čěskeho šofera skónčnje zadźeržeć. Při kontroli so wukopa, zo bě wón konop brał. Nimo toho zastojnicy wotpowědnu substancu w awće namakachu. Dale jěć muž njesmědźeše.
Awto koleso zhubiło
Kamjenc. Wobchadne njezbožo je so wutoru na statnej dróze S 94 pola Kamjenca stało. 60lětny wodźer wosoboweho awta bě do směra na Porchow po puću. Při wotbóčce na S 97 přijědźe jemu nakładne awto napřećo – a nimo toho jednotliwe koleso, kotrež bě so wot připowěšaka pušćiło. Wone prasny do Dacije a načini 6 000 eurow škody. 50lětny wodźer Lkw-ja to ani pytnył njeje a dale jědźeše. Policija jeho pozdźišo wuslědźi.
Hólc wjewjerčku wuchował
Mužakow. Zo móžeš so w nimale kóždej naležnosći na policiju wobroćić, je póndźelu po wšěm zdaću hólc w Mužakowje wědźał a tak najskerje wjewjerčce žiwjenje wuchował. Hólčec wobydlerskemu policistej zdźěli, zo je w měšćanskim parku wjewjerčka zranjena, a jeho k njej wjedźeše. Policist zranjenja spózna a informowaše Załožbu hrabje Pücklera. Jeje sobudźěłaćerjo dowjezechu štyrinohateho pacienta do Běłowodźanskeho zwěrjenca, hdźež so dale wo njeho starachu.
W kupjeli so paliło
Smječkecy. Wohnjowu woboru, wuchowansku słužbu a policiju wołachu sobotu rano do Smječkec. W kupjeli jednoswójbneho domu bě z dotal njeznatych přičin woheń wudyrił. Płomjenja na wšelake meble w kupjeli přeskočichu. Zasadźeni wohnjowi wobornicy woheń zhašachu. Jako 37lětny wobsedźer swój dom wopušći, so wón na noze zrani, tak zo dyrbjachu jeho w chorowni zastarać. Kelko škody je cyłkownje nastało, dotal znate njeje.
Šofer po njezbožu ćeknył
Słona Boršć. K njewšědnemu zasadźenju přijědźe policija w nocy na štwórtk na awtodróhu A 4. Krótko do 4 hodź. dóńdźe do dispatchernje awtomatiska nuzowa informacija BMWja, kiž je mjez Hornim Wujězdom a Słonej Boršću znjezbožił. Zastojnicy wuhladachu tam na kromje jězdnje chětro wobškodźeny X5. Šofer pak bě so po wšěm zdaću zhubił. Za nim pytachu samo z helikopterom a psom, ale podarmo. Dotal žanoho zamołwiteho wuslědźić njemóžachu. Škodu trochuja na něhdźe 85 000 eurow.
Njezbožo paletow dla
Budyšin. Nakładne awto je wutoru rano na awtodróze A 4 wjacore tak mjenowane europalety zhubiło a tak wobchadne njezbožo zawiniło. 56lětny wodźer jězdźidła bě do směra na Drježdźany po puću, jako mjez wotbóčkomaj Wóspork a Budyšin-wuchod někotre palety z awta padnychu a so na jězdni rozdźělichu. Za nakładnym awtom jěducy wodźer Mercedesa w samsnej starobje njemóžeše so hižo wuwinyć a přez jednu paletu zajědźe. Při tym nasta něhdźe 3 000 eurow škody. Na zbožo so nichtó zranił njeje. Zastojnicy awtodróhoweho policajskeho rewěra njezbožo wobdźěłachu a palety z A 4 zrumowachu.
Z wokna třělał
Budyšin. Wjacore wutřěle z bydlenja na Budyskej Ebertowej su swědkojo póndźelu policiji zdźělili. Zastojnicy zwěsćichu, zo jednaše so wo bydlenje 36lětneho muža. Z pomocu specialneje skupiny policije muža přewinychu. Kaž so wukopa, bě wón hižo wjacore razy z trašawku z wokna swojeho bydlenja třělał. Pistolu policisća sćazachu.
Awtomat rozbuchnyli
Bukecy. Cigaretowy awtomat su njeznaći w nocy na njedźelu w Bukecach wobškodźili. Do swobodnje nastajeneho awtomata dachu woni njeznatu maćiznu a z njej awtomat rozbuchnychu. Policisća namakachu wokoło njeho někotre tyzy cigaretow a něhdźe 100 eurow. Kelko pjenjez a kelko cigaretow su skućićeljo pokradnyli, njeje znate. Po informacijach Zhorjelskeje policajskeje direkcije trochuja škodu na něhdźe 5 000 eurow.
Wšelake drogi namakali
Wojerecy. Zastojnicy policije su wčera w bydlenju na Budyskej aleji wšelake družiny drogow namakali. 36lětna žona a jeje 38lětny přećel němskeho pochada, dyrbitaj so nětko před sudnistwom zamołwić.
Njezbožo z kolesom
Wojerecy. 56lětna wodźerka awta marki BMW je wutoru z dróhi Měra naprawo na dr. Wilhelma Külzowu dróhu wotbočiła. Při tym wona kolesowarku přewidźa. 45lětna bu lochce zranjena. Wěcna škoda wučinja něhdźe 600 eurow.