Policija (13.03.20)
Po njezbožu so zminył
Běła Woda. Zo na parkowanišću njewotpohladnje do druheho awta storčiš, móže so kóždemu stać, a zwjetša hodźi so škoda spěšnje zrjadować. Hdyž pak prosće wotjědźeš, je to hórje. Předwčerawšim sta so tajki pad w Běłej Wodźe. Tam je so wodźer VWja z městna njezboža zminył, njeje pak žanu informaciju wo sebi abo zražce zawostajił. Policija muža wuslědźi a jeho w bydlenju wopyta. Přećiwo njemu přepytuja nětko njedowoleneho wotsalenja z městna njezboža dla – a to 50 eurow škody dla.
Policija (12.03.20)
Njeskutk sej wumyslił
Běła Woda. Z wumyslenym wotwjedźenjom je 15lětny hólc wutoru w Běłej Wodźe wulku policajsku akciju wuskutkował. Wón zastojnikam powědaše, zo staj mužej z ćmowej drastu žonu na teren bywšeho zawoda zawlekłoj. Wjacore wobsadki policajskich awtow a helikopter hnydom za žonu pytachu. Runočasnje so pozdatneho swědka dale wuwoprašowachu. Při tym so wukopa, zo bě sej tón wšitko jenož wumyslił. Wudawanje złóstnistwa pak njeje kawalěrski delikt. Najskerje změje 15lětny wudawki něšto tysac eurow zapłaćić.
Policija (11.03.20)
Šulske busy kontrolowali
Wojerecy. Wobchadna słužba awtodróhoweje policije je minjene dny we Wojerecach, Wóslinku a Biskopicach šulske busy kontrolowała. Zastojnicy přepruwowachu dohromady 44 jězdźidłow. Pola dweju z nich zwěsćichu, zo bě dawno hižo nowe hłowne přepytowanje trěbne. Dale busowi šoferojo trěbne papjery za transport ludźi při sebi njemějachu, a předpisane pokiwowe taflički běchu běchu w busu wopak přičinjene. Techniske njedostatki policajscy kontrolerojo porno tomu zwěsćili njejsu.
Pytaja ćeknjeneho šofera
Budyšin. Najskerje přenjemdreho jězdźenja dla sta so předwčerawšim w Budyšinje wobchadne njezbožo, při kotrymž so jedna wosoba zrani. Zawinowar na to ćekny. Po wšěm zdaću čorny Škoda Octavia bě w 20 hodź. z Tzschirneroweje naprawo na Nowosólsku wotbočił. Při tym zrazy do dalšeho Škody 32lětneje samodruheje žony. Zawinowace awto drje je na lěwym prědnim boku wobškodźene. Štóž je něšto wobkedźbował abo móže pokiwy podać, njech přizjewi so pod telefonowym čisłom 03591/ 36 70.
Policija (10.03.20)
Třo młodostni zranjeni
Nowoslicy. Přewulka spěšnosć bě najskerje přičina wobchadneho njezboža dźensa w nocy w Nowoslicach. Na statnej dróze S 101 je so z Chróšćanskeho směra přijěducy wodźer Forda suwać započał, do přirowa zajěł a zwróćił. Wón a dalšej młodostnaj so ćežko zranichu. Nimale 30 wohnjowych wobornikow z Chrósćic, Nuknicy, Sernjan a Ralbic bě zasadźenych. Woni městno wuswětlichu a pomhachu při transporće zranjenych. Lětnje wobruče awta běchu chětro wotjězdźene.
Policija (09.03.20)
Kaž njemdry jězdźił
Horni Wujězd. Awtodróhu A 4 mjez Hornim Wujězdom a Słonej Boršću je drje 44lětny wodźer VWja Amarok sobotu z wubědźowanskej čaru zaměnił. Přesćahnywši ciwilne awto sakskeje hotowostneje policije na prawym boku wón krótko před nim zaso dolěwa zawiny. Jeno ze spěšnej reakciju móžeše šofer policajskeho awta hóršemu zadźěwać. Na wotpočnišću Hornja Łužica-juh bě jězba 44lětneho skónčnje nimo. Tam njejsu jenož jeho jězbnu dowolnosć sćazali, ale nańdźechu pola njeho tež elektrošoker a nóž.
Policija (06.03.20)
Po njezbožu ćeknył
Narć. 60lětny wodźer BMWja je zawčerawšim wječor w Narću do sćežora nadróžneho wobswětlenja zrazył, při tym 6 000 eurow škody načinił a na to z městna njezboža ćeknył. Swědcy pak we wsy bydlaceho spóznachu a policiju informowachu. Zastojnicy muža na to doma wopytachu, hdźež jeho z podawkom konfrontowachu. Při tym woni zwěsćichu, zo steješe wón pod njesnadnym wliwom alkohola. Test wunjese pola 60lětneho na wšěch 1,9 promilow alkohola w kreji. Tak prošachu policisća jeho k wotedaću kreje. Nětko njezměje so wón jeno zawinowanja njezboža pod wliwom alkohola dla zamołwić, ale tež ćeknjenja z městna njezboža dla.
Policija (05.03.20)
Trik z wnučkom njefungował
Kamjenc. Hnydom třo rentnarjo w Kamjencu a wokolinje dóstachu předwčerawšim spodźiwne telefonaty wot pozdatnych wnučkow. W prěnim padźe žadaše sej njeznaty 25 000 eurow a přizjewi, zo chce popołdnju na kofej přińć a sej pjenjezy wotewzać. W druhim padźe dósta 82lětna podobny telefonat. Tež tu so wobšudnik ke kofejej přizjewi a wudawaše, zo trjeba pjenjezy. Přišoł pak nichtó njeje. A skónčnje přizjewi so njeznaty pola 90lětneje žony a žadaše sej 20 000 eurow. Na zbožo wšitcy třo rentnarjo pospyt wobšudnistwa spóznachu a słuchatko połožichu. Wšitke pady je kriminalna policija přewzała a namołwja staršich ludźi, dale skedźbni być.
Policija (04.03.20)
Z awtom do ponyja zrazyła
Kulow. Njewšědne njezbožo sta so póndźelu popołdnju na Mučowskej dróze w Kulowje. Tam bě žona z Toyotu z Wojerowskeje dróhi do směra na Mučow po puću. Nadobo stupi cyle njewšědny zawinowar njezbožow na jězdnju – pony. Šoferka wosoboweho awta njezamó hižo borzdźić a zrazy do njeho. Wona so na zbožo njezrani. Tež pony, kotrehož bě sej skótny lěkar dokładnje wobhladał, wosta po zdaću njezranjeny. Přiwšěm wučinja wěcna škoda něhdźe 3 000 eurow.
Policija (03.03.20)
Wjelk žiwjenje přisadźił
Běła Woda. Wobchadne njezbožo wjelka dla sta so předwčerawšim po připołdnju na zwjazkowej dróze B 156 mjez Běłej Wodu a Krušwicu. Wjelkaj přeprěčištaj tam jězdnju, jako runje Audi přijědźe. 69lětny wodźer awta njemóžeše hižo zaborzdźić a zrazy do jednoho z njeju. Štyrinohač zražku njepřežiwi.
Policija (02.03.20)
Nadźija na zymski sport
Běła Woda. Byrnjež na zymske wjedro najprjedy raz žane wuhlady njebyli, su so njeznaći w Běłej Wodźe ze zymskim wuhotowanjom zastarali. Z jedneje garaže pokradnychu woni mjenujcy poraj sněhakowarskich čriji, tři pory sněhakow a wotpowědne kije. Cyłkownu hódnotu trochuje wobsedźer po informacijach policije na něhdźe 1 500 eurow.
