Policija (25.01.17)
Hodowny štom so palił
Połčnica. Mjeztym zo su mnozy swój hodowny štom hižo wotbyli, wón w jednym bydlenju w Połčnicy hač do wčerawšeho přeco hišće z wóskowymi swěčkami wudebjeny steješe. Něhdźe w 17.30 hodź. pak jedna ze swěčkow hałžku zapali, na čož so sekundy pozdźišo cyły štom paleše. 73lětnej wobydlerce so poradźi z přikrywami a wohnjohašakom płomjenja podusyć, prjedy hač alarmowana wohnjowa wobora přijědźe. Zranił so nichtó njeje, škoda wučinja 5 000 eurow.
Policija (24.01.17)
Hižo rano dospołnje pjany
Horni Wujězd. Zastojnicy Budyskeho policajskeho rewěra su wčera něhdźe w 6.30 hodź. na awtodróze A 4 pola Hornjeho Wujězda dospołnje pjaneho wodźerja awta dosahnyli. Wjacori šoferojo běchu so pola policije přizjewili a wo awće rozprawjeli, kotrež runjewon njejědźe. Nimo toho je jeho wodźer wosrjedź jězby nastajnosći durje awta wočinjał. Policisća wuhladachu w Danskej přizjewjeny Suzuki na kromje awtodróhi stejo. 37lětny šofer móžeše so lědma na nohomaj dźeržeć. Alkoholowy test pak dospołnje wopity wotpokaza. Zastojnicy tuž přikazachu, zo ma so jemu krej brać, a wzachu muža sobu na rewěr.
Policija (23.01.17)
16lětny z awtom znjezbožił
Chelno. Wobchadne njezbožo ze štyrjomi zranjenymi je so minjeny pjatk wječor pola Chelna stało. 16lětny (!) wodźer VWja bě něhdźe w 22 hodź. po statnej dróze S 106 ze Słoneje Boršće do směra na Chelno po puću. Při kružnym wobchadźe zajědźe wón z dotal njeznateje přičiny do wobhrodźenja a wobchadneho znamjenja. Na to so awto zwróći a wosta na třěše ležo. Šofer kaž tež jeho třo sobujěducy w starobje 15 a 18 lět so snadnje zranichu. Při wobdźěłanju njezboža so wukopa, zo 16lětny jeno žanu jězbnu dowolnosć njeměješe, ale awto tež scyła přizjewjene njebě a měješe nimo toho wopačnej čisle přišrubowanej. Policija so nětko z tymle padom dokładnišo zaběra.
Paduši w bydlenju
Kamjenc. W času mjez 16 a 23 hodź. zadobychu so sobotu njeznaći přez terasu do jednoswójbneho domu na Budyskej horje w Kamjencu. Tam pokradnychu štyricyfrowu sumu pjenjez a debjenki. Nimo toho načinichu paduši něhdźe sto eurow wěcneje škody.
Policija (20.01.17)
Cedlu zawostajić njedosaha
Běła Woda. Dokelž bě ze swojim awtom njewotpohladnje do druheho storčił a byrnjež jeno snadnu škodu načinił, ma 18lětny jězbny započatkar nětko mjerzanja z justicu. Wón bě při zaparkowanju na Fröbelowej do cuzeho awta załožił. Zawostajiwši na nim cedlu ze swojej adresu sej młody muž mysleše, zo je swoju winowatosć spjelnił. To pak je so mylił. Policija nětko pruwuje, hač jedna so wo ćeknjenje z městna njezboža. Lěpje by było policiju informować, na nju čakać a so z městna njewotsalić.
Policija (19.01.17)
Pod alkoholom do sněha
Załom. Kontroli policije wuwinyć spytał je so w nocy na srjedu wodźer transportera. Zastojnicy chcychu muža blisko Załomja zadźeržeć, tón pak stupi na płun a najprjedy po hłownej dróze, pozdźišo po zasněženym pólnym pućiku ćěkaše. Tam pak w sněze tčacy wosta. Policistam so spěšnje wujasni, čehodla bě 36lětny ćeknył. Pola njeho naměrichu 1,92 promilow alkohola w kreji.
Z nožom hrozył
Jenkecy. Staršej 34lětneho muža wołaštaj wutoru wječor policiju a wuchowansku słužbu k sebi domoj do Jenkec w Kubšiskej gmejnje. Kaž zdźělištaj, bě jeju syn dospołnje wopity w domje randalěrował a jimaj z nožom hrozył. Policisća renitentneho muža změrowachu a zwěsćichu pola njeho 1,8 promilow alkohola w kreji. Na přikaz krajnoradneho zarjada zapokazachu 34lětneho do fachoweje chorownje.
Z toboły so handy zhubił
Policija (18.01.17)
Diesel kradnyli
Słona Boršć. We wulkim stilu diesel kradnyli su njeznaći w Słonej Boršći. Kaž tam zwěsćichu, běchu so njeznaći minjenej tydźenjej do tankoweho kontejnera zadobyli a z njeho kaž tež z nakładneho awta něhdźe 550 litrow ćěriwa wotklumpali. Škoda wučinja 620 eurow, nimo toho nasta 180 eurow wěcneje škody.
Policija (17.01.17)
Pěšk policistam pomhał
Zhorjelc. Z pomocu kuražěrowaneho pěška je policija minjenu sobotu wječor w Zhorjelcu zasudźeneho młodeho muža zajała. Zastojnicy policajskeho rewěra zwěsćichu 21lětneho w nutřkownym měsće. Wuhladawši policistow wón ćekny. Sudnistwo bě jeho mjenujcy hižo w nowembru ke chłostanju poł lěta młodźinskeho jastwa zasudźiło. Te pak prosće nastupił njeje. Jako młody muž před policistami ćěkaše, njeznaty pasant do akcije zapřimny. Wón do ćěkaceho storči, tak zo so tón zakopny a do sćěny domskeho dyri. Tam jeho policisća dosahnychu. Ze zběhnjenym palcom pěšk signalizowaše, zo je wšitko w porjadku a so na to wotsali. Policisća so njeznatemu pomocnikej za jeho wobhladniwe jednanje dźakuja. 21lětneho pak dowjezechu do jastwa, hdźež dyrbi nětko swoje chłostanje wotsedźeć.
Policija (16.01.17)
Woheń z bydlenja sapał
Wojerecy. Wšo druhe hač měrne zymske dopołdnjo mějachu wčera wohnjowi wobornicy we Wojerecach. Tam bě něhdźe w 10.30 hodź. w jědnaćeposchodowym wysokodomje na Virchowowej woheń wudyrił. Płomjenja sapachu z bydlenja na sedmym poschodźe. 40lětny wobydler w tym času doma njebě. Ze susodneho bydlenja dyrbjachu 82lětnu wobydlerku ewakuować. Balkon palaceho so bydlenja docpěchu wobornicy z wjerćitym rěblom. Krótko do 11.30 hodź. běchu płomjenja zhašane. Nimo Wojerowskeje powołanskeje wobory běchu dobrowólni wobornicy z Kinajchta, Němcow a Michałkow zasadźeni. Přičina wohenja dotal znata njeje. Wohnjowoborny fachowc je wčera móžne slědy přepytował. Přećiwo 40lětnemu wobydlerjej zahajichu jednanje lochkomyslneho zapalerstwa dla. Swoje bydlenje wšak wón najprjedy raz wužiwać njemóže. Načinjenu wěcnu škodu trochuja na 10 000 eurow. Na zbožo so při wohenju a hašenju nichtó zranił njeje.
Policija (13.01.17)
Šofera zajeli
Horni Wujězd. Wichor a sněh stej srjedu nawječor policiji pomhałoj muža zajeć, za kotrymž w Sewjerorynsko-Westfalskej pytachu. 45lětny bě z nakładnym awtom na awtodróze A 4 pola Hornjeho Wujězda w sněze tčacy wostał, na čož wón policiju wołaše a wo pomoc prošeše. Zastojnicy jeho personalije na městnje přepruwowachu a zwěsćichu, zo Sewjerorynsko-westfalski krajny kriminalny zarjad za mužom z třomi wukazami zajeća pyta. Překwapjeneho wodźerja Lkw-ja policisća zajachu a do jastwa dowjezechu. Z awtom dyrbješe druhi šofer dale jěć.
Policija (12.01.17)
Pytaja swědkow
Budyšin. K wobchadnemu njezbožu, kotrež je so póndźelu w 14.45 hodź. w Budyšinje stało, pyta policija swědkow. Dotal njeznata wosoba bě z čerwjenym awtom z Mužakowskeje naprawo na Flincowu wotbočiła. Runje w tym wokomiku 25lětna žona Flincowu přeprěči, tak zo awto do njeje zajědźe. Młoda žona suny so přez motorowu hawbu a padny. Šofer/ka so zminy, bjez toho zo by so jako wodźer/ka wo snadnje zranjenu pěšku starał/a. Kriminalna słužba Budyskeho policajskeho rewěra pad přepytuje a pyta swědkow, kotřiž su njezbožo wobkedźbowali abo móža pokiwy k šoferej abo šoferce dać. Swědcy njech přizjewja so w Budyskim policajskim rewěrje pod telefonowym čisłom 03591/ 35 60.
