Policija (07.06.17)
Kolesowarka znjezbožiła
Budyšin. Při wobchadnym njezbožu ćežko zraniła je so wčera kolesowarka w Budyšinje. 66lětna jědźeše na Mužakowskej do směra centruma. 25lětny wodźer wulkeho nakładneho awta chcyše tam naprawo na Schäfferowu wotbočić, rentnarku je po wšěm zdaću přewidźał a do njeje załoži. Při tym so wona ćežko zrani, tak zo dyrbjachu ju k lěkarskemu zastaranju do bliskeje chorownje dowjezć. Wobchadna njezbožowa słužba nětko za dokładnymi přičinami zražki slědźi.
Policija (06.06.17)
Motorski smjertnje znjezbožił
Družkecy. Wobchadne njezbožo sta so wčera w Družkecach (Drauschkowitz). 33lětny wodźer Audija chcyše statnu dróhu S 119 runjewon do směra na Słónkecy (Schlungwitz) přeprěčić. Při tym njewobkedźbowaše wón předjězbu motorskeho, kiž do awta zrazy. 47lětny w chorowni na sćěhi zranjenjow zemrě.
Policija (02.06.17)
Hižo připołdnju wopity
Budyšin. Dokelž bě wodźer Audija A 6 zawčerawšim připołdnju w Budyšinje na puć Při Albrechtowce wotbočił, byrnjež to zakazane było, jeho policisća kontrolowachu. W kreji šofera naměrichu na to 2,26 promilow alkohola.
Policija (01.06.17)
Pomoc pytaceho hižo pytali
Kamjenc. Njewočakowanu překwapjenku dožiwi 26lětny muž zawčerawšim popołdnju na Kamjenskim policajskim rewěrje. Tam so wón přizjewi, dokelž chcyše někajku zwadu rozrisanu měć. Při přepruwowanju jeho personalijow pak so zastojnicy njemało dźiwachu, přetož Budyske hamtske sudnistwo młodeho muža hižo pytaše, a to z přikazom zajeća. Njebě so mjenujcy na sudniskim jednanju bjez zamołwjenja zjewił. Policisća jeho tuž k jatbowemu sudnikej dowjezechu. Tón napołoži 26lětnemu někotre wuměnjenja, na čož smědźeše wón sudnistwo najprjedy zaso wopušćić.
Policija (31.05.17)
Jastwu zadźěwać móhł
Ottendorf-Okrilla. Takrjec z jednej nohu hižo w jastwje stał je wčera rano 45lětny wodźer nakładneho awta na parkowanišću při awtodróze A 4 blisko Ottendorfa-Okrille. Jako policisća jeho a jeho jězdźidło kontrolowachu, jim napadny, zo sewjerorynsko-westfalska justica za mužom z přikazom zajeća pyta. Znjewužiwanja awtowych čisłow dla bě jeho sudnistwo k wjacorym stam eurow pokuty zasudźiło. Pjenjezy pak muž dotal přepokazał njebě. Hladajo na hrožace zajeće muž zastojnikam swój dołh nablaku zapłaći a smědźeše tuž z nakładnym awtom dale jěć.
Policija (30.05.17)
Bjez dowolnosće jězdźił
Budyšin. Na Drježdźanskej dróze w Budyšinje je policija njedźelu rano wosobowe awto typa Ford zadźeržała a jeho šofera kontrolowała. Zastojnikam 28lětny muž rjekny, zo žanu jězbnu dowolnosć nima. Při nadrobnišim přepytowanju so wukopa, zo njebě muž prěni raz bjez jězbneje dowolnosće z awtom po puću. Tak změje so nětko statne rěčnistwo z tymle padom zaběrać. Policisća sćazachu awtowy klučik a přepodachu jón wobsedźerce Forda. Hač je wona „čornojězdźenje“ dowoliła, ma so hišće přepytować.
Policija (29.05.17)
Žiwy płót so palił
Pančicy-Kukow. Jenož krótki puć mějachu dobrowólni wobornicy Pančic-Kukowa, jako jich minjeny pjatk wječor k hašenju wołachu. Na Dróze Ćišinskeho blisko tankownje bě 46lětny wobydler njerodź z pomocu płunoweho palaka wotstronił. Při tym so suche hałzy žiweho płota zapalichu, tak zo so płomjenja po dołhosći jědnaće metrow rozpřestrěchu. Muž a jeho 14lětna dźowka spytaštaj je podusyć, při čimž so holca snadnje zrani. Wobornicy přijědźechu z třomi jězdźidłami a cyłkownje 16 kameradami, kotřiž mějachu woheń spěšnje pod kontrolu. Wěcnu škodu trochuja na něhdźe 3 000 eurow.
Policija (26.05.17)
Předjězbu njewobkedźbował
Rakecy. Ćežko zranił je so zawčerawšim wječor wodźer mopeda w Rakecach. Na křižowanišću Lěsna/Hermanečanska njeje 79lětny muž předjězbu wotprawa přijěduceho wosoboweho awta typa VW wobkedźbował. Jeho 38lětny šofer njemóžeše zražce hižo zadźěwać a zrazy do mopeda typa S 50. Při tym bu jeho wodźer ćežko zranjeny. Nuzoweho lěkarja dyrbjachu z helikopterom k městnu njezboža dowjezć.
Policija (24.05.17)
Njeluba překwapjenka po dowolu
Wojerecy. Njeje samozrozumliwe, zo je doma wšo w porjadku, hdyž so z dowola nawróćiš. Tole dyrbješe zawčerawšim swójba na Hasy Liselotty Herrmann we Wojerecach nazhonić. Njeznaći běchu so w času wot 7. meje hač do póndźele do bydlenja swójby zadobyli a wšitke stwy přepytali. Mjez druhim pokradnychu laptop, kompjuterowy tablet, hudźbny měšenski pult kaž tež hrajnu konsolu. Hódnotu rubizny trochuje wobsedźer na 2 000 eurow. Nimo toho nasta w bydlenju něhdźe 1 000 eurow wěcneje škody. Policija pad přepytuje.
Policija (23.05.17)
Telewizor a radijo fuk
Torońca. Njeznaći zadobychu so w nocy na njedźelu do zahrodoweje ležownosće w Torońcy (Daranitz) w Kubšiskej gmejnje. Ze zahrodoweho domčka pokradnychu płony telewizor a radijo w cyłkownej hódnoće 500 eurow. Wěcnu škodu trochuje wobsedźer na 100 eurow.
Z awtom do štoma
Bukecy. Z dotal njeznateje přičiny je njedźelu připołdnju 78lětna wodźerka wosoboweho awta na zwjazkowej dróze B 6 na kromje Bukec na prawy bok jězdnje zajěła. Tam zrazy jeje Opel Corsa do štoma a rentnarka so snadnje zrani. Na městnje zasadźeni běchu lěkar, wohnjowi wobornicy a wotwlečenska słužba. Na awće nasta 8 000 eurow škody.
