Policija (11.07.16)
Dźěćo do awta zamknjene było
Wojerecy. Napjata situacija nasta sobotu na pózdnim popołdnju na Starej Berlinskej dróze we Wojerecach. Tam bě něhdźe w 17.45 hodź. dwulětne dźěćo do wosoboweho awta typa VW zamknjene. Při wšěm njezbožu bě tež hišće awtowy klučik w zamknjenym jězdźidle. Tuž ničo druhe njezwosta, hač wohnjowu woboru alarmować. Kameradojo hólčka z awta wuswobodźichu, bjez toho zo by so wón zranił. Hač bě sej z klučikom hrajkał abo so na hinaše wašnje zamknył, z policajskeje rozprawy njewuchadźa.
Policija (08.07.16)
Twarski płót sobu wzałoj
Budyšin. Sto metrow twarskeho płotu a za njón trěbne kamjenje je 29lětny muž tele dny na Roesgerowej w Budyšinje hromadźe z pomocnikom na připowěšak składł a wotjěł. Dokelž swědk policiju zawoła, móžachu zastojnicy skućićela blisko Budyšina wuslědźić. Jako přičinu wón zdźěli, zo chcyše z płotom zarjadowanje młodźinskeho kluba zawěsćić. Mějićel płotu móžeše swoje wobsydstwo w hódnoće 2 500 eurow zaso sobu wzać.
Policija (07.07.16)
Drogi a pjenjezy namakali
Budyšin. Z koncentrowanej akciju je kriminalna policija tele dny w Budyšinje a Kamjencu dohromady jědnaće bydlenjow, zahrodowych domčkow a garažow přepytała. Něhdźe 400 gramow marihuany a 35 000 eurow zastojnicy při tym namakachu. Akcija měrješe so přećiwo sydom mužam w starobje 19 do 37 lět, kotřiž běchu po wšěm zdaću jako cwólba z drogami wikowali.
Policija (06.07.16)
Tři awta pokradnyli
Budyšin. Hnydom tři wosobowe awta typa Audi su so w nocy na wutoru na Malešanskej dróze w Budyšinje zhubili. Běły A 5, čorny A 6 a šěry Q 7 maja hódnotu dohromady 133 000 eurow. Za jězdźidłami nětko mjezynarodnje pytaja.
Policija (05.07.16)
Bus do kolesowarja zrazył
Budyšin. Linijowy bus je wčera krótko po 7 hodź. w Budyšinje do kolesowarja zrazył. Njezbožo sta so na křižowanišću Stieberowa/Liebknechtowa, jako jězdźidło nalěwo wotboči. 57lětny kolesowar padny a so snadnje zrani. Tež 55lětna žona w busu skoržeše, zo bě so zraniła, jako 61lětny wodźer nahle spinaše. Ju a kolesowarja su lěkarsce zastarali.
Policija (04.07.16)
Prawicarske parole bjakali
Budyšin. Po koparskim public viewingu je sobotu wječor na Budyskich Žitnych wikach k rozestajenju mjez Budyšanom a požadarjom azyla dóšło. Něhdźe 50 ludźi je na naměsće dobyće němskeho mustwa swjećiło. Při tym dóstaštaj so 20lětny Lybičan a 43lětny Budyšan do włosow, při čimž młódši na staršeho popjerjowy spray pryskaše a z předešćinikom do njeho biješe. Što bě dokładna přičina rozestajenja, policija hišće přepytuje. Zastojnicy zapisachu sej personalije wobdźěleneju a pósłachu ludźi domoj. 20lětneho požadarja azyla dowjezechu do jeho kwartěra. Bórze na to informowaše swědk policiju, zo na Bohatej skupina něhdźe dźesać ludźi před jednym domom prawicarske parole bjaka. Po wšěm zdaću spytachu so mužojo do domu zadobyć, w kotrymž 24lětny Syričan bydli. Tón bě do toho na rozestajenju na Žitnych wikach wobdźěleny a bě 20lětneho Lybičana přewodźał. Policisća znowa přijědźechu a tež tule skupinu rozpušćichu. Přećiwo 15lětnemu młodostnemu přepytuja nětko wobškodźenja wěcow dla. Do padu zapřijaty decernat za statny škit pyta nětko za swědkami.
Policija (01.07.16)
Buggyje a kwad pokradnyli
Mułkecy. Z terena firmy w Mułkecach su njeznaći w nocy na srjedu pjeć buggyjow a kwad pokradnyli. Bě to druhi tajki pad w běhu třoch tydźenjow w samsnej firmje. Paduši mějachu sej při tym chětro lochko. Přezpólne jězdźidła stejachu w jednorych garažach, do kotrychž so skućićeljo zadobychu. Wottam dowjezechu je do bliskeho lěska, hdźež je na nakładne awto, transporter abo připowěšak stajichu a wottransportowachu. Policajski pos móžeše hač tam slědy čuchać. Hódnotu pokradnjenych jězdźidłow trochuja na 100 000 eurow. Po wuhódnoćenju wobstejnosćow a slědow policija z toho wuchadźa, zo běchu wjacori skućićeljo „při dźěle“. Woni běchu derje organizowani a běchu objekt do toho wu- skušowali. Wočiwidnje je tónle pad runje tak wotběžał kaž prěni 10. junija. Tehdy běchu paduši na samsne wašnje wosom kwadow pokradnyli a 70 000 eurow škody načinili. W jednym z přichodnych wusyłanjow „Kripo live“ telewizija MDR wo tym tohorunja rozprawja.
Policija (30.06.16)
Zwisk mjez ćěkanjom a wohenjom
Słona Boršć. 23lětneho, kiž je so zawčerawšim na awtodróze A 4 mjez Połčnicu a wotpočnišćom Hornja Łužica pola Słoneje Boršće z awtom policajskej kontroli wuwinył a ćeknył, je sudnik Budyskeho hamtskeho sudnistwa do přepytowanskeje jatby tyknył. Kaž w nowinskim wozjewjenju rěka, jemu wumjetuja, zo je so ze swojim Renaultom zaměrnje na policista měrił. Tón móžeše so jeno z tym wuchować, zo nabok skoči. Nimo toho je młody muž na strašne wašnje do nadróžneho wobchada zapřimnył.
Prěnje indicije pokazuja na to, zo wobsteji zwisk mjez wohenjom wutoru rano w Połčnicy a nimale samsny čas so wotměwacej honjeńcu na awtodróze. Kriminalisća pak wobaj padaj hišće přepytuja. Předewšěm dyrbja zwěsćić, kak bě woheń dokładnje wudyrił a kotru rólu wodźer Renaulta při tym hraješe.
Identita dweju komplicow, kotrajž běštaj na ćěkanju z Renaulta wuskočiłoj a kotrejuž při pytanju namakali njejsu, dotal znata njeje. Tež w tymle padźe policija přepytuje.
Policija (29.06.16)
Dźiwja honjeńca po awtodróze
Połčnica/Słona Boršć. Po něhdźe 25 kilometrow dołhej honjeńcy za ćěkacym Renaultom je policija wčera rano jeho wodźerja nachwilnje zajała. Krótko po třoch chcychu zastojnicy w Pólskej přizjewjene awto kontrolować, šofer pak stupi na płun, wotjědźe z wulkej spěšnosću na awtodróhu a dale do směra na Zhorjelc. Sobujěducy w Renaulće mjetachu po puću bencinowe kanistry a dalše wěcy na jězdnju. Mjez Porchowskej horu a wotpočnišćom Hornja Łužica awto dwójce zasta, njeznatej wosobje z njeho wuskočištej a ćeknyštej do ćmy. Renault jědźeše dale a zasta skónčnje krótko do awtodróhoweho wotpočnišća Hornja Łužica. Tam da so 23lětny šofer bjez spřećiwjenja wot policistow zajeć. Po puću ćeknjenej wosobje je policajski helikopter hač do pózdnjeho dopołdnja podarmo pytał.
Policija (28.06.16)
Při grilowanju so ćežko zranił
Rakecy. Dokelž so gril prawje palić nochcyše, je 33lětny minjeny kónc tydźenja w Rakecach ze spiritusom trochu popomhać chcył. Při tym pak dóńdźe k sapacemu płomjenju, kotrež 28lětneho přećela mjezwoči trjechi a ćežko zrani. Jeho dyrbjachu do specialneje chorownje dowjezć.
