Policija (13.12.16)
Grafitije na budki mórali
Budyšin. Wjace hač 22 předawanskich budkow na Budyskich Wjacławskich wikach su njeznaći w nocy na wčerawšu póndźelu z grafitijemi popryskali. Při tym jedna so wo parole, kotrež policija lěwicarskemu spektrumej přirjaduje. Tež fasadu dweju bydlenskeju domow na te wašnje zanjerodźichu. Po wšěm zdaću wužiwachu skućićeljo při tym šablonu. Wěcnu škodu trochuja na 1 500 eurow. Kriminalna policija pad přepytuje.
Policija (12.12.16)
Na awtodróze drastu zběrał
Horni Wujězd. Dokelž bě so jeho třěšny wačok při jězdźenju wočinił, je wodźer Mercedesa sobotu připołdnju na awtodróze A 4 blisko Hornjeho Wujězda wjacore dźěle drasty zhubił. Wodźer na kromje jězdnje zasta a dočaka na policiju. Z jeje pomocu móžeše wón pozdźišo drastu zaso zezběrać.
Policija (09.12.16)
Na čerwjene bankowki kedźbować
Biskopicy. Při rozbuchnjenju pjenježneho awtomata w nocy na štwórtk w Biskopicach (SN rozprawjachu) su njeznaći něhdźe 100 000 eurow rubili. Při tym pak je barbowa patrona bankowki wočerwjeniła. Policija tuž prosy, na tajke z čerwjenej barbu woznamjenjene bankowki kedźbować. Štóž tajke poskićene dóstanje, njech informuje policiju.
Policija (08.12.16)
Wohroženje wujasnjene
Čorny Chołmc. Kriminalna policija je nětko wuslědźiła pad, kotryž sta so spočatk nowembra w Čornym Chołmcu. Tehdy hišće njeznaty muž bě 5. nowembra popołdnju při kasy nakupowanišća z pistoli podobnym nastrojom 55lětnu kasěrarku wohrozył. Muž bjez rubizny z kolesom ćekny. Předewšěm dźakowano wuprajenjam swědkow su kriminalisća 27lětneho bjezdomneho z Wojerec jako skućićela wuslědźili. Přepytowanja pak dale traja.
Policija (07.12.16)
Awto pokradnyć spytali
Kulow. W času wot njedźele popołdnja hač do póndźele ranja su njeznaći w Kulowje spytali, VW Caddy pokradnyć. Awto steješe na Hornčerskich wikach. Skućićeljo skóncowachu zamk, motor zaswěćić pak so jim njeporadźi. Na jězdźidle nasta něhdźe 200 eurow škody. Kriminalna policija pad přepytuje.
Policija (06.12.16)
Na lětanišću dźiwinu picowali
Klukš. Na startowej a přizemjenskej čarje Klukšanskeho lětanišća běchu njeznaći minjene tydźenje kukuricu a žito rozsypali. Tak přiwabichu woni dźiwinu, kotraž je tam wulke škody načiniła. Rozborkana čara woznamjenja za startowace a přizemjace lětadła wulki strach. Tohodla přizjewichu tónle pad nětko policiji. Ta přepytuje strašneho wobwliwowanja lětanskeho wobchada dla. Swědcy, kotřiž su snano něšto podhladneho wobkedźbowali, njech přizjewja so pod telefonowym čisłom 03591/ 35 60.
Policija (05.12.16)
Hala so wotpaliła
Wojerecy. Wšo druhe hač měrny druhi adwent mějachu wohnjowi wobornicy wčera nawječor we Wojerecach. W industrijowej kónčinje bě woheń w prózdnej, 15 króć 30 metrow wulkej hali wudyrił. Jako wobornicy přijědźechu, běchu so płomjenja hižo po wšej hali rozpřestrěli. Dokelž twarjenje hižo wuchować njemóžachu, so woni rozsudźichu ju pod kontrolu wotpalić dać. Strach za wobydlerjow při tym žadyn njewobsteješe. Zasadźenych bě dohromady 15 wohnjowobornych jězdźidłow z wjace hač 50 kameradami z Wojerec, Hórnikec a Ćiska. Kelko škody je woheń načinił, njehodźi so hišće rjec. Kriminalna policija za přičinami slědźi. Dźensa bě fachowc wohnjoweje wobory na městnje, zo by za móžnymi slědami pytał.
Policija (02.12.16)
Jěžikej žiwjenje wuchowała
Budyšin. Nic jenož jako přećel a pomocnik ludźi we wšitkich žiwjenskich połoženjach, ale tež zwěrjatow je so policija tele dny w Budyšinje wopokazała. Zbožo w njezbožu měješe tule zawčerawšim popołdnju jěžik. Po tym zo bě wón po wšěm zdaću swoju mać zhubił, namaka jeho wječor policistka Budyskeho policajskeho rewěra na Seminarskej, jako bě runje po swjatoku na dompuću. Zastojnica jěžikej žiwjenje před sněhom a zymu wuchowa. Po jednej nocy w ćopłym, zastaraneho ze synom a picu za kóčki, dowjezechu kałačikateho štyrinohača do zwěrjatku wotpowědneho domicila w Biskopicach, hdźež móže nětko bjez stracha přezymować.
Policija (01.12.16)
Do jelenja zrazyła
Brězowka. 29lětna wodźerka VWja bě zawčerawšim na dróze z Brězowki do Běłeje Wody po puću, jako krótko do 18 hodź. jeleń na puć stupi. Młoda žona njemóžeše hižo zaborzdźić a zrazy do wulkeho skoćeća. Na awće nasta nahladna škoda 3 000 eurow. Jeleń zražku z wosobowym awtom njepřežiwi, šoferka so na zbožo njezrani.
Policija (30.11.16)
Awtowe kolesa w mobilu našli
Přiwčicy. Dobry čuch měješe póndźelu wječor zhromadna skupina sakskeje a zwjazkoweje policije, jako kontrolowaše na awtodróhowym parkowanišću při A 4 blisko Přiwćic w Litawskej přizjewjeny bydlenski mobil. W nim namakachu dohromady 60 zdźěla nowe kompletne awtowe kolesa w hódnoće něhdźe 20 000 eurow. Z camperom jěducaj mužej w starobje 33 a 42 lět njemóžeštaj rjec, zwotkel kolesa mataj. Po wšěm zdaću běštaj je něhdźe pokradnyłoj. Kriminalna policija pad nětko přepytuje.
