Budyšin (SN). Kupcy měli so na to nastajić, zo wostanje Budyska Serbska kulturna informacija wot 30. awgusta do 22. septembra zawrjena. Před wjace hač dźesać lětami běchu rumnosće posledni króć ponowili. Tež techniskich přičin dla je tuž načasu SKI modernizować.

Dalše wjelče šćenjata

Rěčicy (SN). Kónc julija Rěčičanski wjelči běrow wozjewi, zo su w dźewjeć dalšich sakskich wjelčich kónčinach „reprodukcije dopokazali“. Tak móžachu mjez druhim we łužiskej jězorinje, pola Niskeje a blisko Róžanta šćenjata fotografować.

Nowa software we VVO

Budyšin (SN). Kupcowski serwis wob­cha­dneho zwjazka Hornje Łobjo (VVO) wužiwa hižo poł lěta nowy program, zo by napra­šowanja, pokiwy, kritiki a pady garantije pasažěram lěpje wobdźěłać móhł. Po přewšo dobrych nazhonjenjach planuje VVO zhromadnje ze 14 předewzaćemi zwjazka, program dale rozšěrić.

Wopička so narodźiła

Mały Wjelkow (SN). Přewšo raduja so ludźo, a to nic jeno z Hornjeje Łužicy, nad pisanym kulturnym lěćom w Małowjelkowskej sotrowni. „Třinaće derje wopytanych zarjadowanjow z hudźbu a reju smy hižo wotměli. Ze stilistiskej a wobsahowej mnohostronskosću zbudźichmy tójšto wjesela“, praji hłowny organizator Mike Salomon. Hač do 10. septembra planuja w Małym Wjelkowje hišće 15 zarjadowanjow.

Prěnju stwu sej wobhladać

Kamjenc (SN). W nowym Kamjenskim centrumje seniorow AZURIT z nutřkownymi dźěłami zaměrnje pokročuja. Dom chcedźa spočatk septembra wotewrěć. Zajimcy móža sej hižo prěnju mustrowu stwu wobhladać. Přichodnje chcedźa seniorow w hladanskim srjedźišću w 94 stwach z jednym a jědnaće z dwěmaj łožomaj­ zaměstnić. Dalokož móžno budu sej tež swójske meble sobu přiwjezć móc. Wšitkim ma so tam přijomne bydlenje w swójbnej atmosferje zmóžnić.

Budyšin (SN). Něhdźe połsta młodych čitarjow je so w Budyskej dźěćacej a młodźinskej bibliotece za knižne lěćo Sakskeje přizjewiło. Woni mnohostronski poskitk lektury wužiwaja a pilnje čitaja. Hač do 11. awgusta je hišće chwile, so z klubowym čłonom stać. Wulki zakónčacy swjedźeń, hdźež dóstanje kóždy wobdźělnik za tři čitane knihi certifikat, budźe 8. septembra. Wšitcy za knižne lěćo přizjewjeni dóstanu wot biblioteki wosobinske přeprošenje na swjedźeń. Knižne lěćo Sakskeje je prózdninska akcija sakskich zjawnych bibliotekow za zajimcow w starobje jědnaće do 16 lět.

Za tolerancu płuwać

Wojerecy (SN). Město Wojerecy pohosći 30. septembra wobdźělnikow zarjadowanja „Płuwać za demokratiju a tolerancu – Sym pódla“. Iniciator sportoweho zarjadowanja je Swobodny stat Sakska. Kónc julija přepodachu Wojerecam a tamnišemu wyšemu měšćanosće Stefanej Skorje (CDU) pućowanski pokal. „Sym sej wěsty, zo tež lětsa w našim měsće z tohole zarjadowanja we Łužiskej kupjeli jasne znamjo za swobodnu, demokratisku a swětej wotewrjenu towaršnosć wuchadźa“, Skora wuzběhny.

Budyšin (SN). Wot dźensnišeho płaća we wobchadnym zwjazku Hornje Łobjo (VVO) nowe płaćizny. Pola jednotliwych jězdźenkow a dnjowych kartkow so ničo njezměni. Přerěznje pak stupaja płaćizny wo 1,9 procentow. Přičina su kóšty za material a personal, štož njehodźi so z płaćiznami ćěriwa wurunać.

Socialne poradźowanje

Wjazońca (SN). Zapósłanc Lěwicy w Sakskim krajnym sejmje a wokrjesneho sejmika, prawiznik Hajko Kozel, přeproša na darmotne socialne poradźowanje. Zhromadnje z prawiznikom Gregorom Janikom, kiž je w socialnym prawje wosebje wobhonjeny, móže wón pomhać při rozrisanju problemow, kotrež so husto w socialnych prašenjach jewja, kaž na přikład nastupajo Hartz IV. Poradźowanje je jutře, 2. awgusta, wot 15 hodź. do 17 hodź. w Domje młodźiny na Lěsnistwowym puću 5 we Wjazońcy.