Z keramiku dźěłać
Wulka Dubrawa. Spěchowanski kruh za serbsku ludowu kulturu je keramisku dźěłarničku přihotował. Krótkodobni zajimcy zetkaja so jutře, 6. meje, w 9.30 hodź. w něhdyšej Margarećinej hěće we Wulkej Dubrawje. Nawod změje Jadwiga Lešawic, tema su serbske baje. Kóždy zapłaći swójski přetrjebany material a přinjese sej něšto k jědźi sobu.
Swjeća na šulskim dworje
Worklecy. Zakładna a wyša šula „Michał Hórnik“ Worklecy přeprošatej tež lětsa zaso wšitkich wobydlerjow a hosći na swój tradicionalny dworowy swjedźeń. Wón wotměje so pjatk, 12. meje. Po zwučenym wašnju zahaja jón w 17.30 hodź. z mejemjetanjom. Holcy chcedźa zaso w serbskej narodnej drasće wokoło mejki rejwać. Slědujetej bjesada a zabawa, na kotrejž poruča jednotliwe rjadownje zaso najwšelakoriše kulinariske chłóšćenki a so na wopyt wjesela.
Žohnuja motorske
Ralbicy. Popołdnjo z požohnowanjom motorskich zahaji so njedźelu, 7. meje, w 14 hodź. z nyšporom w Ralbičanskej cyrkwi. Přizamknje so zhromadny wulět.
Rostliny sej wuměnjeć
Porěči wo Pückleru
Lipsk. We wobłuku Lipšćanskeho serbskeho nalěća 2017 wotměja so we wulkoměsće wjacore zarjadowanja ze serbskej a mjeńšinowej tematiku. Jedne budźe jutře, štwórtk, w 17 hodź. w Europskim domje (Markt 10). Tam porěči Werner Měškank wo wjerchu Pückleru a jeho poměrje k Serbam. Wšitcy zajimcy su wutrobnje přeprošeni.
Za jězbu so přizjewić
Ramnow. Lětuša Ramnowska hrodowa kołojězba konjacych zapřahow wotměje so njedźelu, 21. meje. Za jubilejnu 20. kołojězbu planuja organizatorojo jěchanskeho towarstwa Hufnagel wosebitu čaru. Start a cil budźetej před kulisu Ramnowskeho barokneho hrodu. Čara powjedźe wottam přez Biskopicy skład- nostnje 790lětneho wobstaća města. Připołdniša přestawka budźe při Steinaskim lěsnym hosćencu „Zur Finke“. Jězdźerjo zapřahow móža so hač do 14. meje pola Reginy a Andreasa Mikus z jěchanskeho towarstwa Hufnagel pod telefonowymaj čisłomaj 03594/ 701 365 abo 0171/ 78 92 481 přizjewić. Wuraznje su tež wodźerjo zapřahow z wukubłanymi konjemi ze serbskich wsow namołwjeni so na kołojězbje wobdźělić. Dalše informacije pod www.reitverein-hufnagel.de
Orchester so předstaji
Spominaja na dr. Stübnera
Budyšin. We wulkim domje NěmskoSerbskeho ludoweho dźiwadła wotměje so wutoru, 9. meje, w 16 hodź. wopominanska swjatočnosć za njedawno zemrěteho dr. Franka Stübnera. Kaž wotrjad za zjawnostne dźěło NSLDź zdźěli, su wšitcy přeprošeni, kotřiž su dr. Franka Stübnera na jeho žiwjenskim puću zetkali. Zhromadnje chcedźa so na njeho wosobinsce, literarnje a hudźbnje dopominać.
Sportowy kurs za žony
Ralbicy. Sportowu hodźinu za žony a holcy poskićuje wotnětka Ralbičanska fyzioterapeutka Sylwija Šołćina. Zajimowane žony su přeprošene kóždy štwórtk wot 20 do 21 hodź. do Ralbičanskeje sportownje.
Jutře koncertuja
Zhorjelc. W Smochčanskim Domje biskopa Bena wotměchu so tele dny dźěćace chórowe dny Zhorjelskeho a Drježdźansko-Mišnjanskeho biskopstwa. Zwučowanje zakónči so z koncertom pod hesłom „Hudźba je barba po notach“ jutře, sobotu, w 15 hodź. w něhdyšej Zhorjelskej synagoze.
Wopominanje při pomniku
Wjelk zaso „po puću“ był
Debsecy (SN). Swójba Heinza Kalleyja w Debsecach (Großdöbschütz) pola Hornjeje Hórki je zrudna, dokelž je jej jutry póndźelu wjelk tři měsacy stare jehnjo a tři lěta staru maćernu wowcu zakusał. Wšako so Heinzecy wosrjedź wjeski wjelka njebojachu a při Sprjewinej kolesowarskej šćežce dwě skoćeći plahowachu. Mnozy so wuchodźowace dźěći jehnjo rady majkachu, dokelž tam wosebity płót njebě. Tola póndźelu susodźa zrudni zwěsćichu, zo běštej wowcy mortwej. „W politice ma so k temje wjelk něšto činić, takle dale njeńdźe“, so Heinz Kalley hněwa.
Při haće sej punty wotběhali
Zjawna generalka
Budyšin (SN). Aktualnu delnjoserbsku inscenaciju Jurja Kocha „Sergej“, kotraž změje 21. apryla w Hochozy premjeru, móža sej zajimcy na zjawnej generalce w Budyšinje wobhladać, a to štwórtk, 20. apryla, w 19.30 hodź na probowym jewišću 2. Zastup je darmotny. Přihladowarjo njech wužiwaja jewišćowy zachod wulkeho domu NSLDź na Seminarskej.
Nowe pućowanske hěty
Bóšicy (SN). W Bóšičanskej gmejnje budu wosom nowych pućowanskich hětow nastajić. Kaž wjesnjanosta Stanij Ryćer (Rjemjesło Bóšicy) praji, je regionalne předewzaće hěty sponserowało. Prěnja hižo steji, tamne chcedźa hač do kónc meje nastajić. Tež stara wodarnja na Horje dóstanje nowe městno k podstajenju.
Fararka woteńdźe
Wojerecy. Wjelelětna fararka ewangelskeje wosady Wojerecy-nowe město Antje Kruse-Michel wosadu kónc apryla wopušći. Kaž nawodnistwo wosady zdźěli, nastupi wona 1. meje farske městno dušepastyrki we Wojerowskim jězorinowym klinikumje. Rozžohnowanska bohosłužba w Domje Martina Luthera Kinga ze superintendentom dr. Thomasom Koppehlom budźe njedźelu, 7. meje, w 14 hodź.
We wopomnišću rozmyslować
Budyšin. Pjatk, 14. apryla, wotměje so w Budyskim wopomnišću znowa mjeztym hižo tradicionalne ćichopjatkowne rozmyslowanje. Wot 10 hodź. chcedźa tam na wosud woporow diktaturow 20. lětstotka spominać. Na to Smochčanski Dom biskopa Bena hromadźe z Budyskim wopomnišćom wšitkich zajimcow wutrobnje přeproša. Přizjewjenje trěbne njeje, zastup do wopomnišća je darmotny.
Nowa putniska hospoda
Rěčna hodźina raz hinak
Budyšin. Nawjazujo na swoju prěnju rěčnu hodźinu pod hołym njebjom loni w septembru chcedźa čłonojo Budyskeje měšćanskeje rady tule formu rozmołwow z wobydlerjemi přichodnje časćišo wužiwać. „Na te wašnje chcemy ludźom zmóžnić, zo z radźićelemi direktnje do rozmołwy přińdu“, praji zastupowacy šef frakcije CDU Patrick Höhne. Přichodna tajka rěčna hodźina pod hołym njebjom budźe srjedu, 12. apryla, wot 15 do 18 hodź. na Žitnych wikach.
Po zwěrjencu so rozhladować
Wojerecy. Na dojutrowne wodźenje přeprosy Wojerowski zwěrjenc ćichi pjatk. W 10 a w 14 hodź. poskića zajimcam składnosć, so wot fachowcow po zwěrjencu wodźić a sej nowosće rozkłasć dać. Wobdźělnicy mjez druhim zhonja, kotrych nowych wobydlerjow maja w tropowym domje a kak nowa připrawa za kenguruwy wupada. Nimo toho wotmołwjeja fachowcy wězo tež na prašenje, kotre zwěrjata w coowje jeja lahnu.
Nowe wusyłanje
W muzeju jejka debić
Wobchad rjadowany
Budyšin. Nowe rjadowanja wobchada a parkowanja płaća wot dźensnišeho w Budyskej wokrjesnej chorowni. Wopytowarjo a wuchowanske kaž tež transportne jězdźidła maja nětko jenož hišće wot hłowneho zachoda na Behringowej přijězd. Tam móžeš tež direktnje do parkowanskeho domu jěć. Za parkowanje dyrbi so zasadnje płaćić, a to za prěnju započatu hodźinu 50 centow a za kóždu dalšu započatu hodźinu euro. Cyły dźeń płaći maksimalnje pjeć eurow. Štóž chce přiwuznych přiwjezć abo jich wotewzać, móže tež z Měšćanskeho nasypa do chorownje jěć. Wujězd pak je jeničce na Behringowu móžny. Parkować na terenje chorownje je jenož na za to wupokazanych městnach dowolene.
Wo wandrowskim zahorjeni
Ćisk (mka/SN). Wjace hač 80 Ćišćanow a jich hosći zezna minjeny pjatk we wobłuku „Ćišćanskeho wotewrjeneho wokna“ tamnišeho kulturneho towarstwa Franca Čornaka z Chrósćic. Bywši wandrowski rozprawješe wo swojich dožiwjenjach w dalokim swěće a wo tym, kak bě tři lěta přiwšěm ze swojej swójbu a ze serbskej domiznu zwjazany.
Radźićeljo so schadźuja
