AWO rozpušći Witaj-skupinu

Bukecy. Witaj-skupinu Bukečanskeje pěstowarnje „Sonneneck“ z dźewjeć dźěćimi, kotraž je w nošerstwje Dźełaćerskeho dobroćelstwa (AWO), najebać spěchowanje rozpušća. Holm Natschke z AWO Budyšin skedźbni na rozmołwy z Domowinu a Rěčnym centrumom Witaj wo tym. Starši z regiona a Serbske ewangelske towarstwo rozsud, wo kotrymž chce AWO dźensa oficielnje informować, wotpokazuja.

Z nowym nawodnistwom

Pančicy-Kukow/Kulow. Z nowym šulskim lětom 2024/2025 matej zakładna šula „Ćišinskeho“ w Pančicach-Kukowje a Krabatowa zakładna šula w Kulowje noweju nawodow. Aleksander Kozak přewozmje­ tónle nadawk w Pančicach-Kukowje a Mandy Salowsky w Kulowje. Wobaj staj do toho hižo we wučerskim kolektiwje skutkowałoj. Z tym wonaj prěni króć nowe šulske lěto zahajitaj.

Moderne stejišćo ma nastać

Wojerecy/Narć. W Druhej swětowej wójnje je njedaloko Wojerec, we wjesce Narć, kotraž je dźensa wjesny dźěl gmejny Halštrowska hola, jedne z najwjetšich lěhwow za wójnskich jatych a ćěkańcow na wuchodźe Němskeje było. Wojerowski muzej přeprosy njedźelu, 4. awgusta, w 11 hodź. na zjawne wodźenje wo stawiznach lěhwa Elsterhorst. Zajimcy njech přizjewja so hač do soboty pod telefoniskim čisłom 03571/20937500. Wjedźenje traje połdra hodźiny a płaći pjeć eurow, potuńšene tři eura. Zetkanje za wodźenje je při sakskej Krajnej šuli za wohnjowu woboru a škit před katastrofami, Puć swj. Floriana 1 w Narću.

Wodočisćernju w Němskich Pazlicach po planje dotwarili

Němske Pazlicy (SN/MiR). Modernizacija a rozšěrjenje wodočisćernje we Kamjenskim měšćanskim dźělu Němske Pazlicy běše nuznje trěbna. Wšako je hospodarske stejnišćo Njedźichow přez wopłóčkowy wodowód na wodočisćernju w Němskich Pazlicy přiwjazana. A tuž bě rozšěrjenje kapacity trěbne. Wčera bu připrawa, kotraž so wot nětka wužiwać smě, přepodata. Z tym njeje dodźeržana a lědma wukonliwa wodočisćernja w Nadróznej Hrabowce hižo trěbna.

Rozšěrjenje zaruča nětko postupowace hospodarske wuwiće na industrijowych a přemysłowych arealach w Nadróznej Hrabowce kaž tež powjetšenje industrijowych a přemysłowych arealow we Kamjencu a Rušicy. Wodočisćenska připrawa bě so wot 27 000 na 41 000 přetrjebarjow rozšěriła. Nětko je nadźija wulka, zo so dalše firmy w regionje zasydla.

We łužiskich wsach běchu stajnje hižo najwšelakoriše rjemjesła zakótwjene a su so zdźěla lětstotki zachowali. Dźensa je so wulki dźěl z tychle rjemjesłow bohužel pozhubił. W našej lětnjej seriji chcemy wobswětlić, hdźe běchu kotre rjemjesła doma a kotre wosebitosće su so při tym wobkedźbowali. (16)

Kaž w mnohich wsach našeje domizny je tež w Minakale kowarnja była, kotraž bu w lěće 1860 jako prěnja wuwučowanska kowarnja w Němskej natwarjena. We wobšěrnej chronice Minakała su wšě plany tehdy natwarjeneje kowarnje zachowane. Dokładnje podate su w nich městna za składowanje železa a druheho trěbneho materiala, hdźe maja stać kachle ze štyrjomi městnami za woheń a hdźe kowadła. Hdyž dorěčachu sej kupcy z kowarjom nadawk, bě za to mały běrow předwidźany. Po nic runje lochkim dźěle měješe so tež tehdy hižo hygiena dodźeržeć. Tuž bě planowar zdobom na rumnosć za duše myslił.