Domizniski muzej pomjatk wsy
Wulke a mjeńše muzeje, domizniske stwy a njewšědne wustajenišća zbližuja zajimcam zajimawostki najwšelakorišeho razu. Z lětušej lětnjej seriju někotre z nich kaž tež za kulisami skutkowacych akterow předstajamy. (2)
Krótkopowěsće (18.07.24)
Nawod přechodnje rozrisali
Smjerdźaca. Wuměłski nawod Serbskeje rejowanskeje skupiny Smjerdźaca je přechodnje zaručeny. Kaž choreograf Kornel Kolembus našemu wječornikej wopodstatni, přewozmje wón hromadźe z mandźelskej Yuliyju nadawk hač do jubileja ćělesa lětsa nazymu. Štó so po tym wo nawod stara, hišće jasne njeje. Po 30 lětach w funkciji bě so Dieter Wendisch do prózdnin ze skupinu rozžohnował.
„Puć sławy“ nowe rjaduja
Choćebuz. Město Choćebuz „Puć sławy“ před radnicu na Nowym torhošću rozšěri. Dotalne plakety za dobyće medaljow při olympiji resp. Paralympiskich hrach znowa rjaduja, zo bychu městno měli za dalše na přichodnych hrach. Aktualnje je tam 67 docpětych medaljow z lět 1896 do 2021 zwěčnjenych.
Nawrót žadnych koni
Do Smolerjec kniharnje
Budyšin. Nakładnistwo Drava Celovec a Serbski institut přeprošujetej jutře, štwórtk, na prezentaciju knihi „Zmij Direnda, Hica mica, Zmijiček Direndaj, Zmij Ararat a powědančka wo nimi“ w Smolerjec kniharni. Milenka Rječcyna, kotraž je original Loizy Wiesera zeserbšćiła, předstaji w 19 hodź. „sep powědančkow, kotrež su před wjac hač dwaceći lětami při wječornym bajebaću za dźěći nastali“.
Mineralijowa bursa
Hórnikecy. Wobwodna skupina Towarstwa přećelow mineralogije a geologije we wuchodnej Sakskej přeprošuje wopytowarjow wutrobnje na 19. Łužisku bursu mineralijow, kotraž wotměje so lětsa 17. awgusta na ležownosći Energijoweje fabriki w Hórnikecach. Zběraćeljo mineralijow a fosilijow zbliska a zdaloka tu swoje „drohoćinki“ wustajeja. Zarjadowarjo nadźijeja so čiłeje wuměny nazhonjenjow mjez zběraćelemi kaž tež zajimowanymi. Woni su so tež wo dźěćacy program z wumywanjom złota, wudobywanjom drohotnych kamjenjow a z wobdźěłanjom mineralijow postarali.
101. Serbske blido w Choćebuzu
Ratarski zawod w Lejnje wopytała
Policija (17.07.24)
Zabłudźena čorna wowca
Łuty. Wot póndźele popołdnja błudźi so ćeknjena čorna wowca kołowokoło wjeski Łuty (Lauta). Swědk je zwěrjo na parkowanišću nakupowanskich wikow při tym wobkedźbował, kak wone zas a zaso do sćěny wobchoda bodźeše. Jako policija dojědźe, běše so wowca hižo do směra Wuchodneje dróhi zminyła. Nimale tři hodźiny pozdźišo wuhladachu swědkojo zwěrjo podłu železniskich kolijow mjez Čornym Chołmcom a Wojerecami. Němska železnica je wobchad na čarje tohodla přechodnje wobmjezowała. Dalši swědk wuhlada wowcu pozdźišo při skale w Čornym Chołmcu. Po tym přebytk zwěrjeća hižo znaty njeje. Wojerowska policija prosy wo pokiwy pod tel. čo. 03571 4650.
Knižnu polcu wobohaćić
Najskerje móža bórze w Slepom młodźinski klub zaso wožiwić
Slepo (AK/SN). Slepjanski wjesnjanosta Jörg Fund (CDU), nadźija so na wožiwjenje młodźinskeho kluba we Slepom. To zwurazni komunalny politikar w swojim přinošku w aktualnym hamtskim łopjenu Slepjanskeje gmejny. Wón wuzběhuje, zo prócuje so gmejna z dalšimi partnerami wo wožiwjenje młodźinskeho kluba. Přeće za tym su mnozy wobdźělnicy hižo na konferency dźěći a młodostnych w juniju lěta 2022 wuprajili. „Bohužel so tehdy młodostni přizjewili njejsu, kotřiž bychu nawodnistwo kluba přewzali“, Jörg Funda zwurazni.
„Najlěpši skótny lěkar NDR“
We Wósporkskim muzeju „Stara poprjancarnja“ su kónc junija wosebitu wustajeńcu wo zasłužbnym weterinarnym medicinarju, dr. Huberće Spieleru, składnostnje stolětneje róčnicy lěkarskeje praksy wotewrěli.
Wóspork (SN/MiP). W tutej wosebitej wustajeńcy předstajeja žiwjenje a skutkowanje weterinarneho rady dr. Huberta Spielera, kotryž je po studiju na třoch wysokich šulach před 100 lětami skótnolěkarsku praksu we Wósporku załožił a hač do lěta 1960 wobhospodarił. Naposledk je hač do 1964 jako nawjedowacy skótny lěkar w Mišnjanskej staciji za wosymjenjenje dźěłał, kotraž nawjedowaše a dohladowaše plahowanje wužitneho skotu w tehdyšim wobwodźe Drježdźany. Za swoje zasłužby jako praktiski skótny lěkar, kiž bě tež na polu veterinarno-medicinskeho slědźenja aktiwny, bu dr. Hubertej Spielerej w lěće 1961 titul weterinarneho rady spožčeny.
Wólbny bój – arena, pjenjezy, wjelki a wulke sony
Pančicy-Kukow (SN/MG). Zo je kandidatka CDU za wólby do krajneho sejma, Elaine Jenčec, swój wólbny bój zahajiła, to je nanajpozdźišo potom jasne, wuhladaš-li jeje transporter z wulkim popisom a jeje wobličom. Tutón transporter steješe wčera na dworje klóštra Marijina hwězda w Pančicach-Kukowje. Tola njeje tam jenož Jenčec, ale tež jeje předchadnik Alojs Mikławšk a jako wosebity hósć, statny minister za regionalne wuwiće, Thomas Schmidt (wšitcy CDU). Wón je přijěł, zo by so wo pokročowanju projekta „Pa-Ku – Kommunikations-ARENA“ informował. Za tutym dosć wulkim titulom chowaja so twarske dźěła wosrjedź wsy. Tam su w zašłych tydźenjach a měsacach mjez druhim hrajkanišćo a pawiljonaj nastali.
Krótkopowěsće (17.07.24)
Sakska kampanja za dialekty
Drježdźany. Z nowej kampanju za dialekty zhladuje třěšna marka „So geht sächsisch“ na wšelake narěče w Sakskej. Z hesłom „Saksce za wšěch“ nawjazuje kampanja na wuwiće, kotrež móžemy sakski dialekt nastupajo wěsty čas hižo w socialnych medijach wobkedźbować. Zajimcy móža pod pjeć rěčnych rumow zeznawać, tež hornjołužiski na wuchodźe.
Nowe noty Krawca a Mětška
Budyšin. Załožba za serbski lud a spěwar Roland Hein staj nowej partiturje wudałoj. „Zybol woheń duje“ je spěwny cyklus za bariton a klawěr, kotryž bě tehdy 13lětny Juro Mětšk skomponował. „Lumir“ za samsnu wobsadku je rewidowana wersija krucha Bjarnata Krawca. Hein a pianist Hiroto Saigusu chcetaj jej kónc septembra w Budyskim Serbskim muzeju premjernje předstajić.
Wjelk wulku škodu naparał
Kulturna sonina nowa posołka rěče a kultury
Jako „serbska kulturna sonina“ dźěła wotnětka Marion Kwicojc we wokrjesu Dubja-Błóta. Nadawk z Bórkowow pochadźaceje wuměłče je, dźěćom a dorosćenym serbsku rěč a kulturu zbližić. To krajnoradny zarjad w Lubinje zdźěla.
Lubin (SN/at). We wokrjesu Dubja-Błóta chcedźa nastupajo serbsku rěč a kulturu wobstejace aktiwity w sydlenskim rumje z tradicionalnymi hódnotami wobohaćić a kompetencu w serbskej rěči spěchować. Ideju „serbskeje kulturneje soniny“ stej Šula za delnjoserbsku rěč a kulturu z nawodnicu Utu Henšelowej a wokrjesna społnomócnjena za naležnosće Serbow, Sabrina Kuschy, zrodźiłoj.
