Wotrow (PDź/SN). Něhdźe dwaceći zajimcow přichwata pjatk do Wotrowskeje stareje šule na čitanje z knihi „Prěni raz“. Antologija krótkopowědančkow je loni nazymu w Ludowym nakładnistwje Domowiny wušła. Lektorka Weronika Žu­rowa bě spočatk oktobra hižo premjerne čitanje z Annamariu Zahonowej a Měrćinom Wjenkom we Worklecach organizowała. Wonaj staj dwaj z dźesać awtorow, kotřiž su ze swojimi tekstami k nastaću antologije přinošowali.

W zašłych měsacach podachu so zamołwići LND a awtorojo wjacore razy do šulow na čitanja, wšako měri so zběrka přewažnje na młodźinu. „Dźensa dopołdnja pobychmoj hižo z Lubinu Hajduk-Veljkovićowej na Ralbičanskej wyšej šuli. Tamnišim šulerjam 8. lětnika so stawiznički spodobachu“, Weronika Žurowa pjatk we Wotrowje wuzběhny. „Ćim bóle so wjeselu, zo staj so Sylwija Šěnowa a Pětr Dźisławk zwólniwaj wuprajiłoj, swojej tekstaj dźensa zjawnje předstajić.“

Koleso tank wobškodźiło

Budyšin. Njeznaty wodźer wosoboweho awta je sobotu na awtodróze A 4 mjez Budyšinom a Wósporkom zepěranske koleso swojeho připowěšaka zhubił. Za nim jěduca 44lětna wodźerka nakładneho awta je tole přepozdźe spóznała a přez koleso zajědźe. Při tym bu tank jězdźidła wobškodźeny, tak zo diesel wuběža. Wohnjowi wobornicy tank prowizorisce zalěpichu. Specialna firma dyrbješe nakładne awto wotwlec. Škoda wučinja něhdźe 500 eurow.

Rakecy (JK/SN). Rakečanska gmejna je dóstała z budgeta za „Komunalnu energiju a klimu“ Swobodneho stata Sakskeje připokazanku we wobjimje 20 000 eurow. Pozadk připokazanki wujasni wjesnjanosta Swen Nowotny (CDU) na zašłym posedźenju gmejnskeje rady z tym, zo je Zwjazk krajam přepodał pjenjezy za komunalne projekty nastupajo energiju a klimu. Sakska dósta z toho budgeta dwaj milionaj eurow. Połojca toho nałožuja za nadawki kraja, tamnu połojcu rozdźělichu na komuny. Z tym je tež ­Rakečanska gmejna něšto dóstała. Mjenowana suma hodźi so aktualnje do instalacije fotowoltaikoweje připrawy na třěše Rakečanskeje radnicy inwestować. Radźićeljo tele postupowanje jednohłósnje schwalichu.