Policija (28.03.24)
Dweju paduchow lepili
Kamjenc. Hnydom dweju paduchow su wutoru w Kamjenskej kupnicy lepili. Dopołdnja spytaše 39lětny Uzbeka słódčizny w hódnoće 75 eurow pokradnyć. Přistajeny kupnicy tole wobkedźbowaše a muža hromadźe z kuražěrowanym kupcom zadźerža. Podhladny so wjacore razy wutorhnyć spyta a woběmaj z namocu hrožeše. Jimaj pak so poradźi, jeho tak dołho kruće dźeržeć, doniž policija njepřijědźe. W druhim padźe je popołdnju 35lětny pólski staćan spytał, kofej w hódnoće 140 eurow pokradnyć. Tež jeho při tym wobkedźbowachu a zadźeržachu, jako chcyše kupnicu bjez zapłaćenja wopušćić. Zastojnicy Kamjenskeho policajskeho rewěra we woběmaj padomaj wotpowědne wozjewjenja wupisachu. Kriminalisća padaj přewzachu.
Přihot na jutry
Starožitnosće znowa wotkryć
Budyšin. Twjerde a papjerjane pjenjezy, medalje, wuznamjenjenja, pohladnicy, literatura, listowe znamki a wšo móžne dalše, štož ludźo zběraja, steja w srjedźišću jutrowneje bursy zběrarjow w Budyšinje. Wona wotměje so sobotu, 30. měrca, wot 9 do 14 hodź. w Serbskim domje. Tam móža so zajimcy poradźować dać a smědźa parkowanišćo na dworje Serbskeho domu darmotnje wužiwać.
Józef Brězan najlěpje hrał
Radwor. Škotowarka a 27 škotowarjow je so wutoru na škotowym turněrje serbskich seniorow w Radworskim hosćencu „Meja“ wobdźěliło. Najlěpje hrał je Józef Brězan, kiž doby z 2 658 dypkami před Eberhardom Kroschkom (2 459) a Manfredom Höraufom (2 313). Wšitcy třo steja tohorunja na čole cyłkowneho hódnoćenja, kotrež nawjeduje E. Kroschk před J. Brězanom a M. Höraufom.
Stawizniska přehladka
Złoty jubilar z nowačkomaj
Po zwučenym wašnju nastaji so jutrowničku dźewjeć serbskich křižerskich procesionow na puć do susodneje wosady, zo bychu poselstwo wo Zrowastanjenym wozjewili. Runje tak z wašnjom je, zo podawamy do toho přehlad wo zajimawosćach procesionow. Te su nam jich kantorojo a nawodźa sposrědkowali. Dalokož su nam znate, wozjewjamy tež mjena jubilarow a nowačkow.
Bjez jeničkeho nowačka w swojich rjadach pojěcha Budyski křižerski procesion njedźelu dopołdnja do Radworja. Kaž kantor Bosćij Čórlich zdźěli, drje je to prěni raz scyła po wozrodźenju procesiona, zo žanoho křižerja ze zelenym wěnčkom njezměja. Za to pak pojěcha z Lucianom Kaulfürstom slěborny jubilar sobu do Radworja. Mału změnu wuhladamy na čole procesiona, hdźež tónraz Stefan Šefer ze Zdźěrje Horjestaće ponjese a tak za druheho křižerja zaskoči.
Žane změny porno tomu njezměja Baćońscy křižerjo, informuje zamołwity tamnišeho procesiona Hrjehor Mark. Mjez nimi budźe Julius Woko jenički nowačk. Syman Woko a Pětr Mark změjetaj slěborny wěnčk při sukni přityknjeny.
Tonda swójbnu tradiciju dale wjedźe
W mnohich swójbach je minjene tydźenje doma za wóskom wonjało, dokelž su tam jutrowne jejka debili. Často so wjacori w swójbje tutej zaběrje wěnuja. Tak je to tež pola Kašporec w Židźinom.
Židźino (JoS/SN). Nic jenož ćichi pjatk, kaž bě to něhdy z wašnjom, ale hižo tydźenje do jutrow w Kašporec swójbje w Židźinom jejka debja. Najmłódši při tym je jědnaćelětny syn Tonda, kiž so tutomu wuměłstwu runje tak kaž jeho sotře Emilia (18) a Elea (15) wěnuje. Wonej stej hižo w knize wo jutrownych jejkach Serbskeho muzeja zastupjenej. Tehdy bě Tonda hišće mały pjerach. Mjeztym wón hižo tři lěta jejka debi a je sej při tym wobšěrne kmanosće přiswojił.
Jako Chróšćanscy křižerjo loni do směra na klóšter Marijinu ...
Stawnistwo za město a gmejnu
Zo njeby kóžda komuna wšitke jej napołožene nadawki spjelnić dyrbjała, dźěłaja města a gmejny we wěstych wobłukach hromadźe. To činitej nětko tež Budyšin a Hodźij.
Budyšin (CS/SN). Gmejna Hodźij a město Budyšin wutworitej zhromadny stawniski wobwod. To je Budyska měšćanska rada wčera jednohłósnje wobzamknyła. Susodna gmejna je so na sprjewine město z wotpowědnej próstwu wobroćiła, dokelž so tamniša stawnica na wuměnk poda. W gmejnach z mjenje hač 5 000 wobydlerjemi so njezadani, měć swójsku stawnicu abo swójskeho stawnika. Hodźij ma jenož něhdźe 3 000 wobydlerjow, štož woznamjenja jenož mało padow k wobdźěłanju. Dokelž je za městno stawnika kwalifikowany personal wuměnjenje, njemóža prosće dalši sobudźěłaćerjo zarjadnistwa zaskočić.
Krótkopowěsće (28.03.24)
Lemke myto Fallady přijała
Neumünster. Spisowaćelka a filmowča Grit Lemke je z lětušej lawreatku Hansa Falladoweho myta města Neumünster. Literarne, z 10 000 eurami dotěrowane wuznamjenjenje spožčichu jej za knihu „Kinder von Hoy“, z kotrejž „z dokumentariskej strózbotu wuwiće Wojerec wot modeloweho města NDR hač k politiskej radikalizaciji po lěće 1989 z kolektiwneje perspektiwy wotbłyšćuje“.
Nowy rěčny rum
Njebjelčicy. Serbske šulske towarstwo wutwori zhromadnje ze Serbskim Sokołom a ZARI w jutrownych prózdninach nowy serbskorěčny rum. Młodźi koparjo nabudu we wobłuku sportoweho projekta na sportnišćach w Njebjelčicach, Ralbicach a Chrósćicach serbskorěčne znajomosće wo woblubowanym sporće a swojim ćěle.
Helikoptery za Ukrainu
