Pěstowarnja gmejnu dale zaběra
Njeswačidło (UM/SN). Lěto 2024 steji w Njeswačanskej gmejnje runje tak kaž zašłe lěta cyle w znamjenju twara noweje pěstowarnje. Hinak pak hač wočakowane njeje so regionalny přewodźenski wuběrk za strukturnu změnu na swojim minjenym posedźenju w nowembru 2023 z tymle projektom zaběrał. „Dyrbjachmy podłožki dale kwalifikować a dalše přidźěła zapodać“, rozłoži Njeswačanski wjesnjanosta Gerd Schuster (CDU).
Paralelnje k tomu wjedźechu planowanje hač k fazy 3, potajkim hač k planowanju naćiska dale, štož su mjeztym zakónčili. „Z tym mamy nětko dokładne ličby wo financowanju projekta“, wjesnjanosta wobkrući. Po dorěčenju z planowanskim běrowom a nawodnistwom pěstowarnje chcedźa swój projekt nětko w meji 2024 regionalnemu přewodźenskemu wuběrkej zapodać a lětsa nazymu prezentować. Po słowach Gerda Schustera je gmejna mjeztym wjace hač 300 000 eurow do planowanja inwestowała.
Na młode jutry su wčera w Radworju dźěći prěni raz k swjatemu ...
Krótkopowěsće (08.04.24)
Dale a wjace bioratarjow
Kamjenc. Trend ekologiskeho ratarjenja tež w Sakskej dale traje. Loni bě 12 procentow wjace zawodow ekologisce ratariło. Jich bě dohromady 810. Tež zawodow, kiž plahuja swój skót po ekologiskich principach, je lěto a wjace – dohromady 480. Mjez dohromady 4500 ratarskimi zawodami w Sakskej je nětko někak 11 procentow ekologiskich
Skóržba wuspěšna
Drježdźany. Krajne sudnistwo je skóržbje Budyskeho předewzaća Hentschke Bau přećiwo rešeršowacemu kolektiwej, kotryž zastupuje antifašistiski zwjazk VVN-BdA Sakska, tydźenja pjatk wopowědowało. Wšelake wuprajenja nastupajo prawicarske zmyslenje jednaćela Jörga Drewsa kaž tež sobudźěłaćerjow předewzaća so hižo wospjetować njesmědźa resp. dyrbja so w interneće zhašeć.
Statnik so z młodostnymi zetkał
Předstaji wuznamne wosobiny
Budyšin. Wuznamne wosobiny města Budyšina, po kotrychž su w sprjewinym měsće hasy pomjenowane, steja w srjedźišću wosebiteho wodźenja po Muzeju Budyšin njedźelu, 7. apryla, w 15 hodź. Muzeologa Hagen Schulz předstaji tele wosobiny, kotrež su na politiskim, towaršnostnym a kulturnym polu w zjawnosći skutkowali. Wodźenje poda tohorunja dohlad do padow, w kotrychž su hasy města přemjenowali.
Awtorka čita z knihi
Budyšin. Kniha Sabiny Bauer-Helpert „Johann Zautes Lebensfahrt“ steji w srjedźišću přichodneho zarjadowanja w Budyskej Smolerjec kniharni štwórtk, 11. apryla, w 19 hodź. Kniha je biografiski roman wo wosudźe hornjołužiskeho ewangelskeho Serba w 19. lětstotku. Z dokładnej rešeršu wo wšědnym dnju, kulturje a stawiznach rysuja so tež lokalne a regionalne podawki z časa sakskeho kralestwa.
Sportowy dom sej wobhladać
Kursy serbšćiny předwidźane
Kubłanski projekt LOVe w dźěłarnjach za zbrašenych zahajeny
Pančicy-Kukow (SN/MWj). Po loni zahajenych přihotach wot Europskeje unije spěchowaneho kubłanskeho projekta su wčera w klóštrje Marijinej hwězdźe předewzaće LOVe oficialnje zahajili. K tomu witaštej abatisa Gabriela Hesse a nawodnica dźěłarnje za zbrašenych Karin Ziesch delegaciju z pólskeho wokrjesa Złotoryja z krajnym radu Wiesławom Swierczyńskim na čole. Projekt ma powołanske kompetency ludźi z rozdźělnymi zbrašenjemi polěpšić a jich tak jako šansu za wuwiće regiona zrozumić. Jeho hesło poćahuje so na łaćonske přisłowo „Labor omnia vincit“ (Dźěło přewinje wšitko), štož woznamjenja, zo je dźěło za žiwjenske zbožo najwažniše.
Šulski puć přez zwjazkowu dróhu
Dźěći z Brězynki móžachu dotal na tym boku puća do šulskeho busa zalězć, kiž k wjesce pokazuje. Po jutrownych prózdninach to hižo móžno njebudźe. Starši a wjesna rada nochcedźa so z tym wotnamakać.
Brězynka (UM/SN). Tójšto wobchada je na tymle dnju dopołdnja na zwjazkowej dróze B 156 při wotbóčce do Malešanskeho wjesneho dźěla Brězynka. W dołhich rynkach pjeć do dźesać jězdźidłow, mjez nimi wjele nakładnych awtow, přijědźe wobchad z wobeju směrow. „A to je dźensa hišće poměrnje mało wobchada“, praji Angelika Kasper. Wona je čłonka wjesneje rady za Brězynku, Delnju Hórku a Dobrošecy a so starosći wo šulske dźěći: Wone dyrbja po jutrownych prózdninach wot přichodneje póndźelu kóždy šulski dźeń zwjazkowu dróhu přeprěčić, zo móhli do šulskeho busa zalězć.
Z wosebitej akciju podpěruje skupina žonow z Kamjenca a wokoliny ...
Wšitcy du na „Wjesołu póndźelu“
Wjace hač 50 Budyskich zarjadnišćow, towarstwow a zjednoćenstwow přeprošuje přichodnu póndźelu, 8. apryla, na Budyske Žitne wiki. Wopytowarjo móža „Wjesołu póndźelu“ aktiwnje sobu wuhotować.
Budyšin (SN/MiR). Nowy rjad zarjadowanjow „Happy Monday – Wjesoła póndźela“ su towarstwa, iniciatiwy, socialne a dobroćelske zwjazki, cyrkwje a kulturne zarjadnišća zhromadnje přihotowali. Mjez nimi je tež Domowina. Hač do 10. junija so zarjadowanja na cyłkownje dźewjeć póndźelach na wšelakorych městnach Budyšina wotměwaja.
Tutu póndźelu dožiwja wopytowarjo wot popołdnja w 17 hodź. pisany swět hudźby, klasiku, pop, bras a rockom. „Sym žehliwy přiwisnik našeje demokratije“, praji tenor Björn Casapietra z Berlina, syn Herberta Kegela, kotryž bě sławny dirigent NDR a šef Drježdźanskeje filharmonije. Casapietra njezanjese jenož sławne „Hallelujah“ Leonarda Cohena ale tež někotre němske spěwy. „Je mi wulka česć, na tutym dnju w Budyšinje mjezwočo a hłós pokazać směć.“
Krótkopowěsće (05.04.24)
Wjace wučby wupadnyło
Drježdźany. Na sakskich šulach je w prěnim šulskim połlěće wjace wučbnych hodźin wupadnyło. To bě nimale 8,8 procentow, kaž ze statistiki kultusoweho ministerstwa wuchadźa. Za něhdźe 40 000 wupadnjenych wučbnych hodźin ma ministerstwo warnowanski stawk wuwučowacych loni w nowembru a decembru za hłownu přičinu.
Wobkrućenje njerozumja
Choćebuz. Wobswětowa syć Zelena liga kritizuje, zo njeje planowanje fosilneje płunoweje milinarnje w Janšojcach energijopolitisce sćěhujomne wobkrućene. Přiwjazanje na płunowu abo wodźikowu syć je w Janšojcach nadpřerěznje drohe a analyza kóštow a wužitka za planowane zjawne spěchowanje płunowodow pobrachuje, rěka w zapodatym stejišću Zeleneje ligi předewzaće nastupajo.
Wo projektach so wuměnja
