Hauschild z FDP wustupi
Krótkopowěsće (21.09.23)
Přidatne srědki komunam
Drježdźany. Sakski krajny sejm je wčera puć runał na dobro wokrjesow a komunow, kotrež su wot bytostneho zwyšenja kóštow potrjechene. Wjetšina zapósłancow je trěbnu změnu zakonjow za komunalne financne wurunanje schwaliła. Tak přewostaji Sakska wokrjesam a komunam hišće lětsa nimale 133 milionow eurow za jich nadawki w zwisku z wójnu Ruskeje w Ukrainje.
Wotchadna jězba do Prahi
Praha. Šulerjo 10. lětnika Worklečanskeje wyšeje šule „Michał Hórnik“ přebywaja z rjadowniskej wučerku Katku Bukowej tuchwilu w Praze. Na zakónčacej jězbje su sej mjez druhim Hradčany z cyrkwju swj. Wita wobhladali kaž tež na Karlowym mosće a při Praskim Jězusdźěćatku pobyli. Dźensa je jich Danko Handrik do studija ARD w Praze přeprosył.
Historiska wěža na předań
W nuznym padźe prawje pomhać
Policija (20.09.23)
Pica za pčołki alarm zawiniła
Protecy. K njewšědnemu zasadźenju su wohnjowych wobornikow póndźelu dopołdnja do Protec (Prietitz) pola Halštrowa wołali. Tam bě w jězdźidle paketoweje słužby na želej podobna maćizna z paketa wuběžała. Zasadźeni běchu kameradojo z Protec, Halštrowa, Šmorkowa kaž tež wosebita jednotka wobornikow za chemiske substancy. Po wobšěrnym pruwowanju alarm skónčichu. Jednaše so jeničce wo picu za pčołki.
Radźićeljo wuradźuja
Konjecy. We wobłuku komunow zarjadniskeho zwjazka Při Klóšterskej wodźe so jutře hnydom tři gmejnske rady zetkaja. Posedźenje radźićelow Ralbic-Róžanta započnje so we 18 hodź. w Konječanskej Burskej stwě. Tam zaběraja so znowa z móžnej fotowoltaikowej připrawu, kotruž chce Mišnjanska firma w Delanach twarić. Dale porěča wo zwyšenju staršiskeho popłatka za Ralbičansku pěstowarnju.
Worklecy. Wot 19 hodź. wuradźuja Worklečanscy radźićeljo w tamnišej šuli. Tež na jich dnjowym porjedźe steja staršiske popłatki za hladanje dźěći w pěstowarni. Nimo toho chcedźa wohnjowoborny plan za swoju gmejnu kaž tež přidatne wudawki za nowy traktor wobzamknyć.
Njebjelčicy. Tohorunja w 19 hodź. zetkaja so Njebjelčanscy radźićeljo w gmejnskej sydarni. Mjez druhim póńdźe wo twarske wustawki w Serbskich Pazlicach a wo twarski plan w Pěskecach. Skónčnje póńdźe wo stejišćo k přirodoškitnym kompensaciskim naprawam. Wobydlerjo su na zjawne posedźenja wutrobnje přeprošeni.
Tomaš Žur koncertuje
Popłatk staršich powyša
Slepo (AK/SN). Wot 1. oktobra so popłatk staršich za hladanje jich dźěći w žłobiku, pěstowarni a horće zwyši. To je wjetšina gmejnskeje rady ze štyrjomi hłosawzdaćemi na swojim zašłym posedźenju wobzamknyła. „Zakład za to su wěcne a personalne wudawki zašłych lět. Na to dyrbimy reagować“, rjekny nawodnica hłowneho zarjada Marion Mudra.
Staršiski přinošk za hladanje dźěći hač do třoch lět (dźewjeć hodźin) rozrosće wot 220 na 260 eurow. Přinošk w pěstowarni za dźěći wot třoch lět hač k zastupej do šule (dźewjeć hodźin) podróši so wot 105 na 120 eurow. Za šěsć hodźin hladanja w horće maja starši wot přichodneho měsaca 70 město dotal 60 eurow płaćić. Kajke budźe přichodne wuwiće dotal wotwidźomne njeje. „Dyrbimy drje so kóžde lěto znowa z tym zaběrać“, praji Marion Mudra. Slepjanska gmejna ma tuchwilu žłobik a pěstowarnju w Slepom a Rownom, hort „Błudnički“ je w Serbskim kulturnym centrumje.
Šibjeńcu chcedźa zaso zalěsnić
Měšćanska rada hospodarski plan za komunalny lěs wobzamknyła
Rachlow (AK/SN). Po škodach skórnika dla a po tym zo dyrbjachu wjele štomow pušćeć, ma so dwaj hektaraj wulka pusta płonina při Šibjeńcy blisko Kulowskeje lěsneje kupjele zaso zalěsnić. Tole zdźěli referent statneho zawoda Sakski lěs Jörg Moggert na zašłym posedźenju Kulowskeje měšćanskeje rady. Jeho čłonojo hospodarski plan 2024 za Kulowski komunalny lěs jednohłósnje schwalichu.
Při Šibjeńcy chcedźa tysac larikow, 250 lipow, 250 ptačich wišninow, 2 000 dubow a 5 000 bukow sadźić. Nimo toho je planowany 620 metrow dołhi płót. Za to wuda město dohromady nimale 24 000 eurow. W Kulowje so nadźijeja, zo Swobodny stat Sakska naprawy z nimale 20 000 eurami spěchuje. Wotpowědnu próstwu su hižo zapodali.
Hołk a tołk z wohnjowej woboru a oldtimerami knježeše sobotu w ...
Krótkopowěsće (20.09.23)
17 namjetow mytowanych
Budyšin. W lětušim wubědźowanju idejow „Rěč zwjazuje. Rěc zwězujo. Sorbisch verbindet“ je jury 17 namjetow mytowała. Kaž Załožba za serbski lud wčera zdźěli, je hač do 25. julija 50 požadanjow dóšło. Mytowanske zarjadowanje budźe 17. nowembra w Budyšinje. Tam zhonja wuznamjenjeni tež wo wysokosći swojeho myta. Přehlad mytowanych namakaće pod .
Wuwzaćna dowolnosć móžna
Drježdźany. Sakska wuwólnja dotalny zakaz w boju přećiwo afriskej swinjacej mrětwje. W postajenym zawrjenym pasmje II, to je najbóle wohrožena kónčina, móža plahowarjo pod wěstymi wuměnjenjemi wuwzaćnu dowolnosć dóstać, zo bychu domjace swinje pod hołym njebjom plahowali. Krajna direkcija Sakskeje je za to płaćiwy powšitkowny wukaz wotpowědnje změniła.
Chmjelarstwo w zapisu UNESCO
Plahowanje ekstremow – kóždy dźeń dračina
Nic jenož na wsach, ale tež w městach maja mnozy domjacy skót. Něchtóžkuli nimo toho drobny skót plahuje. Wšitcy so wo strowotu swojich dwu- abo štyrinohatych lubuškow prócuja. K tomu přinošować chce naša serija z pokiwami z weterinarneje mediciny. (15)
Dźeń a bóle diskutuje so w towaršnosći wo tak mjenowanym plahowanju čwělow (něm.: Qualzuchten). Při tym njejedna so wo fachowy wuraz wosebiteje rasy zwěrjatow, ale je to wobwinowace wuprajenje, kotrež zjima wěste načasne rasy a družiny, hdźež genetika ćělne brachi wuskutkuje. Jedna so wo psy a kóčki a dalše zwěrjata, kotrež su intensiwnje plahowane, zo by so wosebita kajkosć ekstremnje wuwiła. Tak plahuja ludźo dakle snadneje wysokosće, z krótkimi nohami a dołhim chribjetom. Kajkosće su plahowarjam wažne, zo by dakl na hońtwje wužitny był, wosebje hdyž dyrbi přez niske kerki běhajo dźiwinu do praweho směra honić.
