Policija (12.09.23)
Moped pokradnyli
Miłoraz. Tež hdyž su dny Miłoraza hač k wotbagrowanju ličene, su tam přiwšěm paduši po puću. Tak su njeznaći minjene dny milinowy nastroj za elektriski płót direktnje z pastwy spakosćili. Nimo toho pokradnychu skućićeljo ze składa moped typa S 51. Mjez młodostnymi woblubowana mašina njebě přizjewjena. Kaž policija informuje, nasta dohromady nimale 2 000 eurow škody.
Spominaja na Arnošta Kowarja
Wojerecy. Na něhdyšeho direktora Serbskeho muzeja a župana Arnošta Kowarja składnostnje jeho stotych posmjertnych narodnin chcedźa Budyski Serbski muzej a jeho spěchowanske towarstwo kaž tež Maćica Serbska, sekcija ludowěda/ muzejownistwo zhromadnje z Wojerowskej Domowinskej župu „Handrij Zejler“ spominać. Srjedu, 13. septembra, w 11 hodź. přeprošuja na wopominanje při jeho rowje na Wojerowskim lěsnym pohrjebnišću. Zajimcy zetkaja so na parkowanišću při Kinajchtskej droze čo. 28.
Radźićeljo wuradźuja
Radwor. Přichodne zjawne posedźenje Radworskeje gmejnskeje rady wotměje so srjedu, 13. septembra, we 18.30 hodź. w Radworskim „Dwórnišću inkluzije“. Radźićeljo porěča mjez druhim wo wuhotowanju kuchnje Radworskeje zakładneje a wyšeje šule „Dr. Marja Grólmusec“. Dalša tema budźe wužiwanje gmejnskich ležownosćow přez towarstwa. Zajimcy su wutrobnje přeprošeni.
Na kofej do muzeja
Lipjenjo w Sakskej Šwicy zwučowali
Minjeny kónc tydźenja je chór Lipa pod nawodom Jadwigi Kaulfürstoweje swoje lětuše zwučowanske lěhwo přewjedł. Nimale 40 spěwarjow a spěwarkow přebywaše hromadźe ze swójbnymi a cyłej šwitu dźěći w Rathenje. W intensiwnych probach dźěłachu na programje za nazymski koncert, kotryž wotměje so 28. oktobra w Janšojcach. Tak nastudowa chór mjez druhim štyri nowe twórby, kotrež su specielnje za Lipu spřihotowane. Připosłucharjo smědźa być wćipni na program, na kotrymž přednjese „Lipa“ dotal njesłyšane sadźby tež popularneje hudźby – nimo woblubowanych znatych pěsnjow.
Sobotu popołdnju pućowachu spěwarjo ze swójbnymi zhromadnje po Sakskej Šwicy. Někotři zwažichu sej samo na wjeršk Nickstein, zwotkelž mějachu krasny wuhlad na Bastaju na druhej stronje Łobja. Tež po wječornymaj probomaj sej Lipjenjo při dobrej naledźe hišće dołho zaspěwachu. Lětuše chórowe lěhwo je Załožba za serbski lud spěchowała.
Regionalne poskitki požadane
Wulki nawal ludźi na jubilejnych nazymskich wikach přirody
Stróža (CS/SN). W srjedźišću 25. nazymskich wikow přirody na dworje zarjadnistwa biosferoweho rezerwata Hornjołužiska hola a haty w Stróži steješe minjenu sobotu akcija „Mnohotnosć na talerju – regionalne speciality z biosferoweho rezerwata“. Kołowokoło moderneje syčomłóćawy, stareje młóćawy a traktora typa Lanz, běchu natwarjene stejnišća z poskitkami regionalnych partnerow biosferoweho rezerwata. Mjez druhim zastupjena bě Budyska Frenzlec piwarnja, kotraž swoje Holanske piwo předstaji. Dale prezentowaše so Kubšiski pjekar Stefan Richter, kiž je njedawno zastojnstwo wyšeho mištra sakskeho pjekarskeho zjednoćenstwa nastupił. Wón poskićowaše chlěb „Mały čorny“, kiž je ze šampanskej rožku pječeny. Wona ma wobstajnu kwalitu a je rezistentna přećiwo suchoće. Mjez druhim plahuje ju Löhnertec ratarski zawod z Cokowa, w Spytečanskim Rätzec młynje ju předźěłaja. Byrnjež ratarjo dźensa na žnjach modernu syčomłóćawu zasadźeli, demonstrowachu w Stróži, kak su něhdy ratarske mašiny wužiwali.
Krótkopowěsće (12.09.23)
Ludźi bóle zapřijeć
Niska. Do změny strukturow měli ludźi z jich potencialemi we Łužicy bóle zapřijeć. Na to skedźbni Stefan Körzell, čłon zwjazkoweho předsydstwa DGB, dźensa dopołdnja na 19. łužiskej konferency wobwodow DGB Sakska a Berlin-Braniborska w Niskej. Wosebje za Saksku žadaše sej tarifowe mzdy, kotrež su z wida dźěłarnistwa w předewzaćach přemało rozšěrjene.
Wo wjelkach so informowali
Budyšin. Techniski wuběrk Budyskeho wokrjesneho sejmika je so wčera z genetiskim přepytowanjom wjelkow w Hornjej Łužicy zaběrał. K tomu běchu sej radźićeljo Bernda Dankerta ze sakskeho statneho ministerstwa za energiju, škit klimy, wobswět a ratarstwo přeprosyli. Fachowc je jim genetiski monitoring wjelkow předstajił.
Jandźel přećiwo kurjenju
26. raz w měsće wulce swjećili
Samodruhosć w někotrych ličbach
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (27).
Policija (11.09.23)
19lětna smjertnje znjezbožiła
Ramnow. Ćežke wobchadne njezbožo sta so sobotu na zwjazkowej dróze B 98 pola Ramnowa. 19lětna wodźerka mopeda chcyše nalěwo na hłownu dróhu wotbočić, njewobkedźbowaše pak předjězbu wosoboweho awta a do njeho zrazy. Młoda žona na městnje njezboža zemrě.
Lěpše wuměnjenja za woboru
Prěnje nadawki za nowu wohnjowobornu gratownju přepodali
Brězowka (AK/SN). W lěće 2024 chcedźa w Brězowce nowu modernu wohnjowobornu gratownju twarić. Na swojim zašłym posedźenju je Dźěwinska gmejnska rada nadawkaj za planowanje objekta a za planowanje statiki přepodała. Wobaj nadawkaj dósta inženjerski běrow z Krušwicy.
Nowotwar je nuznje trěbny, přetož w tuchwilnej jězdźidłowej hali pódla pěstowarnje „Baćonjace hnězdo“ je mało městna za předrasćenje. Nimo toho je pod halu rumnosć pěstowarnje. „Najwjetši problem je statika“, rjekny Olaf Hanusch, kiž mjeztym šěsć lět Brězowsku wohnjowu woboru nawjeduje. „Pod tuchwilnymi wuměnjenjemi je statika wěsta, nic pak, jeli nowe moderne a ćežke jězdźidło dóstanjemy. A runje wo tajke so prócujemy.“
Serbsce w duchu po stawiznach šli
Wjele historiskich twarjenjow bě na wčerawšim dnju wotewrjeneho pomnika zjawnosći přistupnych. W Małym Wjelkowje a Radworju smy so w dwěmaj twarjenjomaj bliže rozhladowali.
Mały Wjelkow (SN/MWj). Wjetši hač wočakowany bě wčera w Małym Wjelkowje zajim za serbske wodźenje po tamnišej sotrowni. Dr. Lubina Malinkowa ze Serbskeho instituta móžeše něhdźe 40 zajimcow witać. Sčasami dyrbjachu jich samo do dweju skupin dźělić, dokelž njemóžachu so wšitcy naraz po twarjenju rozhladować.
