Policija (28.12.22)
Rentnarjej móšnju pokradnyli
Wojerecy. Žadyn měrny druhi hodowny swjaty dźeń njeměješe rentnar we Wojerecach. 89lětny bě předwčerawšim z kolesom na Becherowej po puću, jako jemu njeznaći móšnju z kolesoweho korbika pokradnychu. W móšni běchu wupokazy a pjenjezy. Škoda wučinja něhdźe 500 eurow.
Paduši w bydlenju
Budyšin. Hodowny kónc tydźenja su so njeznaći w Budyšinje do bydlenja zadobyli. W času wot pjatka dopołdnja hač do póndźele dopołdnja łamachu so woni do wjacebydlenskeho domu na Listowej. Paduši wzachu črije, kameru a sterejowu připrawu w cyłkownje hódnoće něhdźe 1 500 eurow sobu.
Trójne narodniny
Chrósćicy. Pod hesłom „Serbske bands a fans“ chcedźa skupiny JANKAHANKA, SerBeat a Logarhytmus sobotu, 30. decembra zhromadnje ze swojimi přiwisnikami stajnje dźesate narodniny swjećić, a to w Chróšćanskej wjacezaměrowej hali „Jednota“. Po koncertach, kotrež startuja w 19 hodź., postarataj so Los Héroes a Ida Bux wo elektroniske zynki. Prezentatoraj zarjadowanja staj towarstwo Pawk a hudźbnik Syman Hejduška. Zastup płaći w předpředani 15 eurow (hlej mjez druhim ).
Wiki najdlěše byli
Budyšin. Z 28 dnjemi běchu lětuše Wjacławske wiki w Budyšinje najdlěše nowšeho časa. Zličili su něhdźe 150 000 wopytowarjow, zdźěli měšćanske zarjadnistwo. Dotalny rekord bě 2017, jako přichadźeše 175 000 wopytowarjow.
Hač do jutřišeho wothłosować
Kulow fotowoltaiku planuje
Hospodarski plan za wopłóčkowy zawod wobzamknyli
Kulow (AK/SN). Ze zašłosću a z přichodom Kulowskeho wopłóčkoweho zawoda su so čłonojo tamnišeje měšćanskeje rady na swojim zašłym posedźenju zaběrali. Woni wotličichu hospodarske lěto 2021. Runje tak wuwjazachu radźićeljo tehdyšeho nawodu wopłóčkoweho zawoda Jurja Brösana. Wot lětušeho je Frank Kral nowy nawoda komunalneho zawoda. „W lěće 2021 smy lěpje hospodarili hač planowane“, rozłoži komornik Mathias Kockert. Při planowanju ličachu z dobytkom 117 000 eurow. Pod smužku pak steješe kónc lěta wuslědk 176 000 eurow. Při dwójnym pruwowanju njejsu žane njedostatki zwěsćili. Za swójski zawod města bě 2021 normalne lěto bjez wulkich wosebitosćow. Mjez druhim su 300 000 eurow dołha wotpłaćili. Wobšěrne kredity, kotrež dyrbjachu něhdy za natwar wodočisćernje na kromje města kaž tež za kładźenje kanaloweje syće brać, budu hač do kónca lěta 2028 dospołnje wotpłaćene, Mathias Kockert připowědźi.
Bamborak mjeztym hižo derje rěči
Tak kaž po wšěm swěće so tež w serbskim kompjuterowym wobłuku stajnje na nowosćach dźěła. Mjeztym pak zo to zwjetša w institucijach činja, skutkuje młodostny w Pančicach-Kukowje takrjec za ćichim.
Pančicy-Kukow. Zo je Korla Baier z Pančic-Kukowa drje jedyn z najmłódšich serbskich kompjuterowych specialistow, su čitarjo Serbskich Nowin hižo před nimale lětomaj zhonili. Tehdy wo tym rozprawjachmy, zo je kompjuterowy program wuwił, kiž zamóže ličby serbsce předčitać. Tutón je mjeztym w polěpšenej wersiji pod wužiwajomny. Nětko dźěła młodostny hižo něhdźe poł lěta na přichodnym projekće, kiž je dźensa tak daloko wuwity, zo móže sej jón kóždy zajimc internetnje wobhladać – a předewšěm naposkać.
Nowej figurje pyšitej wot patoržicy wulki Boži narodk na dworje ...
Wosebity hodowny postrow
Krótkopowěsće (28.12.22)
Benedikt „je jara chory“
Rom. Eremitowany bamž Benedikt XVI. je po słowach swojeho naslědnika Franciskusa „jara chory“. Aktualny pontifeks je dźensa na kóncu generalneje awdiency we Vatikanje wěriwych wo „wosebitu modlitwu“ za 95lětneho Benedikta prosył. Dalše nadrobnosće pak Franciskus a Swjaty stoł dotal mjenowałoj njejstaj.
Hornjołužiske słowo lěta 2023
Kotmar. Maksimalnje tři namjety za słowo lěta w hornjołužiskej narěči z wobłuka „nałožki“ móža zajimcy hač do kónca meje na pósłać. K dobyćerjam 2022 słušeše „Kuhploapperch“ (planc). Towaršnosć za wobchowanje hornjołužiskeje narěče chce mjez zapodarjemi słowniki a keramiske wudźěłki wulosować. Wozjewjenje wuslědka juryje budźe 21. awgusta 2023.
Zarjadnica za Romow
Policija (27.12.22)
Rozestajenje po njezbožu
Njeswačidło. Mało hodowneho měra začuwachu wobdźělnicy wobchadneho njezboža patoržicu dopołdnja na B 96 pola Njeswačidła při wotbóčce do Holešowskeje Dubrawki. Tam běštej VW a BMW do so zrazyłoj, zranił pak so nichtó njeje. 35lětna wodźerka BMWja a jeje 32lětny sobujěducy kaž tež 19lětny wodźer VWja sej mjez sobu winu na zražce přisuwachu. Jedyn druhemu wudma nadawaše a jemu hrožeše. Policija pyta nětko swědkow.
Šěrachowy měd k jubilejomaj
„Smy wosrjedź jězoriny“
W Halštrowskej Holi zhladuja na intensiwne lěto wróćo
Hory (AK/SN). Lěto 2022 bě w gmejnje Halštrowska Hola z wjele dźěłom zwjazane. Tole zjima wjesnjanosta Dietmar Koark (CDU) na zašłym posedźenju gmejnskeje rady. „Smy wjele za zhromadnosć w našej gmejnje docpěli, štož je sobu najwažniše“, wón rjekny.
W jednotliwych wjesnych dźělach je so po słowach Koarka tójšto činiło. W Narću je so poradźiło městnosć tradiciskeho towarstwa ponowić. W Lejnom zaběraja so tuchwilu ze saněrowanjom třěchi a fasady wobydlerskeho domu Stara šula. W Ptačecach su hrajkanišćo znowa wuhotowali a w Bjezdowach fasadu wohnjowoborneje gratownje ponowili. W Nowej Łuce maja nětko saněrowane wjacezaměrowe twarjenje při młynje. Nimo toho su we wsy wotwodźowanje dešćikoweje wody sporjedźeli. W Zabrodźe su wobydlerski dom a wjesny puć saněrowali.
