Hladaja wužadanjam napřećo
We Worklečanskej gmejnje chcedźa nadróžne wobswětlenje přestajić
Worklecy (JK/SN). Gmejnskim radźićelam a wjesnjanosće Clemensej Poldrackej (njestronjan) hladaja we Worklečanskej gmejnje za lětsa wjele wažnych a ćežkich nadawkow do rukow. To wujasnichu sej na njedawnym prěnim lětušim posedźenju radźićelow. Po lońšim pruwowanju zamołwiteho zarjada ma gmejna za swoje dnjowe dźěćace přebywanišća nastajić nowe a aktualizowane wustawki. Jich naćisk, kotryž je wudźěłk zarjadniskeho zwjazka Při Klóšterskej wodźe, bě njedawno mjez druhim tež tema wuradźowanjow. Mnohe dodawki a změny přińdźechu ze stron radźićelow, při čimž złožowachu so wosebje na aktualny sakski zakoń wo dźěćacych dnjowych přebywanišćach. Wšitke dodawki a změnu přepodachu mjeztym zarjadniskemu zwjazkej, hdźež je wobdźěłaja. W tym zwisku njesměli z wočow spušćić nowe postajenja sakskeje nastupajo personalny kluč w pěstowarnjach. Na to skedźbni radźićel Pětr Brězan (CDU) a pokaza zdobom na kubłanski koncept pěstowarnje, kotryž měł tohorunja być aktualny a nowym poměram přiměrjeny.
Policija (25.01.23)
W předrasćerni kluč kradnyli
Budyšin. Zo njesměš swoje hódnotne wěcy w předrasćerni sportoweje hale wostajić, je předwčerawšim wječor wobsedźer Hyundaja w Budyšinje bolostnje nazhonić dyrbjał. Jako muž w hali na Nagelowej sportowaše, so njeznaći do předrasćernje zadobychu, wšitke toboły přepytachu a awtowy kluč wosoboweho awta sobu wzachu. Tak móžachu módry i20 startować a z nim wotjěć. Jězdźidło z lěta 2020 bě něhdźe 15 000 eurow hódne. Za nim nětko mjezynarodnje pytaja, kaž policija zdźěli.
Njebjelčanski młodźinski klub je minjenu sobotu zhromadnje z ...
Krótkopowěsće (25.01.23)
Muzejej dalšej plastice přepodali
Budyšin. Swójba wuznamneho łužiskeho wuměłca Siegfrieda Schreibera je Muzejej Budyšin wčera dalšej skulpturje přepodała. Z bronzowymaj plastikomaj „Stehende (Rosel II)“ a „Teilfassung des Mädchentorsos mit gesenktem Kopf (Reni)“ je so muzejowy wobstatk twórbow ze zawostajenstwa předewšěm za swoje rězbarske twórby znateho Schreibera podwojił.
Solidariski T-shirt
Zhorjelc. Łužiski modowy label LABA předawa wotnětka wosebity, limitěrowany T-shirt „Swoboda wuměłstwa“, wuraznje njepokazowacy twórbu Hanki Krawcec „Monika“. Dochody maja we wobłuku solidariskeje akcije narunanju kóštow za powołanske jednanje nastupajo wužiwanje motiwa na wudźěłkach labela na wyšim krajnym sudnistwje w Drježdźanach (SN rozprawjachu) słužić.
Naftowód do stareho železa?
Policija (24.01.23)
Njemdry wnučk zachadźał
Wojerecy. 23lětneho muža dyrbjachu policisća předwčerawšim připołdnju na Wojerowskej Bonhoefferowej změrować, a to hižo wospjetny raz. Wón chcyše na kóždy pad do bydlenja swojeje wowki a tak mócnje klinkaše, zo při tym klinkačk wobškodźi. Dokelž młody muž njemdrje zachadźeše, wołachu wobydlerjo policiju. Zastojnikam napřećo 23lětny tež runjewon kooperatiwny njebě, tak zo wzachu jeho sobu na rewěr. Pola młodeho harowaka namakachu policisća konop a amfetaminy.
Z małymi kročelemi započeli
Wosadu za ekologiske myslenje a skutkowanje wuznamjenili
Slepo (CK/SN). Solarna připrawa „pyši“ wot lońšeho decembra južny dźěl třěchi Slepjanskeje fary. Projekt wosadneje cyrkwinskeje rady njeměješe spočatnje jenož přiwisnikow, dokelž steji twarjenje pod škitom pomnikow. Dowolnosć pak 2021 přiwšěm dóstachu. Problemow z dodawanjom dla so předewzaće tola hišće dliješe. Připrawu instalowachu loni krótko do hód.
Fotowoltaika na třěše fary je ćežišćo w koncepće naslědnosće Slepjanskeje wosady. Mjeztym pjeć lět wobsteji za to dźěłowa skupina. Započeli su z cyle małymi kročelemi. W farskim zarjedźe wužiwachu jenož hišće ekologisce zhotowjenu papjeru a tak mjenowane fairnje wikowane wudźěłki, při zarjadowanjach wzdachu so plastikoweho gratu a na łukach wokoło cyrkwje hižo tak husto trawu njesyčechu, ale wusychu kwětkace měšeńcy za žiwjenski rum insektow.
Čehodla žadyn měd ćěšenkam?
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk w nowej seriji znatym a mjenje znatym chorosćam, zo by je čitarjam trochu bliže rozłožował (10).
Přeco zaso čitamy na mjedowych škleńcach informaciju, zo njesmě so tutón ćěšenkam prěnjeho žiwjenskeho lěta ani w jědźi ani w napojach poskićeć. Mnozy tukaja, zo je měd tak ćahaty, zo by dźěsću hišće njezrału jědnicu a w najhóršim padźe samo dychnicu zatykał. To drje je logiska, ale nic poprawna přičina za pokazku pčołarjow a pčołarkow.
Předsydstwo z nowačkami
Nowa Wjeska. Swoju hłownu a wólbnu zhromadźiznu je minjeny pjatk Nowowješćanske towarstwa „Wjesna zhromadnosć“ přewjedło. Něhdźe 50 wopytowarjow je z lisćiny dwanaće kandidatow nowe předsydstwo wuzwoliło. Nimo štyrjoch čłonow dotalneho předsydstwa wuzwolichu tež třoch nowačkow. Su to Jan Helner, Franzisko Wenk a Dominik Čornak. Za předsydu wuzwolichu znowa Křesćana Korjeńka.
Radźićeljo wuradźuja
Njebjelčicy. Přichodne posedźenje Njebjelčanskeje gmejnskeje rady wotměje so štwórtk, 26. januara, w 19 hodź. w Pěskečanskej wohnjowobornej gratowni. Najwažniši dypk dnjoweho porjada drje budźe předstajenje solarneho parka w Pěskecach a diskusija k tutej temje.
Chrósćicy. Tohorunja 26. januara, ale hakle w 19.30 hodź. zetkaja so Chróšćanscy gmejnscy radźićeljo w gmejnskim a kulturnym centrumje. Mjez druhim póńdźe wo wobzamknjenje w njezjawnym dźělu zašłeho posedźenja.
„Jednotu“ z wočow njezhubja
Wjele priwatnych a komunalnych twarskich projektow so tuchwilu dliji, dokelž pobrachuja material a dźěłaćerjo. To wšak dyrbi tež Chróšćanska gmejna nazhonić.
Chrósćicy (JK/SN). Solidne wuwiće swojeje komuny wosebje na financnym polu je za wjesnjanostu Marka Klimana (CDU) sobu najwjetši wuspěch lěta 2022. Na tajkim fundamenće bě derje nastorčić jedyn z najwjetšich projektow gmejny w minjenych lětach – ponowjenje Chróšćanskeje nawsy a Cyrkwinskeje hory. Hačrunjež chcychu hižo do hód dźěła zakónčene měć, njejsu w gmejnskim zarjadnistwje njespokojom. Znate přičiny, kaž falowace twaršćizny abo dźěłowe mocy su derje planowany a přihotowany projekt haćili. Ćim bóle žedźa so wšitcy wobdźěleni za dobrym zakónčenjom lětsa. Potom drje budźe Chróšćanska nawjes jedna z najrjeńšich w zarjadniskim zwjazku.
