Krótkopowěsće (10.01.23)
Kóčka najwoblubowaniša
Wiesbaden. Wot 34,7 milionow zwěrjatow w domjacnosćach Němskeje je 16,7 milionow kóčkow. Na zakładźe statistiki centralneho zwjazka coologiskich wobchodow z lěta 2021 informuje powěsćernja dpa, zo steja psy na druhim městnje, potom sćěhuja nukle, žurki a wujki. Po dotalnym wuhódnoćenju lońšich datow njebudźe so ranking domjacych zwěrjatow měnjeć.
Jězor hač do 2027 zašlahany
Freiberg. Sakski wyši hórnistwowy zarjad w Freibergu je zašlahanje Hórnikečanskeho jězora hač do lěta 2027 podlěšił. Woni su drje wobjim areala saněrowanja pomjeńšili, ale jězor wostanje kaž wot 2014 njepřistupny. Towarstwo „rebelow Hórnikečanskeho jězora“ je aktualnemu wukazej zarjada znapřećiwiło: „Strašna skłonina je so do wody sunyła a hižo žana přičina za zašlahanje njeje.“
Njesłowo lěta wuzwolili
Bratraj so za dujersku hudźbu přewšo horitaj
Štó njeby znał po cyłej Łužicy a tež zwonka njeje znatu serbsku dujersku kapału Horjany? Tute hudźbne ćěleso je nimo dalšich wosobow tež wusko zwjazane z dwójnikomaj. Hórčanskaj hólcaj, Hejduškec Jurij a Bosćij, staj so 9. januara 1963 narodźiłoj. Hižo jako dźěsći staj so jara za hudźbu zajimowałoj. Wulke zbožo tehdy w 60tych a 70tych lětach za njeju bě, zo serbski organist a kantor Handrij Wjenk jako hudźbny wučer na Kamjenskej hudźbnej šuli skutkowaše. Tam wučeše hudźbnje zajimowanych šulerjow na najwšelakorišich instrumentach hrać. Postara so sobu wo to, zo bu tež na našich serbskich wjeskach wotnožka hudźbneje šule załožena, mjenujcy w Chrósćicach. Z toho časa tam mnozy serbscy šulerjo najwšelakoriše instrumenty hrać wuknjechu. Hejduškec Jurij a Bosćij běštaj so za trompetu a klarinetu rozsudźiłoj.
Nic jenož fachowcow zahorili
Hora (JK/SN). Něhdy ležachu traktorisća w zymskich měsacach pod swojimi traktorami a činjachu je zaso fit za přichodne nalětnje dźěła. W našim času sydnu so za wodźidło swojich, přez cyłe lěto derje hladanych, staršich a nowšich modelow a zetkawaja so k wuměnje nazhonjenjow abo jenož tak k zabawje.
Njewšědny a jónkrótny
Na hodownym koncerće změny w farskej cyrkwi widźeć byli
Chrósćicy (SN/MWj). Ze zhromadnym kanonom „Dona nobis pacem“ wšitkich sobuskutkowacych a wopytowarjow je so wčera popołdnju skónčił tradicionalny hodowny koncert Chróšćanskeho cyrkwinskeho chóra. Wotměł drje je so wón kaž stajnje w tamnišej farskej cyrkwi. Boži dom pak tuchwilu nutřka přetwarja, a tuž bě koncert runje tak njewšědny kaž jónkrótny. Hišće lětsa dźě ma přetwar zakónčeny być, tak zo móža spočatk 2024 zaso kaž zwučene koncertować.
Zasłuža sej připóznaće
Krótkopowěsće (09.01.23)
Hišće chwile hač do 31. januara
Drježdźany. Mějićeljo w Sakskej maja hišće hač do 31. januara chwile, zo bychu swoje wozjewjenja za nowy ležownostny dawk zapodali. Dotal je 51 procentow wočakowanych podłožkow dóšło. Tele wozjewjenje maja zasadnje elektronisce zapodać. Za tych bjez trěbneje techniki, kaž stej to kompjuter abo tablet, maja financne zarjady papjerjane formulary.
Wjesnjanosta znowa kandiduje
Dobruša-Huska. Wjesnjanosta Alexander Fischer so druhi raz wo tele zastojnstwo požada, wo kotrymž wolerki a wolerjo w gmejnje Dobruši-Husce 19. měrca wothłosuja. Na sobustawskej zhromadźiznje CDU minjeny štwórtk su přitomni 48lětneho Fischera za swojeho kandidata wuzwolili. Dalše kandidaturu přizjewić je hišće hač do 12. januara móžno.
Regionalne stawizny wažne
Traktory so zetkaja
Hora. Lubowarjo starych traktorow njech njeskomdźa jutře, sobotu, zetkanje wlečakow na Horje w Bóščanskej gmejnje. Wot 10 hodź. wobsedźerjo ze swojimi mašinami přijědu. Cyły dźeń móža sej zajimcy historisku techniku wobhladać. Wo ćělne derjeměće budźe wězo postarane.
Přednošuje wo holi
Kamjenc. Wo wuwiću přirody Kinsporskeje hole přednošuje Dirk Synatzschke wutoru, 10. januara, w 19 hodź. w elementariju Kamjenskeho Muzeja zapadneje Łužicy. Při tym póńdźe wo to, kak je so bywše wojerske zwučowanišćo pod škitom přirody změniło.
106 idejow z ludu za město
Z wobydlerskim etatom chcedźa we Wojerecach tójšto zwoprawdźić
Wojerecy (SN/MWj). Wot spočatka nowembra hač dosrjedź decembra lońšeho lěta mějachu wobydlerjo Wojerec a wokolnych wsow składnosć, zapodać swoje namjety za wobydlerski etat 2023. Nětko je měšćanske zarjadnistwo wuslědki wozjewiło. Po informacijach nowinskeje rěčnicy města Corinny Stumpf je 95 wosobow cyłkownje 106 namjetow zapodało. Na ličby zašłych lět wšak cyle nawjazać njemóžachu. Za wobydlerski etat 2022 bě 116 wobydlerjow dohromady 137 namjetow zapodało, lěto do toho mějachu samo 160 idejow wot 137 wosobow. Tehdy pak mějachu někotre namjety, kotrež běchu ludźo wjacore razy zapodali, rěka w nowinskej zdźělence měšćanskeho zarjadnistwa.
Kónc tydźenja zaso ptački ličić
Policija (06.01.23)
Rubježnika lepili
Wojerecy. Po rubježnym padustwje je policija předwčerawšim we Wojerecach skućićela lepiła. Młody muž bě dopołdnja najprjedy z předawanišća na Łužiskim naměsće metalowu piłu pokradnył. Z njej 28lětny wonka zamk kolesa typa Road Rider přerěza. Wone bě něhdźe 1 500 eurow hódne. Pasant tole wobkedźbowaše a muža narěča. Na to rubježnik jemu z nožom hrožeše a z kolesom wotjědźe. Alarmowani policisća jeho bórze na to w bliskosći lepichu. Muža su najprjedy na rewěr sobu wzali, po trěbnych policajskich naprawach pak jeho zaso pušćichu.
