Porěči wo putnikowanju
Chrósćicy. Lutherowy putniski puć steji w srjedźišću přichodneho zarjadowanja kulturneje zymy sobotu, 14. januara, w 19.45 hodź. w Chróšćanskej putniskej hospodźe. Putniski puć bu 2017 wotewrjeny. Wón ćehnje so mjez Wormsom a Eisenachom a je něhdźe 400 kilometrow dołhi. Historiski pozadk je pućowanje Luthera 1521 z Wittenberga k Reichstagej we Wormsu a wróćo, hdźež so potom za dlěši čas w hrodźe Wartburg schowa. Putnica Friedeborg Seitz z Mannheima je pěši po tymle Lutherowym puću pućowała a sobotu w Chróšćanskej putniskej hospodźe wo swojich dožiwjenjach a impresijach rozprawja. Na přednošk w němskej rěči su wšitcy zajimcy lubje witani.
Rabiner budźe z hosćom
Namołwjeja do wubědźowanja
Rakecy (SN/MWj). Skrućić čestnohamtske dźěło a začuće regionalneje zhromadnosće je zaměr wubědźowanja, kotrež je towarstwo za wuwiće Hornjołužiskeje hole a hatow (OHTL) do žiwjenja zwołało. Hač do 9. měrca móža so zapisane towarstwa ze swojimi předewzaćemi wo myta w cyłkownym wobjimje 25 000 eurow powabić, zdźěli André S. Köhler z regionalneho managementa Leaderoweje kónčiny w Rakecach.
Zajimawy namjet předpołožili
Za čas přetwara Worklečanskeje šule dyrbja šulerjow druhdźe wuwučować
Worklecy (JK/SN). Jedna z najzajimawšich temow na wčerawšim posedźenju Worklečanskeje gmejnskeje rady jewješe so hakle na kóncu w informacijach wjesnjanosty. Na tymle městnje mjenujcy narězny Clemens Poldrack (njestronjan) wobšěrnu temu wobnowjenja zakładneje a wyšeje šule „Michał Hórnik“. Po wuradźowanju z twarskimi fachowcami je jasne, zo njemóže so nuznje trěbne ponowjenje kubłanišća za čas šulskeje wučby přewjesć. To rěka, zo ma gmejna jako nošer pytać za móžnosćemi, na dwě lěće šulsku wučbu na druhich městnach zaručić.
Dróhotwarske dźěła planowane
Kubšicy (CS/SN). Najwažniši podawk minjeneho lěta w Kubšiskej gmejnje bě bjez dwěla přepodaće Bošečanskeje zakładneje šule. Kubłanišćo je za 5,5 milionow eurow moderny přitwar dóstało a je nětko hromadźe ze saněrowanym starym dźělom na najnowšim stawje. Runočasnje su tež hort ponowili, jón z nowymi meblemi wuhotowali a nowe durje zatwarili. Pjenjezy su derje inwestowane, měni wjesnjanosta Olaf Reichert (njestronjan), přetož inwesticije na dobro dźěći su inwesticije do přichoda. W jeho gmejnje měli so ludźo derje čuć. W nowšim času drje njejsu žane nowe bydlenske štwórće za młodych ludźi wutworili. Ćim bóle prócuja so wo to, zo bychu so prózdne městna mjez domskimi zmysłapołnje wužili a wobtwarili. Tež historiske twarjenja, kotrež su saněrowanja hódne, móhli zajimawy nadawk za młodych ludźi być. 2022 je w Kubšiskej gmejnje 15 nowych domow nastało. Za lětsa předleži dotal sydom twarskich próstwow. Olaf Reichert tuž spokojnje na zašłe lěto zhladuje. W zakładnej šuli knježi nětko čiłe žiwjenje. Dohromady maja tam 107 šulerjow, z toho 22 w prěnim lětniku. Serbšćinu podawaja fakultatiwnje.
W Kulowskej lěsnej kupjeli su na přichodne lěćo přihotowani. Tam ...
Zwostanu wotewrjene prašenja
Wustup Slepjanskeho dźěćetka na Wjacławskich wikach w Budyšinje je diskusiju wo hranicami mjez žiwej tradiciju a turistiskej atrakciju wubudźił. Zarjadowar, Budyski měšćanski zarjad, je na naprašowanje našeho wječornika reagował.
Budyšin (SN/MiP). We wobłuku rešeršow za artikl „Slepjanske dźěćetko w Budyšinje – pad přiswojenja kultury susoda?“, wozjewjeny loni 23. decembra, je so redakcija tež pola Katarzyny Kudzewicz, zamołwiteje za kulturu w Budyskim měšćanskim zarjedźe, naprašowała. Nowinska rěčnica města Josephina Brinkel je na naprašowanje 6. januara 2023 reagowała. Wona pisa: „Slepjanske dźěćetko hižo wjele lět w programje Budyskich Wjacławskich wikow mamy – njeje to nowa wunamakanka. Dalšich informacijow nimamy. Skóržby nastupajo wustup dźěćetka hač do 13.12.2022 žane dóšli njeběchu.“
Šansa towarstwam
Krótkopowěsće (13.01.23)
Wot 2. februara bjez nahubnika
Berlin. Winowatosć nahubnika w zjawnym dalokowobchadźe ma so k 2. februarej dočasnje zběhnyć. To je zwjazkowy minister za strowotnistwo Karl Lauterbach (SPD) dźensa w Berlinje zdźělił. Po płaćiwym zakonju wo škiće před infekcijemi běchu dotal w dalokowobchadnych busach a ćahach, kaž su to ICE, IC a EC, hišće hač do 7. apryla FFP2-maski předpisane.
Policisća čisło dóstanu
Drježdźany. Štož je w susodnych krajach Sakskeje dawno winowatosć, nětk tež w swobodnym staće płaći: Policisća dóstanu indiwiduelne čisło. Tak hodźi so na přikład po demonstracijach lěpje zwěsćić, kotry zastojnik jednotki hotowostneje policije je so kak napřećo demonstrantam zadźeržał, jeli je k porokam dóšło. Zeleni a SPD su sej to dawno žadali, CDU to dotal wotpokaza.
Parkowanišći přepodali
Hodowne melodije zaklinčeli
Zběrnik ma dešćowu wodu wot Židowa wotdźeržeć
Budyšin (CS/SN). We wobłuku turnusowych přepruwowanjow su twarscy fachowcy zwěsćili, zo su na Budyskej Šulerskej wěži saněrowanske dźěła trěbne, zo by wona dale wěsta była. Kaž na posedźenju twarskeho wuběrka měšćanskeje rady předwčerawšim zdźělichu, su mjez druhim ćěsliske dźěła trěbne. Tohodla je zarjadnistwo pjeć firmam twarske podłožki připósłało a na to dwaj poskitkaj dóstało. Rozsudźili su so na kóncu za ćěsliski zawod z Porchowa. Dźěła we wobjimje 80 000 eurow maja so w februaru zahajić. W lěću so dalše dźěła na fasadźe přizamknu.
