Šulski muzej wutwarić dale planuja
Malešecy (CS/SN). Dwě wulkej twarnišći měješe Malešanska gmejna w minjenym lěće na starosći. Jónu bě to zakładny wutwar hłowneje dróhi w Budyšinku, tamne nowa gratownja wohnjoweje wobory w Barće. Dróhotwar w Budyšinku, do kotrehož su nimale sydom milionow eurow inwestowali, měješe poprawom kónc 2022 hotowy być. Po tuchwilnym stawje pak twarske dźěła drje hišće hač do pózdnjeho nalěća traja. Za Bartsku wohnjowobornu gratownju su twarske dźěła dosć derje pokročowali, ale tež tu njemóžachu poprawny termin dozhotowjenja w nowembru dodźeržeć, rjekny Malešanski wjesnjanosta Matthias Seidel (CDU). Přičina su problemy při dodawanju dźělow za ćopłotnu klumpu. To so tež na dźěło dalšich rjemjeslnikow wuskutkowaše. Cyłkowny dotwar gratownje je nětko za kónc měrca předwidźany. Halu za jězdźidła porno tomu hižo wužiwaja.
Mjeztym zo je njejapka zyma z dźesać centimetrami tołstej worštu ...
„Kóždy móže so za sprawnosć angažować“
Budyšin (CS/SN). Harald Lamprecht, społnomócnjeny za prašenja swětonahlada a sektow při Ewangelskej krajnej cyrkwi Sakskeje, rozłoži minjeny pjatk we wobłuku Budyskich narěčow něhdźe 150 zajimcam w cyrkwi swj. Pětra prašenje, što pod hesłom „Sprawny měr“ rozumi. Lamprecht rjekny, zo je teologa a njemóže tuž „k wojersko-strategiskim přemyslowanjam ničo rjec“. Za njeho pak je wěste, zo stej „měr a sprawnosć njedźělomnej“. Přiwšěm „njeje měr žadyn přirodny staw. Čłowjek je dźě přeco tež namócny a egoistiski. Jeničce ciwilizacija złahodnja čłowječe instinkty. Smy zakonje stworili, před kotrymiž měli wšitcy jenacy być. Tola njejsu wšitke tajke prawidła zmysłapołne a sprawne. Zakonje měrej jenož polěkuja, su-li sprawne.“ Idealna by „zhromadnosć bjez nućenja a namocy była. To płaći tež za staty“. Tola za to „pobrachuja často prawidła. Zwjazk ludow, UNO a Mjezynarodne sudnistwo su pospyty, zhromadnosć narodow rjadować. Štož pak faluje, je skutkowna eksekutiwa. Njedawa žana swětowa policija, tež hdyž USA husto tak wustupo- wali“, rjekny Lamprecht.
Krótkopowěsće (19.01.23)
Statnik měł CDU-mandat złožić
Budyšin. W internetnym woprašowanju serbskeho rozhłosa MDR na Instagramje je so 55 procentow ludźi za to wuprajiło, zo měł předsyda Domowiny, Dawid Statnik, swój mandat w frakciji CDU Budyskeho wokrjesneho sejmika złožić. 29 procentow je hinašeho měnjenja a 16 procentow tema „politiski mandat a zastojnstwo Domowiny“ njezajimuje. 153 ludźi je so wobdźěliło.
Merz za jasnu mjezu k AfD
Drježdźany. Na prašenje Sakskich Nowin, kak posudźuje hłosowanje Budyskeje CDU za namjet AfD we wokrjesnym sejmiku, wotmołwi předsyda zwjazkoweje CDU, Friedrich Merz, zo „je to problem“ a zo „ma za zbytne, štož je so tam stało“. Wón praji dale, zo, by-li Budyska CDU tajki namjet za zmysłapołny měła, dyrbjała jón sama zapodać, a wuzběhny hladajo na AfD: „Naša palna murja steji“.
Hłowna zhromadźizna SKT
Sezonu camprowanja zahajili
Płuwać wuknyć
Budyšin. Zakładny płuwanski kurs poskićuja w zymskich prózdninach wot 13. do 21. februara w Budyskej Röhrscheidtowej kupjeli. W tym času wobdźělnicy wšědnje wot 8.30 hač do 10 hodź. zwučuja. Wobdźělenje na wosobu płaći 160 eurow. Přizjewjenja přijimuje personal kupjele wosobinsce abo e-mailnje pod .
Nominuja kandidata
Łaz. Zjawna sobustawska zhromadźizna CDU k nastajneju kandidata za wólby Łazowskeho wjesnjanosty wotměje so jutře, štwórtk, w 19 hodź. w Lěsnym hosćencu při Slěbornym jězoru w Bjedrichecach (Friedersdorf).
Policija (18.01.23)
Z trikom pjenjezy wulišćili
Spale. Podhladne powěsće přez whatsapp staj tele dny mandźelskaj w Spalach dóstałoj. Cuzy wudawaše so jako syn mandźelskeju a napowěda, zo ma nowy handy, z kotrymž pak njemóže onlinebanking wužiwać, a prošeše wo 9 000 eurow. Spalowčanaj to wěrještaj a sumu přepokazaštaj. Pozdźišo wobšudnistwo pytnještaj a policiju informowaštaj.
Fundus we wsy přećahnył
Nowotwar z wočow njepušća
Njeswačanscy sportowcy chcedźa swojim hosćom dušowanje zmóžnić
Njeswačidło (JK/SN). Tuchwilne hospodarske połoženje Njeswačanskeje gmejny njedowola, so dale chutnje a zaměrnje zaběrać z předewzaćom, twarić nowu pěstowarnju. To je sej Njeswačanska gmejnska rada hižo loni jasnje wuwědomiła. Projekt pak cyle z wočow njepušći. Na wotpowědne naprašowanje radźićelki wo stawje planowanja wjesnjanosta Gerd Schuster (CDU) na wčerawšim prěnim lětušim posedźenju gmejnskeje rady rozłoži, zo wotměje so přichodny tydźeń zetkanje z krajnoradnym zarjadom a Sakskej agenturu za wuwiće struktury (SAS) w tutej naležnosći. Z wuradźowanja wočakuje wón cyle konkretne wuprajenja wo móžnym spěchowanju a hač je nowotwar scyła hišće opcija za gmejnu a wokrjes. Wo wuslědkach chce Schuster na posedźenju gmejnskeje rady w februaru rozprawjeć. Na přichodnych posedźenjach budu radźićeljo tež zaměrnje wo nowym jednanskim porjedźe wuradźować a so na wuwiće tamnišeho twarskeho dwora dorozumić. Wo tutej temje njeje so fachowa komisija hišće doskónčnje wuprajiła.
W Bermuda-třiróžku Jolku přihotuja
Po dwěmaj lětomaj přestawki wotměje so Nukničanska Jolka přichodnu sobotu zaso tak, kaž su to přiwisnicy tohole wječora wjele lět zwučeni, mjenujcy z wulkim hołkom a tołkom w Brězanec bróžni.
Nuknica (SN/MWj). Prěnje dny januara knježi w Nuknicach wosebita a napjata atmosfera. W Brězanec bróžni so klepa, rěza a šrubuje, před njej je natwarjeny wulki stan a z baraki słyšiš spěwanje. Nic jenož tu přihotuja so na drje najwjetši ryzy serbskorěčny swjedźeń we Łužicy. Dwě lěće dyrbjachu so přiwisnicy z online-wersiju spokojić. Přichodnu sobotu, 21. januara, wotměje so Jolka zaso na zwučene wašnje z wjele ludźimi, wudźěłkami ze swinjorězanja a z pisanym programom. Lětsa je to samo jubilejna 25. Jolka.
