Dwě dobje dosahatej
Pucherje skónčnje wopušćić
Budyšin (SN/at). Ekumenu třećeho razu mjenowaše Peter-Paul Straube ze zwjazkarstwa Budyšin w zhromadnosći „dialog a zhromadne dźěło ze wšěmi, kotřiž žanej konfesiji njepřisłušeja“. Ekumenu prěnjeho razu rjekny wón k zhromadnemu dźěłu protestantow a katolikow, wzajomne česćowanje mjez swětowymi nabožinami tu druheho razu. Z tym twari Straube zawodnje móst k referentej druheho zarjadowanja Budyskich narěčow pjatk wječor w tachantskej cyrkwi, na kotrež bě zwjazkarstwo hromadźe z Ekumeniskim tachantskim wobchodom přeprosyło.
Referent Dirk Neubauer je jako krajny rady Srjedźosakskeho wokrjesa jenički njestronjan, kotryž tuchwilu w Sakskej tele zastojnstwo wukonja. Naležnosć Budyskich rěčow je mjez sobu rěčeć, nic wo druhich. Kak móhło to w komunalnej politice konkretnje wupadać, je Neubauer na přikładźe swojeho postupowanja jako dotalny měšćanosta Augustusburga w Rudnych horinach předstajił. Klučowe słowo rěka „wobdźělenje wobydlerjow“, zhoni wjace hač sto připosłucharjow w zymnej tachantskej cyrkwi.
Krótkopowěsće (05.12.22)
Minister w Kulowskej kónčinje
Kulow. Sakski minister nutřkowneho Armin Schuster (CDU) je so dźensa na wopyće we Łužicy tež pola policije wo stawje přepytowanja wonječesćenja Božich martrow w Kulowskej kónčinje wobhonił. Po informacijach Katolskeho Posoła su forensikarjo policije wuslědźili, zo je njeskutk „nadpad na nabožinu“. Zapósłanc Alojs Mikławšk (CDU) běše sej spěšne a dorazne jednanje stata žadał.
Serbja přednošowali
Mnichow. Třo Serbja su we wobłuku Sudetoněmskich dialogow minjeny pjatk a sobotu w Mnichowje přednošowali. Christina Boguszowa wěnowaše so přichodej Serbskeho muzeja a kak chce młódše generacije zaso do muzeja wabić. Dr. Cordula Rajaczakowa je serbske medije předstajiła a Pětr Brězan informowaše wo Serbach. Mjez wobdźělnikami běchu Ladinojo, Němcy z Čěskeje, Sudetscy Němcy a Serbja.
Přiražku nětko wupłaća
70 lět dobrowólny wohnjowy wobornik
Bóščanska dobrowólna wohnjowa wobora je lětsa w oktobru swoje 145lětne wobstaće woswjećiła. Njeswačanska wosadna fararka Susanne Aechtner a farar Gabriš Nawka při tej składnosći nowe wohnjowoborne jězdźidło w hódnoće 370 000 eurow poswjećištaj. Samsny dźeń dobrowólneho wohnjoweho wobornika Wernera Bležu za 70lětnu přisłušnosć hašenskemu cyłkej počesćichu. Wón zaspěwa na to staru hymnu hašerjow. Něšto dnjow po tym bu wón znowa wuznamjenjeny, a to na zetkanju zasłužbnych weteranow Budyskeho wokrjesa w Kum- wałdźe wot Budyskeho krajneho rady Uda Wićaza (CDU).
Dźěćetko z tójšto terminami
Drastu za wobornikow skazali
Worklečanscy gmejnscy radźićeljo so lětsa posledni raz zetkali
Worklecy (JK/SN). K swojemu poslednjemu lětušemu posedźenju je so wčera wječor zetkała Worklečanska gmejnska rada. Wjesnjanosta Clemens Poldrack (njestronjan) mjez druhim staw spjelnjenja lětušeho hospodarskeho plana předstaji. Wulki dźěl předewzaćow z plana su zwoprawdźene, financielnje gmejna derje steji a ma spokojacy staw financow na konće, tak zo hodźa so tež klětuše nadawki derje zmištrować.
Wčera móžachu skónčnje wustawki wo zarunanju čestnohamtskeho dźěła w gmejnje wobzamknyć. Prěni naćisk w oktobru njebě spokojacy, wosebje štož nastupaše zarunanje dźěła zastupowaceho wjesnjanosty. Nětko je wšo po přećach a předstawach radźićelow zrjadowane.
Premjera „Zernički“
Budyšin. Nowe serbske ewangelske spěwarske „Zernička“ změja njedźelu, 4. decembra, w 15.30 hodź. na Michałskej farje w Budyšinje swoju premjeru. Po kemšach (14.30 hodź. w Michałskej cyrkwi) předstaji so na slědowacej adwentničce zběrka z wjace hač 100 načasnymi kěrlušemi kaž tež z modlitwami za dźěći a młodźinu zjawnosći. Mjez druhim předleži nětko znaty němski kěrluš Dietricha Bonhoeffera „Von guten Mächten“ prěni raz w hornjoserbskim přełožku. Ilustrowała je „Zerničku“ grafikarka a molerka Jutta Mirtschinowa. Podate gitarowe akordy zmóžnja lochki instrumentalny přewod kěrlušow.
Wo dožiwjenjach w Assisiju
Chrósćicy. Spušćić komfort bohateho staršiskeho domu a jako chuduški prědar Boha slědować – to je Weroniku Žurowu z Lejna na swjatym Franciskusu a swjatej Klarje jimało. Fascinacija za jeju zmužitosć je Weroniku Žurowu dowjedła na městnosć jeju skutkowanja. Wo swojich dožiwjenjach w italskim měsće Assisiju, hdźež běštaj Franciskus a Klara žiwaj, rozprawja wona jutře, sobotu, w 19.45 hodź. w Chróšćanskej putniskej hospodźe.
Chór koncertuje w cyrkwi
Policija (02.12.22)
Adwentnu hwězdu pokradnyli
Wojerecy. Wo nowu dohodownu dekoraciju budźe so wobydler we Wojerecach starać dyrbjeć. Na jeho ležownosći w južnym dźělu města blisko Globusa su njeznaći w nocy na srjedu Ochranowsku hwězdu při carporće pokradnyli a tež hnydom kabl sobu wzali. Cyłkownu škodu trochuja na 100 eurow.
Wupisaja 3 000 eurow za pokiwy
Krótkopowěsće (02.12.22)
Wo noweli Serbskeho zakonja
Budyšin. Prawniski wuběrk Zwjazkoweho předsydstwa Domowiny a Rada za serbske naležnosće Sakskeje stej wčera w Budyšinje druhi raz wo dalšim postupowanju nastupajo nowelěrowanje Sakskeho serbskeho zakonja wuradźowałoj. Rozjimajo wobłuki a temy za polěpšenja rěčachu wo serbšćinje, kotraž ma so na zjawnych popisanjach wšudźe a jenak wulke kaž němčina jewić.
Rěčna kofejownja w Drjedźanach
Drježdźany. Wuknjenski centrum za rěče a kultury Drježdźanskeje Techniskeje uniwersity je wčera wječor „rěčnu kofejownju za słowjanske rěče“ wuhotował. Studentka Lydija Suchec nawjedowaše serbskorěčnu rozmołwu ze serbsce wuknjacymi, wužiwajo wšelake wuknjenske nastorki a materialije. Jeli so poskitk derje přiwozmje, je planowane jón prawidłownje přewjedować.
Wotnětka tež jako e-book
