Chrósćicy. Za adwentnu kubłansku jězbu župy „Michał Hórnik“ sobotu, 26. nowembra, do Błótow su krótkodobnje hišće swobodne městna. Wotjězd je planowany w 10 hodź. při Chróšćanskej Jednoće. Wobdźělnicy wopytaja mjez druhim hodowne wiki w Lubnjowje a podadźa so wottam z čołmom na Lědy. Wotjězd w Lubnjowje budźe w 17 hodź., wječer we 18.30 hodź. w Klóšterskej Nowej Wsy. Bus nawróći so w 21 hodź do Chrósćic. Jězba płaći na wosobu 15 eurow. Swoje zastaranje płaći kóždy wobdźělnik sam. Zajimcy njech přizjewja so e-mailnje pod abo pod telefonowym čisłom 0174 301 02 00.

Radźićeljo wuradźuja

Lejno. Zdźěłanje twarskeho plana za wjacore ležownosće w Časecach budu jedna z temow přichodneho posedźenja gmejnskeje rady Pančicy-Kukow jutře, štwórtk, w 19 hodź. w Lejnjanskim hosćencu. Dale porěča radźićeljo wo nakupje zamkoweje připrawy za serbsku zakładnu Šulu Ćišinskeho. Wobydlerjo su wutrobnje přeprošeni.

W bróžni kradnyli

Ćemjercy. Mała wjes Ćemjercy pola Budyšina so w policajskich rozprawach lědma raz jewi. Nětko pak su tež tam paduši pobyli. Woni zadobychu so minjene dny do bróžnje, z kotrejež pokradnychu wuhotowanje za krosnowanje kaž tež wšelki grat. Po informacijach policije wučinja škoda něhdźe 2 700 eurow.

Znjezboženej žonje pomhali

Běła Woda. Jako pomocnicy w nuzy wopokazachu so policisća a wohnjowi wobornicy předwčerawšim připołdnju w Běłej Wodźe. Na Brechtowej bě starša žona w swojim bydlenju padnyła a sej sama hižo pomhać njemóžeše. Na zbožo móžeše wona nuzowe čisło wolić. Wobornicy wočinichu bydlenje a policisća přepodachu žonu wuchowanskej słužbje.

Plusnikecy (LD/SN). Wobydlerska iniciatiwa za Plusnikečansku skału je sej předewzała, zo stanje so tamniši Čertowski kamjeń zaso z cilom šěrokeje zjawnosće a zo so tam wo přirodnym pomniku a z tym zwisowacej powěsću informuje. Zo móhli serbsku rěč a kulturu prawje wjele zajimcam zbližić, prošachu lětsa w nalěću předewzaće ProStein wo to, teren wokoło Čertowskeho kamjenja tak spřihotować, zo móža zajimcy přirodny pomnik zaso wopytać.