„Běžatu žołmu“ zatwarić
Wojerowska měšćanska rada da zelenu swěcu za dalše twarske naprawy
Wojerecy (AK/SN). Město Wojerecy móže we wobłuku hrodu dalše twarske naprawy realizować. To je tamniša měšćanska rada minjenu wutoru na swojim posedźenju jednohłósnje wobzamkła. Konkretnje dźe wo naprawy k zawěsćenju zastaranja z wodu za hrodowu hrjebju. K tomu słuša instalowanje tak mjenowaneje „běžateje žołmy“ přez zwěrjenc. W hrodźe z měšćanskim muzejom maja dalše schody nastać. Zwjazany z tym je móžny nowy puć, tak, zo by mjez druhim „jednosměrowe rjadowanje“ móžne było. Cyłkowna naprawa z woběmaj předewzaćomaj płaći něhdźe 1,183 milionow eurow. Z toho přewozmje město Wojerecy něhdźe 211 000 eurow, zbytk je ze zamóženja stron a masowych organizacijow prjedawšeje NDR. Tele zamóženje rozdźěleja – na bazy ličby wobydlerjow wotpowědneje komuny – na wuchodoněmske zwjazkowe kraje. Wone dyrbja spěchowanje za naprawy hospodarskeho přestrukturowanja abo za inwesticije na socialnym a kulturnym polu zasadźić. Wobě horjeka mjenowanej předewzaći matej so w lěće 2023 zwoprawdźić.Předpředań zahajena
Hórki/Chrósćicy. Předpředań za kulturnu kermušu Kamjenskeje župy „Michał Hórnik“ a Hórčanskeho wjesneho towarstwa „Při skali“ je zahajena. Wutoru, 15. nowembra, wotměje so na swjedźenskej žurli Smolic statoka w Hórkach koncert ze skupinu PoŠtyrjoch, tomu přizamknje so spěwny wječor. To je předwječor pokutneho dnja, potajkim swobodneho dnja w Sakskej. Zastup inkl. wosebiteho kulinariskeho přikuska płaći w předpředani wosom a při wječornej kasy dźesać eurow. Zastupne lisćiki skazać móža sej zajimcy pola Kathariny Jurkoweje w regionalnym běrowje Domowiny w Chrósćicach pod telefonowym čisłom 035796 96254 abo z e-mailku pod .
Přeprošuja na hłownu SET
Krasny to pohlad na Worklecy, jako so dźiwje husy do powětra ...
„Zastanišćo Łužica“ kreěrować
Wot minjeneho tydźenja přewjeduja při zastanišćach w posłužbowej kónčinje Zaměroweho wobchadneho zwjazka Hornja Łužica-Delnja Šleska (ZVON) naprašowanja. Zaměr toho je, přeća kupcow wo wuhotowanje, a stawje zastanišćow zhonić.
Krótkopowěsće (28.10.22)
Ministerka hospituje w jastwje
Drježdźany/Zhorjelc. Sakska justicna ministerka Katja Meier (Zwjazk 90 / Zeleni) je w Zhorjelskim jastwje přistajenych cyły dźěłowy dźeń přewodźała. Wona přizna dźěło w jastwje jako cyłotowaršnostnje wuznamny nadawk. W Sakskej je aktualnje 2957 zajatych – 171 z nich w Zhorjelskim jastwje.
Kupjel kónc tydźenja zawrjena
Kamjenc. Płuwarnja w Kamjencu budźe wot 1. nowembra nachwilnje zawrjena. Budyski wokrjes bě to jako nošer kupjele wobzamknył. Přičina zawrjena je wotpohlad lutować energiju. Kupjel je tuž aktualnje wot póndźele do pjatka 6.30 do 22.00 hodź wotewrjena. Wužiwanje sawny je w tutym času wot 14 do 22 hodź. móžne.
Žadneho konja wuchowali
Praha/Ulaanbaatar. Mongolski prezident Uchnaagiin Chürelsüch spožči direktorej Praskeho coowa Miroslavej Bobekej „Rjad polarneje hwězdy“ za njewšědne zasłužby zwěrjenca nastupajo wjelelětne prócowanja wo zachowanje dźiwjeho Przewalski-konja. Praski zwěrjenc zwoprawdźi hižo dźewjeć lětadłowych transportow z dźesatkami w Čěskej wuplahowanych koni do zapadneje Mongolskeje.
Kühn nětko na čole
Radwor (SN/MWj). Ze swojim lětušim škotowym turněrom su serbscy seniorojo předwčerawšim w Radworju pokročowali. W tamnišim „Słodenku“ wubědźowaše so 23 kartyplacarjow wo požadane dypki. Do toho běchu Rudijej Šmitej k 80. a Měrćinej Nowakej k 75. narodninam trójnu „Sławu“ zanjesli. Jako najlěpši hrajer wopokaza so w Radworju Wolfgang Kühn, kiž wudoby sej 3 234 dypkow, před Manfredom Höraufom (2 953) a Hermanom Woku (2 489). Kaž hłowny organizator Měrćin Nowak zdźěli, nawjeduje po dźesać hrajnych kołach nětko Wolfgang Kühn před Herbertom Kretschmerom a Siegfriedom Rawu.
Přichodny škotowy turněr serbskich seniorow wotměje so 29. nowembra w Kozarcach.
Strowotu a lutowanje zwjazać
Hdźe a kak energiju a milinu wobmjezować radźićelow zaběra
Worklecy (JK/SN). Tučasnje maja wšitke gmejny wulki nadawk zmištrować: pytać a namakać móžnosće a rozrisanja k zalutowanju miliny a energije za tepjenje. Wosebje potrjechi to twarjenja, kotrež su w bjezposrědnjej zamołwitosći gmejny. Tajkich ma tež Worklečanska gmejna wjacore. Nimo šulow, pěstowarnje a horta je to sportowa hala. Runje ta napara gmejnskim radźićelam hłowybolenje.
Policija (27.10.22)
Kedźbu před dźiwinu
W minjenymaj dnjomaj je so w Budyskim a Zhorjelskim wokrjesu třinaće njezbožow z dźiwinu stało. Z dateje přičiny chce policija wšitkich wobdźělnikow wobchada sensibilizować. Riziko njezboža z dźiwinu je nazymu wosebje wysoke. To zaleži na zadźerženju zwěrjatow, ale tež wobchadnych wobdźělnikow, kaž tež na wjedrje.
Elegantne běłe ptaki we Łužicy
Budyšin. Nazyma we Łužicy je za mnohich jedyn z najrjeńšich počasow: Lěsy so pisanja, dźiwje husy ćahaja a na hatach so nimo dźiwich kačkow, čornjawow a čurkow šěre a samo běłe čaple jewja. Tute elegantne ptaki steja druhdy mjeńšiny dołho na jednym blaku blisko sćiny w niłkej wodźe a łakaja na swój popad. Hdyž maš zbožo, wuhladaš je we wjetšich kolonijach na štomach haćenjow. Tež na bliskich łukach móžeš je wobkedźbować, hdźež zlutniwje so hibajo za myšemi abo dalšimi zwěrjatami pytaja. Hdyž pak z kolesom pozastanješ, so spěšnje zběhnu a wotleća. Po wulkosći su šěrej čapli bliske, ale šwižniše z wosebje dołhej šiju, tak zo skutkuja hišće gracilniše. W powětře je běły ptak ze swojimi pomałymi machotami a składźenej šiju njezaměnliwy. Hišće před někotrymi lětdźesatkami bě to sensacija, hdyž sy w našich hatach jónu běłu čaplu wuhladał. „W lěće 1993 sym prěnju tule fotografował. Wobstatk je so chětro rozšěrił a to hač horje k morju. Před něšto dnjemi sym 70 běłych čaplow na Čerwjenym Łuhu blisko Kobjelnja (Göbeln) zličił“ powěda Hans-Jürgen Flacka.
