Policija (24.10.22)
Paduchow spěšnje wuslědźili
Budyšin. Pjekarnja na Budyskej Seminarskej hasy bě w nocy na sobotu cil najprjedy njeznatych paduchow. Z pjenježneje kasety pokradnych woni 2 200 eurow. Njeskutk je wobstražowanska kamera filmowała. Hišće za čas policajskich přepytowanjow zjewištaj so na městnje njeskutka muž a žona w starobje 22 a 26 lět. Kaž z widejoweho materiala wuchadźeše, móhło so wo skućićelow jednać. Muž měješe wjace hač 2 000 eurow při sebi. W jeju bydlenjomaj namakachu mjez druhim grat za zadobywanja.
Dny hač k jubilejej nětko liča
Z wulkej party countdown hač k 800. róčnicy města zahajili
Kamjenc (BG/SN). Tysacy ludźi dožiwi sobotu na Kamjenskim torhošću swjedźeń, z kotrymž zahajichu poslednje 800 dnjow hač k jubilejej składnostnje 800. róčnicy Lessingoweho města. Wosebity časnik nad hłownym zachodom do radnicy dny nětko wróćo liči, doniž njebudu w lěće 2025 podawk swjećić móc. .
Sobotu popołdnju stejachu předewšěm swójby w srjedźišću. Přetož k zahajenju wustupi „Kamenz can Dance“. Je to hižo wjacore lěta trajacy rejwanski projekt dźěći a młodostnych, kotřiž swojich přihladowarjow stajnje znowa zahorjeja. Mjeztym je projekt kruty wobstatk kulturneho žiwjenja města.
Kompromis za halu wotwidźeć
Prašenje kak sportowu halu w Pančicach-Kukowje w zymskich měsacach wužiwać a předewšěm kak ju tepić a hač scyła, je so zašłe tydźenje wo horce diskusije postarało. Hač budźe jich přichodnje mjenje je dwělomne.
Pančicy-Kukow (SN/MWj). Sportowa hala w Pančicach-Kukowje budźe so w zymskich měsacach po wšěm zdaću jenož na dwěmaj dnjomaj wob tydźeń tepić. Tónle kompromis je wotwidźeć po rozmołwje w dźěłowej skupinje gmejny, wučerjow a staršich. Po zašłym posedźenju gmejnskeje rady so nětko zda, zo móže tež sportowe towarstwo Marijina hwězda z namjetom žiwe być. Jeho zastupjerjo na posedźenju radźićelow namołwjachu, dźěćom, zbrašenym a dorosćenym towarstwa dalše sportowanje zmóžnić.
Drježdźansko-Mišnjanski biskop Heinrich Timmerevers je wčera w ...
Tež raz zakročić
Wokrjesy žadaja sej pomoc
Chorownje, pěstowarnje, šule, kupjele a dźiwadła su we wulkej nuzy
Zły Komorow (dpa/SN). Braniborske wokrjesy žadaja sej w zwisku z energijowej krizu přidatnu pomoc za chorownje, šule a pěstowarnje. „Chorownje dyrbja dale dźěłakmani wostać“, wujasni předsyda foruma wokrjesow Siegurd Heinze (njestronjan) w Złym Komorowje. Wón warnowaše před insolwencami chorownjow, tak kaž je so w Grodku stało. „To njemóžemy sej dowolić.“ Heinze je krajny rada wokrjesa Hornje Błóta-Łužica.
Chorownje maja hladajo na stupace kóšty a přiběrace poćežowanje přez koronapacientow wulku nuzu. Grodkowska chorownja (wokrjes Sprjewja-Nysa) bě planowu insolwencu jako škitnu naprawu zapodała. Braniborske krajne knježerstwo SPD, CDU a Zelenych je klinikam we wjesnych kónčinach přidatnje něhdźe 82 milionow eurow za inwesticije přilubiło.
Krótkopowěsće (24.10.22)
Dobyćerske paski online
Lipsk. Filmowy festiwal DOK Leipzig, kotryž bu lětsa 65. raz wuhotowany, je zakónčeny. „Złoteho hołbja“ za najlěpši dokumentarny pask spožčichu kolumbisko-rumunsko-francosko-němskej produkciji „Anhell69“ Thea Montoye. Pask je wot dźensnišeho runja dźesać dalšim wuznamjenjenym filmam we wobłuku rjadu „DOK Stream“ online přistupny.
Nowe widejo wozjewjene
Budyšin. Skupina Astronawt je wčera wječor nowe hudźbne widejo na YouTube a na Instagramje wozjewiła. Spěw z titlom „Ha widźu-li“ bu zhromadnje z Milenu Wowčerjec jako spěwarku a z orchestrom Serbskeho ludoweho ansambla produkowany. Je to druhe w kooperaciji ze SLA nastate widejo. Tekst swójskeje kompozicije Astronawtow je z pjera Handrija Zejlerja.
Kruwu z pastwy pokradnyli
Policija (21.10.22)
Paduši w hosćencu
Nadźanecy. Njeprošenych hosći mějachu w nocy na srjedu w hosćencu w Nadźanecach (Nadelwitz) pola Budyšina. Korčmar bě hosćenc něhdźe w 23 hodź. zawrěł a so rano w 7.30 hodź. do njeho nawróći. W tym času běchu so njeznaći do lokala zadobyli. Napoje a jědźe pak běchu jim po wšěm zdaću wšojedne. Město toho wšitke rumnosće přepytachu a wzachu po informacijach policije něhdźe 600 eurow pjenjez sobu. Nimo toho načinichu na městnje njeskutka něhdźe 1 500 eurow wěcneje škody.
Póndźelu započnu asfaltować
Radźićeljo rozsud wjesnjanosty wo twarskich dźěłach wobkrućili
Pančicy-Kukow (SN/MWj). Twarske dźěła na hłownej dróze w Kanecach maja přichodny tydźeń widźomnje pokročować. Póndźelu mjenujcy chcedźa dalši dźěl dróhi asfaltować započeć. Móžno, zo změja wutoru hižo dočinjene. Tole zdźěli wjesnjanosta Markus Kreuz (CDU) na wčerawšim posedźenju gmejnskeje rady Pančicy-Kukow.
Po dorěčenju z Drježdźanskej planowanskej firmu je wjesnjanosta nadawk we wobjimje wjace hač 35 000 eurow přepodał Biskopičanskej dróhotwarskej firmje. Wčera su gmejnscy radźićeljo tónle rozsud takrjec wotžohnowali. Trěbne tele postupowanje bě, dokelž bě poskitk firmy jenož hač do 4. oktobra płaćiwy. Tón dźeń bě wjesnjanosta runje hakle z dowola wróćo a je dobu wo štyri tydźenje podlěšił. Dokelž pak krótkodobnje žane posedźenje gmejnskeje rady zwołać njemóžachu, dyrbješe wjesnjanosta naležnosć w zajimje gmejnje sam rozsudźić.
Countdown za wulki jubilej města
Kamjenc (SN). Z wulkim swjedźenjom zahaji město Kamjenc jutře, sobotu, 800 dnjow trajacy countdown hač k swojemu jubilejej w lěće 2025, hdyž swjeća 800. róčnicu prěnjeho naspomnjenja. Hižo wot 2020 traja přihoty za měšćanski jubilej. Jutře zwoprawdźa nětko prěnju konkretnu projektowu ideju, hdyž zahaja 800 dnjow trajacy čas hač k spočatkej poprawneho swjedźenskeho lěta.
Wot pózdnjeho popołdnja su jutře wšitcy na Kamjenske torhošćo přeprošeni. Tam čaka na zajimcow pisany program z live-hudźbu, wohnjostrojom a wězo zhromadne zaswěćenje countdownoweho časnika nad hłownym zachodom do radnicy. Wo ćělne derjeměće budźe tohorunja postarane. W 17 hodź. wustupi rejwanski projekt „Kamenz can Dance“. Hodźinu pozdźišo zahraje kapała „P70“ popularne hity znatych kapałow z NDR, kotrež su dźensa runje tak woblubowane. Tomu přizamknje so double spěwarki Helene-Fischer „Laura“. Titule němskeho šlagroweho stara su zawěsće kóždemu znate a sobu spěwanje je wuraznje witane.
