Socialny měr je akutnje wohroženy
Město Wojerecy kaž tež tamniša měšćanska rada stej so rozsudźiłoj, zjawny list politikarjam Zwjazka a Swobodneho stata Sakskeje pósłać. W nim žadaja sej podpisarjo za komuny wolóženja w energijowej krizy.
Wojerecy (AK/SN). Wone pokazuja při tym na aktualne nuzy energije a na hrožace wohroženje socialneho měra. List měri so na zwjazkowe a krajne knježerstwo a wšitkich zapósłancow zwjazkoweho a krajneho sejma z regiona. „Wočakujemy k zachowanju socialneho měra wobšěrny koncept na zwjazkowej a krajnej runinje k zmištrowanju krizoweje situacije a nic jeničcy akcije k wolóženju jednotliwych skupin potrjechenych. Zo by energija dale zapłaćomna była, měli za wěsty čas hornju mjezu za wužiwanje płuna a miliny za wšitkich přetrjebarjow postajić. Statne wotedawki na milinu, płun, bencin a diesel maja so na europski minimum znižić, zwurazni wyši měšćanosta Torsten Ruban-Zeh (SPD) wčera na posedźenju měšćanskeje rady. Wón je list zhromadnje z měšćanostu za šulu, kulturu a socialne Měrkom Pinkom a předsydami frakcijow w měšćanskej radźe podpisał.
Krótkopowěsće (28.09.22)
Zakónča „BETA-konferencu“
Běła Woda. Iniciatiwa „Kreatiwna Sakska“ zahaji dźensa z diskusiju „Kulturne a kreatiwne hospodarstwo w strukturnej změnje“ zakónčenje lětušeje „BETA-konferency“ w Běłej Wodźe. Hač do soboty slěduja mjez druhim „Serbski brunch“, prezentacija „Łužiskich typow“ a koncertaj skupiny Serbska reja a MC Anki.
Jan Faktor wuznamjenjeny
Braunschweig. Čěsko-němski awtor Jan Faktor je z lawreatom lětušeho Literarneho myta Wilhelma Raabeho, spožčeneho wot města Braunschweiga a rozhłosoweho sćelaka Deutschlandradio, dotěrowane z 30 000 eurami. Wuznamjenjenje spožča jemu za jeho aktualny roman „Trottel“, kotryž je z „eksemplariskim přikładom dotalneho spisowaćelskeho tworjenja awtora“.
Hranicu dočasnje stražować
Policija (27.09.22)
Dyrbja z pokutu ličić
Budyšin. Zastojnicy policije, skutkowacy na awtodróze A 4 mjez Drježdźanami a Zhorjelcom su zwěsćili, zo so wšitcy šoferojo na zakaz jězdźenja z nakładnym awtom na njedźelach njedźerža. Tak su zašłu njedźelu sydom přeńdźenjow zwěsćili. Ani jedyn šofer njeměješe wosebitu dowolnosć za to, zo smě njedźelu jěć. Potrjecheni mějachu suche mlokowe wudźěłki, piwo, pakćiki, regale z metala, mašiny a telewizory nakładowane, jedne bě samo bjez tworow po puću. Nětko maja z pokutu ličić.
Domske so sypnyło
W Budyskim starym měsće je so wčera připołdnju w 12.25 hodź. domske sypnyło. Jedna so wo njewobydleny dom při wrotach na Mikławšk 3. Potrjecheny z toho je zadni dom. Na zbožo njebu nichtó zranjeny. Wohnjowa wobora, policija, měšćanski twarski dohlad a Techniska pomocna słužba (THW) su na městnje byli. Wobydlerjo susodneju domow, čo. 2 a 4, su swoje bydlenje nachwilnje wopušćić dyrbjeli, pozdźišo pak so zaso domoj nawróćichu. Po přepytowanju statikarjow a fachowcow su wrota při Mikławšku bjez wobmjezowanja dale wužiwajomne. W přichodźe maja so tamniše twarjenja wobstajnje na móžne puknjenja pruwować.
Foto: wohnjowa wobora Budyšin
Pjenjezy za wobydlerjow wužiwać
Łaz (AK/SN). Łazowska gmejna chce srědki krajneje pawšale Swobodneho stata Sakska we Wulkich Zdźarach a Koblicach zaměrnje zasadźić. Tele pjenjezy słuža předewšěm k zesylnjenju wjesnych kónčinow. Tole je Łazowski wjesnjanosta Thomas Leberecht (CDU) njedawno na posedźenju gmejnskeje rady potwjerdźił. Gmejnscy radźićeljo su tuž jednohłósnje wobzamknyli, zo maja so něhdźe 3 600 eurow z tutych srědkow w mjenowanymaj wjeskomaj wužiwać. Z tutym postupowanjom su woni próstwje Hórnikečanskeje wjesneje rady z lětušeho 20. julija wotpowědowali.
We Wulkich Zdźarach chcedźa na mostowym wobłoženju přez Čornicu štyri metalowe ornamenty w formje kołpa připrawić. Za předźěłanje a popisanje wotewrjeneho železniskeho woza budu čerstwu barbu wobstarać. Lora steji při wjesnym zachodźe do Wulkich Zdźarow ze směra Wojerecy. Před ewangelskej cyrkwju je předwidźane třěchu kolesowarskeje a pućowanskeje chaty dotwarić.
Dalše pjenjezy su za naprawu w Koblicach wotpohladane. Tam chce wjesna rada přestrjeń něhdźe třoch kwadratnych metrow při starej hašerni plestrować dać.
Přednošk je wabjacy był
Zwiski mjez Minakałom a Ochranowom njejsu dźensa hižo nošne
Minakał (CS/SN). Wosebity poćah, kotryž Minakał z Ochranowom zwjazuje, běše zańdźeny pjatk tema derje wopytaneho přednoška w Minakałskej cyrkwi. Dr. Lubina Malinkowa rysowaše, zo běše Ochranow, kotryž bu před 300 lětami załoženy, tehdy jara dynamiske městno. Ludźo wšak putnikowachu tam z nabožneho přeswědčenja a wzachu je do swojich wsow sobu: Tu su potom domjace kruhi, tak mjenowane society załožili, kotrež wopřijachu dźesać do 130 wosobow. Mnozy zemjenjo kaž Friedrich Caspar von Gersdorf, kiž bě wobsedźer ležownosćow wokoło Klukša a Lichanja, su Ochranowske hibanje podpěrali. 1738 su Klukšanski seminar załožili, w kotrymž wukubłachu fararjow na polu pietistiskeje nabožiny. Z tohole seminara je wuchadźał farar Johann Benada, kotryž skutkowaše wot lěta 1744 hač do 1770 w Minakale. Wón bě so sylnje za Ochranowske hibanje zasadźował a mnohe spisy do serbšćiny přełožował kaž Zinzendorfowe narěče na diasporu. Tehdy mjenujcy běchu měnjenja, zo njemóža wšitcy, kotřiž Ochranowskej wučbje přiwisuja, so tež w Ochranowje zasydlić.
Na farmje warić
Wojerecy. We Wojerowskim centrumje za zežiwjenje a zela Křesćansko-socialneho kubłanskeho skutka wotměwaja jutře dalše zarjadowanje w rjedźe „Klewernje a kreatiwnje warić“. Pod hesłom „Nazymska kuchnja połna witaminow“ nastanje na dźěćacej a młodźinskej farmje tři- do štyridźělny meni. Předewšěm z regionalnych a sezonalnych produktow móža zajimcy wšelke jědźe warić. Štóž chce so wobdźělić, njech so pod telefoniskim čisłom 03571 979164 abo emejlnje pod přizjewi. Popłatk płaći sydom eurow.
Na čitanje do Hrodźišća
Něhdźe třiceći meblow, kotrež běchu ze staroměšćanskeho ...
Korso čołmow na Lědach hinak
Krótkopowěsće (27.09.22)
Płaćizny wobmjezować
Drježdźany. Drježdźanska rjemjeslniska komora ma płunowy popłatk za wopačny a žada sej hladajo na aktualnu energijowu krizu, zo płaćizny za energiju wobmjezuja, zdźěli wčera prezident rjemjeslniskeje komory Jörg Dittrich. Njeměli hižo čas brojić a pomocne programy zdźěłać. Połoženje je chutne a tuž je jasny kurs ze zmužitymi rozsudami trěbny.
Pjenjezy za saněrowanje
Choćebuz. Braniborska ministerka za kulturu a wědomosć Manja Schüle (SPD) wopyta jutře Choćebuski centrum za čłowjeske prawa. Tamnišej jednaćelce Heide Schinowsky chce wona spěchowanske srědki we wobjimje 210 000 eurow přepodać, tak zo hodźi so murja bywšeho jastwa zawěsćić a ponowić. Wot lěta 2012 je w bywšim jastwje wopomnišćo zarjadowane.
Swjedźeń žadneho štoma
