Kup nětko, płać pozdźišo
W interneće sej něšto kupić je mjeztym něšto cyle wšědne. Štož bě před 20 lětami hišće katalog z drastami abo tworami, je dźensa online-shop. Štož rěkaše tehdy hišće nakup na zličbowanku, mjenuje so dźensa na přikład „Kup nětko, płać pozdźišo“.
Krótkopowěsće (09.09.22)
Šiman so w LND wobhonił
Budyšin. Na městnje je so zapósłanc Sakskeho krajneho sejma Marko Šiman (CDU) dźensa w Ludowym nakładnistwje Domowina wo aktualnje přiwótřenym połoženju informował. Z jednaćelom Symanom Pětrom Cyžom je Šiman mjez druhim wohroženje Serbskich Nowin jako wječornik rozjimał, so za trěbnej podpěru LND wobhonił a na to tež na krótku wuměnu myslow w redakciji pobył.
Powerserb wotprajeny
Wotrow. Lětuše wubědźowanje Powerserb we Wotrowje bu wotprajene. Jako přićinu mjenujetej zarjadowarjej, młodźinski klub a Serbske młodźinske towarstwo Pawk, zo njejstej „w młodźinskich cyłkach motiwaciju zwěsćiłoj, sobu skutkować“. Zdźěla njejstej ani „wotmołwu młodźinskich klubow dóstali“, kaž w zhromadnej nowinarskej zdźělence rěka.
Změna na čole
Namołwjeja k rozmyslowanju wo dalšim dźěle
Róžant (JK/SN). Towarstwo „Naša Knjeni na Lipje“ w Róžeńće je poměrnje mało znate a lědma so wo nim w medijach pisa. Załožili su je w lěće 2012 tehdyši čłonojo Ralbičanskeje wosadneje rady ze zaměrom, so prócować wo to, zo so putniska cyrkej w Róžeńće zaso ze žiwym putniskim městnom stanje. Hłownje měło so to stać přez zhromadnu modlitwu a zhromadne prócowanje wšitkich česćowarjow Maćerje Božeje. K tomu je towarstwo zarjadowało měsačne modlenje na kóždej poslednjej wutorje měsaca. Tute modlenje je so wuwiło k dobrej tradiciji a dźeń a wjace ludźi so wobdźěla. Nimo toho wěnuja so čłonojo towarstwa přihotam putnikowanjow w Róžeńće a su hłowny organizator za wuhotowanje sobotnišich Božich słužbow w Róžeńće pod hesłom „Za naš lud a kraj“.
Na babylěćo do Delan
Ralbicy. Z wubědźowanjom wohnjowych woborow započnje so jutře w 20 hodź. Ralbičanske babylěćo, kaž tamniši wjesny swjedźeń mjenuja. Přizamknjetej so hudźba w stanje a wohnjostroj. Sobotu wot 20 hodź. dožiwja wopytowarjo pisany program Ralbičanow a k tomu reje za kóždu starobu. Po njedźelnišim rańšim piwku prezentuja konjacy sport. Popołdnju přeprošuja na kulturny program z kofejom a předstaja wot 16 hodź. historiske jězdźidła. Na wšěch dnjach předawaja losy za tombolu. Prěnje myto je kofejowy awtomat. Ćělne derjeměće je z jědźu a napojemi zawěsćene. Zastup je na wšěch dnjach darmotny.
Serenada w zelenym
Stróža. Do sobotnych wikow přirody w Stróži wotměje so tam jutře, pjatk, w 19 hodź. serenadowy koncert w zelenym. Pod hesłom „Kak klinči Kocor w lěće 2022“ je skupina „Trio a kumple“ pisany program zestajiła. Paleta saha wot jazza přez pop hač k elektroniskej hudźbje. Zastup je darmotny.
Pčołki nima doma, ale w lěsu
Nimo dalšich insektow su předewšěm pčołki za přirodu nimoměry wažne. Často sej małe stworjenčka prawje wažić njewěmy. Tohodla so w lětnjej seriji na lokalnej stronje lětsa pilnym pčołkam a pčołarjam wěnujemy. (20/kónc)
Hdyž so w Hózku nimo nahladneho bywšeho dwórnišća do lěsa do směra na Wulke Ždźary podaš, widźiš tam dźensa hišće derje, kak wjedźechu něhdy kolije železniskeje čary wot Budyšina do Wojerec. Wot septembra 1967 tam wosobowe ćahi hižo njejězdźa, pjeć lět pozdźišo čara tež za nakładne ćahi hižo trěbna njebě.
Železne wrota móža ponowić
Tuchorski kěrchow w Budyšinje 15 000 eurow pomocy dóstał
Budyšin (JüM/SN). Šěsć železnych wrotow wot šěsć rownišćow na Tuchorskim kěrchowje při Lubijskej dróze w Budyšinje móža nětko skónčnje restawrować. Předwčerawšim přepodachu zastupjerjo SachsenLotto a Němskeje załožby za pomnikoškit (DSD) symboliski šek we wobjimje 15 000 eurow. Wotpowědne symboliske spěchowanske zrěčenje měještaj Budyska kuratorka DSD Christa Kämpfe a regionalny nawoda SachsenLotto Rene Röder sobu a přepodaštaj jón fararjej Christianej Tiede a šefej kěrchowa Robertej Eckhardtej. Jašćanski kowar Michael Kaczmar železne wrota w swojej dźěłarni ponowja. Dohromady płaći saněrowanje 42 000 eurow. Dalše dary su potajkim rady witane.
Pčołarjenje nam zbližił
Krótkopowěsće (08.09.22)
„Hłowna“ w Delnjej Łužicy
Budyšin. Po wuradźowanju prezidija Domowiny namjetuje třěšny zwjazk serbskich towarstwow, swoju přichodnu hłownu zhromadźiznu klětu po jutrach w Delnjej Łužicy wuhotować. Nimo toho postajichu mjez druhim delegatow za kónc septembra wotměwacy so kongres Federalistiskeje unije europskich narodnych mjeńšin FUEN.
Pyta rozmołwu z wobydlerjemi
Drježdźany. Sakski ministerski prezident Michael Kretschmer (CDU) pyta dialog z wobydlerjemi. Kaž sakska statna kenclija zdźěli, ma być dźensniša rozmołwa z Riesaskim wyšim měšćanostu zazběh do rjada „MK direkt“ w lěće 2022. Kretschmer běše do pandemije na rozmołwne formaty pod hesłomaj „Sakska rozmołwa“ abo „Ministerski prezident direktny“ přeprosył.
Powjaznica změni mějićela
W starym měsće so zabawjeli
Budyšin (CS/SN). Na 4. staroměšćanskim festiwalu minjeny kónc tydźenja w Budyšinje su so babylěćne wjedro a 400 sobuskutkowacych wo to starali, zo móžachu so wopytowarjo wot pjatka do njedźele zabawjeć. Tak je so hród Ortenburg na srjedźowěkowske torhošćo z keklerjemi, rjemjeslnikami a muzikantami změniło. W Serbskim muzeja bě wustajeńca „Party w 21. lětstotku“ widźeć. Rozwalinu mnišeje cyrkwje bě towarstwo wjesnych žonow nazymsce wupyšiło. Tam njeposkićachu jenož kofej a tykanc, ale tež koncerty. Při Michałskej cyrkwi pokazachu dźiwadłowy kruch wo hobru Sprjewniku.
Cyle w znamjenju klankodźiwadła steješe porno tomu pod hrodom statok klankarja Eckeharta Heute, kotryž bě sej na klankodźiwadłowy swjedźeń tójšto hosći přeprosył. W měšćanskej bibliotece bě powědace dźiwadło Kamishibai dožiwić a na dworje biblioteki běchu drjeworězbarske wudźěłki Borbory Wiesnerec wustajene.
