Hrubjelčicy (MBa/SN). Při najrjeńšim babylěćnym wjedrje wotmě so minjenu sobotu druhi raz dworowy swjedźeń na Jaworkec/Maćijec statoku w Hrubjelčicach. Po rjanej tradiciji poda so k zazběhej skupina staršich z dźěćimi na pućowanje, kotrež wjedźeše na hrodźišćo pola Dobruše. Po nawróće do Dobruše sćěhowaše ekumeniska nutrnosć, kotruž swjeće­štaj tachantski dekan Wito Sćapan z Budyšina a serbski superintendent Krystof Rummel z Hodźija. Nutrnosći přizamkny so zhromadny wječor, kotryž wobrubi na zabawne wašnje dujerska kapała Horjany. Repertoire mjez klasikarjemi a modernišimi titulemi njewabješe hosći jenož do čumpanja, ale samo do rejwanja. Něhdźe 70 wopytowarjow wšěch generacijow da sej serbske a mjezynarodne štučki lubić. Dźěći mějachu po pućowanju wabjace móžnosće so na statoku zabawjeć, wosebje suwadło z piwowym kašćikom wopokaza so jako atrakcija.

Budyšin (SN/bn). Internetny forum Załožby za serbski lud Digiserb bě z hosćićelom přednoška a diskusije „Serbske šmóratko – móžnosće, staw a wizija“, wotmětymaj minjenu srjedu na mjeztym dospołnje w hornjoserbšćinje posłužujomnej platformje Jitsi. Społnomócnjeny załožby za digitalizaciju Daniel Zoba předstaji něhdźe 20 zajimcam na přikładźe swójskeho mobilneho telefona, kak hodźało so „serbske šmóratko“ přichodnje maćernorěčnje zarjadować a posłužować. „Šmóratko je a wostanje nadal najwažniši nastroj za wužiwanje digitalnych poskitkow. Idealnje by było, hdyž móhli wšitke kroki wot zaswěćenja hač k hasnjenju serbsce přewjesć, štož by wutworjenju rěčnych rumow tež we wirtuelnym swěće polěkowało“, Zoba podšmórny. Zo njejedna so wo prostu wiziju dopokaza wón na zakładźe posłužowanskeho powjercha dźěłoweho systema ­LineageOS, kotrež złožuje so jako dźěl tak mjenowaneho opensource-projekta na software Android. Julian Nyča a Gregor Wieczorek běštaj přełožkaj za standardne aplikacije do hornjo- resp.

Z terenom bywšeho hosćenca wosrjedź Pančic-Kukowa maja tam městnosć, kotraž w blišej wokolinje najskerje swojeho runjeća pyta. To znajmjeńša wobkrućichu mnozy, kotřiž běchu minjeny pjatk na premjeru synchronizowaneho dźěćaceho filma „Mała wjera“ přišli. Před kulisu zdźěla tykowanych domow na Kimbarku na kinowu płachtu hladać, k tomu klóšterske zwony słyšeć a sej prosće rjany wječor lubić dać, bě wosebite dožiwjenje. Ze swo­jimi skłoninami a rozdźělnymi wysokosćemi so areal za to wuběrnje hodźeše. ­Tele městno ma zawěrno potencial, zo móhli so tam w přichodźe cyle rozdźělne zarjadowanja wotměć. Směmy tuž wćipni być, kotre ideje so tam w přichodźe hišće zrodźa. Derje, zo su nětko župa „Michał Hórnik“, Pančičanski młodźinski klub a tudyši kružk młodych swójbow farskeje wikarije za jedyn postronk ćahnyli a z kinowym wječorom ze serbskej premjeru prěnje wjetše zarjadowanje organizowali. Marian Wjeńka

Udo Wićaz wuzwoleny

Połčnica. Na zjězd Budyskeho wokrjesneho zwjazka CDU je wjace hač 90 čłonow minjeny pjatk do Połčnicy přichwatało. Woni wuzwolichu za noweho předsydu Uda Wićaza, kotremuž zastojnstwo ze 94,25 procentami hłosow dowěrjachu, a nowe wokrjesne předsydstwo. Dotalny předsyda Michael Harig rozžohnowaše so z rozprawu dźěławosće zwjazka, kotryž bě 13 lět dołho nawjedował.

Bahno znowa wožiwić

Ćisk. W Ćiskowskim holanskim bahnje zahaja dźensa rewitalizaciju. Do hrjebjow připrawja fachowcy pochowe plomby z bahnowych płoninow. Je to dźěl projekta krajneho zarjada za wobswět, ratarstwo a geologiju (LfULG) a statneho zawoda Sakski lěs. Z projektom areal po wjacorych krokach sensibilizować a znowa powłóžnjeć.

Žurnalistow nadběhowali