Krótkopowěsće (22.09.22)
Evelyn Richter w Düsseldorfu
Düsseldorf. Prěnje wobšěrne předstajenje tworjenja fotografki Evelyn Richter w zapadoněmskim muzeju je nětko w Düsseldorfskim Palasće za wuměłstwo widźeć. W Budyšinje rodźena a loni w oktobrje w starobje 91 lět zemrěta wuměłča je žiwjenje ludźi we wuchodźe kritisce kaž empatisce dokumentowała. Wustajeńca je hač do januara 2023 přistupna.
Wo Domowinje přednošował
Kosarzyn. Wo poćahach Domowiny do wukraja je jeje referent za kulturne naležnosće a wukraj Clemens Škoda wčera mjezynarodnym projektowym zamołwitym w Leaderowym regionje Sprjewja-Nysa-Bobr přednošował. W Kosarzynje blisko Gubina je Škoda mjez druhim čłonstwo Domowiny w mjezynarodnych organizacijach, asociěrowane towarstwa a partnerske komunow předstajił.
Christoph Schroth njeboh
Njezapomnity dźeń na motorskim
Wuježk (SN). Přećeljo motorskich Hornja Łužica su sej zašły kónc tydźenja mjeztym 15. raz z dźěćimi a młodostnymi, kotřiž w dźěsćownjach bydla, wulećeli. Na 69 mašinach – mjez nimi motorske, triki, dwaj trabijej a přewodne jězdźidła – běchu hólcow a holcy, přebywacych we wobydlerskich skupinach Arche we Wuježku, Kočicy a Markkleebergu na zhromadnu jězbu přeprosyli. To zdźěli rěčnica za zjawnostne dźěło sakskeho towarstwa Kinderarche Sachsen e. V. Birgit Andert. „Za naše dźěći je jězba z bikerami wjeršk lěta“, rjekny nawodnica zarjadnišća we Wuježku Kristina Jöhling.
Zahajili su jězbu w Budyšinje, potom su we Wuježku snědali. Dźěći a młodostni mějachu praskotace jězdźidła za napjatu wěc. Po krótkim dešću su so wšitcy na turu po Hornjej Łužicy podali. Prěnju přestawku mějachu na Kulturnej kupje Einsiedel, hdźež bě chwile sej ležownosć wotkryć a hrajkać. Po swačinje dźěše dale do klóštra Marijiny doł pola Wostrowca. Po nawróće do Wuježka su dźěći z Markkleeberga z kulturnym programom zawjeselili. Z tradicionalnym zhromadnym grilowanjom je dźeń wuklinčał.
Policija (21.09.22)
Kolesy z kólnje pokradnyli
Lejno. Njeznaći su póndźelu rano mjez třoch a štyrjoch w Lejnje w gmejnje Halštrowska hola dwě elektrokolesy z kolesoweje kólnje kradnyli. Paduši su so z namocu do twarjenja zadobyli a kolesy w hódnoće něhdźe 1 600 eurow sobu wzali. Zdobom su wěcnu škodu něhdźe tysac eurow zawostajili. Nětko so Wojerowska kriminalna policija z padom zaběra.
Rozsudy, kotrež móža boleć
Njeswačanska gmejnska rada chce zajimy sprawnje zastupować
Njeswačidło (JK/SN). Po tym zo bě so Njeswačidlska gmejnska rada za to wuprajiła, hižo na nowotwarje pěstowarnje dale njedźěłać, wěnowaše so w minjenym posedźenju aktualnym problemam dźěćaceho přebywanišća „Maks a Moritz“. Po wotličenju zawodnych kóštow Němskeho čerwjeneho křiža (DRK) jako nošerja za lěto 2021 měješe gmejna njewočakowano zwyšene wudawki zapłaćić. Předewšěm běchu to kóšty za personal kaž tež wo tójšto wyše energijowe wudawki hač dotal. Gmejna dyrbi na tele postupowanje reagować. Tuž je financny wuběrk naćisk wo zwyšenju staršiskeho popłatka zhotowił, kotryž měł wot 1. oktobra tohole lěta płaćić. To je mjez radźićelemi kontrowersnu diskusiju wuwabiło. W njej wujewi so mjez druhim prašenje, hač je gmejna scyła zamołwita za kubłanske a zastaranske nadawki abo hač je to skerje naležnosć a winowatosć stata. Tón měł so po měnjenju radźićelow wo optimalny staw dźěćacych dnjowych přebywanišćow, trěbny personal a wosebje wo wobhospodarjenje a nowotwar zarjadnišćow starać.
Bórze móžeš w synje přenocować
Na Krabatowym dworje w Jitku, w ródnej wsy dobroćiweho kuzłarja, chcetaj wobhospodarjej Cornelia a Sven Helmec w regionje dotal njewšědnu móžnosć přenocowanja stworić.
Jitk (UM/SN). Z mjenom „Krabatowy dwór“ sadźetaj Helmec mandźelskaj znamjo za Krabatowy region, kotrehož centrum je Helmec statok jako znaty ratarski zawod. Wot lěta 2012, po Helly Helm, statok wobhospodaritaj. „Ratarskej produkciji, kotruž smój wobchowałoj a rozšěriłoj, smój z wutworjenjom jěchanskeho dwora přidatny powabk dałoj“, powěda Sven Helm. W tymle zwisku je dwór wosebje za přećelow koni kóždeje staroby přićahliwy. Zajimcy maja trening w jěchanju, dawaja swoje konje do pensije abo so na jěchanskich prózdninach wobdźěleja. Tež na ležownosći přenocować je hižo móžno, dotal pak jenož w swójskim bydlenskim mobilu abo stanje. Helmecy su tež pokiwy dali, hdźe móhli zajimcy w blišej wokolinje přebywanišćo namakać. „Přiwšěm su nam hosćo stajnje prajili, zo chcedźa rady pod krutej třěchu na našim statoku přenocować. A to chcemy bórze zmóžnić“, Sven Helm rozłožuje.
Na Chróšćanskej nawsy knježi tuchwilu předewšěm dźěłowa ...
Krótkopowěsće (21.09.22)
Z nowym předsydu
Hamor. Budyski krajny rada Udo Wićaz (CDU) je nowy předsyda Zaměroweho zwjazka Łužiska jězorina Sakskeje. Čłonojo zaměroweje zhromadźizny su jeho na posedźenju wčera w Hamorje jednohłósnje za naslědnika Michaela Hariga wolili. „Mój zaměr je, našu domiznu žiwjenja hódnu wutworić a wuwić“, Wićaz po wólbach wujasni.
Lisćinu kandidatow wozjewili
Frankfurt n. M. Bursowe towarstwo němskeho knihikupstwa je tak mjenowanu shortlist, potajkim finalnu lisćinu kandidatow za lětuše Němske knižne myto wozjewiło. Wuhlady na wuznamjenjenje maja Fatma Aydemir, Kim de l’Horizon, Kristine Bilkau, Daniela Dröscher, Jan Faktor a Eckhart Nicke. Dobyćerce resp. dobyćerjej spožča myto na Frankfurtskich knižnych wikach.
Morjene wowcy pokazali
Wjeselo a zahoritosć za wohnjowu woboru budźić
We Wojerowskim wjesnym dźělu Brětnja/Michałki pěstujetej dobrowólnej wohnjowej woborje wobstajnje a konsekwentnje dorostowe dźěło. Wonej dźěłatej při tym stajnje hromadźe.
Brětnja/Michałki (AK/SN). Stefan Kockrick, kiž je wot lěta 2019 nawoda wohnjoweje wobory w Brětni, potwjerdźi zašły štwórtk, zhladujo na 25lětny jubilej wobstaća tamnišeje młodźinskeje wohnjoweje wobory jeje wuspěšny angažement. „Wona je wažna kowarnja za dorost we wohnjowej woborje“, wón rjekny. Tuchwilu Brětnjanskej wohnjowej woborje 31 dźěći a młodostnych w starobje wosom do 15 lět přisłuša. Někotři přichadźeja tež z Michałkow. Runje tak wobsteji dźěćaca wohnjowa wobora Michałki z aktualnje dźewjeć holcami a hólcami w starobje pjeć do sydom lět. Někotři z nich pochadźeja z Brětnje. Tak so wobě wsy stajnje we wohnjowobornym dźěle mjez sobu wožiwjatej a wudospołnjatej.
Policija (20.09.22)
Lawba w płomjenjach
Kamjenc. Na Kamjenskej Winowej horje dyrbjachu njedźelu rano tři wohnjowe wobory woheń hašeć. Sćěny lawby běchu po hašenju połne sazow. Prawdźepodobnje je woheń tykački dla wudyrił. Wěcna škoda wučinja něhdźe 200 eurow.
Čorny bike pokradnyli
Wojerecy. Njeznaći su w nocy wot soboty na njedźelu pokradnyli we Wojerecach koleso za transport tworow Riese & Müller. Čorny bike je stał w kolesowej pincy při torhošću. Škoda wučinja něhdźe 6 300 eurow. Kriminalna policija nětko slědźi.
Na „Rěčnu swětłownju“
Wojerecy. Předsydstwo župy „Handrij Zejler“ přeprošuje wšěch zajimcow na přichodnu „Rěčnu swětłownju“ štwórtk, 22. septembra, we 18 hodź. do bróžnje Wojerowskeho domu Domowiny. Nimo serbskeje bjesady pokazaja film wo poslednim serbskim kwasu w Ćisku z lěta 1953. Dalša tema budźe kermuša. Rjad zetkanjow „Rěčna swětłownja“ hodźi so wosebje tež za serbsce wuknjacych.
Kursy za staršich
Budyšin. Budyska žónska iniciatiwa w Kamjentnym domje přeprošuje na nowy rjad zarjadowanjow za staršich. Te wotměja so w ramiku projekta „Familie leben – Swójbu žiwi być“ w kooperaciji z Budyskim žónskim centrumowww.fbs-biw.de.
