Hraja zaso škot
Radwor. Přichodny škotowy turněr serbskich seniorow wotměje so jutře, wutoru, w 14 hodź. w Radworskim „Słodeńku“, něhdyšej lutowarni napřećo cyrkwi. Nowačcy su kaž stajnje lubje witani. Dalši turněr budźe w nowembru w Budyšinje, kaž hłowny organizator Měrćin Nowak zdźěli.
Pjenjezy za pišćele přepodali
Wojerecy. Jězorinowa załožba Wojerowskeje chorownje je tele dny z nahladnej sumu pjenjez ponowjenje pišćelow Wojerowskeje katolskeje cyrkwje na Karla Liebknechtowej podpěrała. Čłonaj załožboweje rady Thomas Delling a Uwe Blazejczyk přepodaštaj zastupjerjam wosady symboliski šek w hódnoće 45 000 eurow. Sobudźěłaćerjo Drježdźanskeje pišćeletwarskeje firmy Jähmlich nětko pišćele wurjedźa, trěbne dźěle narunaja a instrument znowa hłosuja.
Wot dźensnišeho puć ponowjeja
Budyšin. Na Hasy Käthy Kollwitz w Budyšinje su dźensa mjez dróhomaj Při rězarni a Jordanowej asfalt ponowjeć započeli. Dźěła traja po wšěm zdaću tři tydźenje, a to w dwěmaj wotrězkomaj. Přijězd do centruma zarjadow pak wostawa dale móžny, informuje měšćanske zarjadnistwo.
Nasyp žadyn škit njepřinjese
Njebjelčanske spjatnišćo wot přichodneho měsaca přetwarja
Njebjelčicy (SN/MWj). Znajmjeńša pjatnaće lět w Njebjelčicach stajnje zaso raz wo tym rěča, kotry přichod drje tamniše spjatnišćo změje. Wot lěta 2017 traje jednanje w krajnej direkciji, nowy nasyp twarić a spjatnišćo zachować. Nětko pak je krótkodobnje cyle hinaše wuwiće wotwidźeć. Konkretne plany je Njebjelčanskim gmejnskim radźićelam na jich zašłym posedźenju nawoda Budyskeje wotnožki krajneho zarjada za rěčne zawěry (LTV) Stefan Jentsch rozłožił.
Wosrjedź Europy a nic na kromje
Budyšin (SB/bn). Němsko-francoski wuběrk (DFA) w Radźe gmejnow a regionow Europy (RGRE) je lěta 1988 wutworjeny gremij, kotryž bu z wotmysłom załoženy, poćahi mjez woběmaj krajomaj na komunalnej runinje pohłubšeć a rozšěrić. Minjeny tydźeń štwórtk a pjatk wotmě wuběrk swoje rjadne posedźenje prěni raz w Budyšinje. „Dźakuju so koleze Alexanderej Ahrensej, so smědźachmy tu z hosćom być. Nastupajo kulturu wopominanja móžemy tójšto wot Budyšina a regiona třikrajoweho róžka wuknyć“, zjima předsyda DFA, Kölnjanski měšćanosta Andreas Wolter wopyt gremija w sprjewinym měsće pjatk w tamnišej sukelnicy. Mjez druhim běchu sej Budyske wopomnišćo wobhladali, so po starym měsće wuchodźowali a so po serbskim w hosćencu „Wjelbik“ pohosćić dali.
Krótkopowěsće (25.10.21)
Incidenca nětko nad 200
Budyšin. Přez kónc tydźenja je incidenca w hornjołužiskimaj wokrjesomaj hódnotu 200 překročiła. Za Budyski wokrjes je Roberta Kochowy institut dźensa 259,7 podał, za Zhorjelski 218,3. Minjeny pjatk je Budyski wokrjes wo 349 dalšich natyknjenjach z koronawirusom a 21 wosobach rozprawjał, kotrež w chorowni lěkuja. We wokrjesu Zhorjelc bě 97 infekcijow, 27 pacientow w klinice hoja.
Přihotuja kursaj
Raduš. Seminaraj wo stawiznach, kulturje, tradicijach, žiwjenju a rěči Serbow přihotuje Turistiski zwjazk Błóta w Radušu. Prěni chcedźa spočatk nowembra wotměć, zdźěla delnjoserbski rozhłós. Myslenej stej kursaj za turistiske institucije, sobudźěłaćerjow hotelow a hosćencow a poskićowarjow wólnočasnych zaběrow. Zapřijaty je zdobom kurs k nawuknjenju wšědnych serbskich wobrotow.
Dobyćerjo wubědźowanja jasni
Policija (22.10.21)
Kwětki kradnyć chcył
Běła Woda. Kwěćel je njeznaty muž předwčerawšim w Běłowodźanskim kwětkowym wobchodźe pokradnyć chcył. Předawarka jeho na parkowanišću před předawanišćom dosćahny a jemu kwěćel zaso wotewza. Paduch pak njepopušći a dźěše za předawarku wróćo do wobchoda. Jako chcyše wona na to policiju wołać, dóńdźe k rozestajenju z mužom. Swědka předawarce pomhaše, na čož njeznaty skućićel ćekny.
Zo by klětu w měsće kćěło
Pawšala za projekty rozdźělena
Radźićeljo přećam towarstwow a wjesnych radow wotpowědowali
Róžant (JK/SN). Runje tak wobzamknjenjakmana bě gmejnska rada Ralbicy-Róžant na swojim wčerawšim posedźenju. Wjacori radźićeljo njemóžachu so dowola abo priwatnych přičin dla na posedźenju wobdźělić. Tohodla přesunychu diskusiju wo swojim jednanskim porjedźe na přichodne posedźenje w nowembrje. Potom změja hnydom dwě posedźeni, mjenujcy 18. nowembra a tydźeń pozdźišo. Wosebje rozjimać chcedźa potom hišće raz zakładny popłatk za wopłóčki.
Komorny koncert w cyrkwi
Budyšin. Ansambl FisFüz wuhotuje jutře, sobotu, w 19.30 hodź. Budyski komorny koncert w Marje-Marćinej cyrkwi na Bebelowym naměsće. Wopytowarjo dožiwja program „Lale – Colours of Eurasia“. Ansambl FisFüz je skupina hudźbnikow, kotřiž so na orientaliske melodije, wirtuozne improwizacije a zapadne harmonije koncentruja. Orientaliske jazzowe trijo aranžuje tohorunja tradicionelne aziske twórby a je hudźbnje znowa interpretuje. Lisćik při wječornej kasy płaći 18 eurow, potuńšene 15 eurow.
Štó je šmóratko zhubił?
Pančicy-Kukow. Na pólnym puću mjez Chrósćicami a Kozarcami bu srjedu, 13. oktobra, smartfon typa Oppo namakany. Štóž je jón zhubił, móže sej šmóratko w twarjenju zarjadniskeho zwjazka Při Klóšterskej wodźe w Pančicach-Kukowje wotewzać.
Na knižnu premjeru
Wandrowska w zahrodnistwje była
Kmanych přistajenych nańć je dźensa wšo druhe hač lochke. Mnohe zawody pytaja za fachowcami, ale tajkich lědma namakaja. Připad je nětko we Wudworskim Krollec zahrodnistwje k tomu wjedł, zo tam wukubłana fachowča wo durje kłapaše.
Wudwor (SN/MWj). Zo su ćěslojo, blidarjo, třěchikryjerjo abo podobnje wukubłani jako wandrowscy po puću, je znate. Wšako tajkich stajnje zaso raz něhdźe wuhladaš. Zo su na přikład pjekarki na walcy, žno je rědšo, ale zo je wučena zahrodnica na te wašnje po puću, je wulke wuwzaće. Ćim bóle so mějićelka Wudworskeho zahrodnistwa Kerstin Kroll dźiwaše, jako so jej před tydźenjomaj wandrowska zahrodnica Laura předstaji a so za dźěłom prašeše. „Pochadźam z bliskosće Würzburga. Přichodnu wutoru budźe tomu runje lěto, zo sym so na puć nastajiła. Mjeztym běch w mnohich kónčinach mjez Wienom a Flensburgom ducy“, wona powěda. W Chrósćicach bě wona bywšeho wandrowskeho wopytała a tam pokiw dóstała tola raz we Wudworju pospytać.
