„Z njebjes klinča hłosy krasne ...“
W połnje wobsadźenej cyrkwi a w swětle njeličomnych swěčkow zahaji chór Lipa pod nawodom Jadwigi Kaulfürstoweje wčera, třeći hodowny swjaty dźeń, nyšpor duchowneje hudźby.
Róžant (CRM/SN). Spěw „Z njebjes klinča hłosy krasne ...“ z oratorija „Zyma“ Korle Awgusta Kocora na poetiske słowa Handrija Zejlerja znošowaše so tak w swjatočno-napjatej atmosferje po Božim domje na spočatku hudźbneje hodźinki jako starodawne poselstwo zdaloka do našeho swěta. Dalše woblubowane serbske hodowne chórowe sadźby a kěrluše wěriwych zwjazachu so z modlitwami a próstwami fararja Michała Andersa a jadriwymi meditaciskimi tekstami Katki Baieroweje a Leńki Andersoweje.
K njewšědnemu wulětej z mopedom je so patoržicu skupina ...
Pytaja hóstne swójby
Připołdnju w lěsu do štoma
Po cunich hodownych na twjerde zynki słuchali
Nuknica (SN/MWj). Na cyle hinaše a za někotrehožkuli chětro njezwučene wašnje hodownym swjatym dnjam wuklinčeć dali su wčera w Nuknicy. Tamniše towarstwo Barakka je štwórty raz punkrock-feverowy koncert wuhotowało a předewšěm tón młódši publikum přeprosyło, kotryž měješe po cunich hodownych zynkach minjenych dnjow lóšt na trochu twjerdšu hudźbu. Zo w Nuknicy časćišo rady na metalowu a podobnu hudźbu słuchaja, wšak je znate. Punk pak so tak prawje do druhich programow njehodźi, rozłoži sobuorganizator Měrćin Wjenk. Su sej tuž njedźelu po hodownych swjatych dnjach za tajki wosebity koncert wupytali.
Po tym zo su tele zarjadowanje loni bjez kapały přewjedli, su sej nětko hnydom tři přeprosyli. Tak zahrachu Big Trunk z Budyšina, Cháska z čěskeho Noveho Bora a Jonny Kurts vs. Hank the Tank ze Zhorjelca. Něhdźe 170 młódšich ludźi z dwurěčneje wokoliny, ale tež ze zdalenišich kónčin sej do Nuknicy dojědźe a da so wot tohole trochu specielneho hudźbneho stila wobkuzłać. Požadarjam azyla a ćěkancam běchu organizatorojo darmotny zastup poskićili.
Z ćěkancami kemše swjećili
Budyska wosada Jozuwy w NSLDź njezapomnite hody organizowała
Budyšin (SN/mwe). Wjace hač 450 ćěkancow z cyłeho Budyskeho wokrjesa, mnozy měšćenjo a hosćo z wokolnych wsow su 25. decembra do Budyskeho NSLDź přichwatali, zo bychu tam zhromadnje hodowne kemše swjećili. Přeprosyła je jich Budyska swobodna ewangelska wosada Jozuwy, kotraž hižo lěta jako powšitkownowužitne towarstwo w sprjewinym měsće skutkuje a kotrejež zakład twori ewangelske wěrywuznaće.
Hižo loni bě wosada w Budyskim Sprjewinym hotelu, hdźež su ćěkancy zaměstnjeni, tajku nutrnosć zarjadowała. Farar Clemens Mudrik Serbskim Nowinam praji, zo chcychu z lětušim hodownym zarjadowanjom, kotrež mjenowachu „Joy to the world – Radosć swětej“, zaměraj zwjazać. „Chcemy w Budyšinje witansku kulturu zesylnić, na čimž móža so wobydlerjo aktiwnje wobdźělić. Zdruha chcemy ćěkancam zbližić, čehodla hody swjećimy“, farar Mudrik podšmórny. Tole je wón mjez druhim tež w prědowanju prajił. Hesło rěkaše: „Bóh čini so mały a přińdźe jako čłowjek na swět, zo by nas přewodźał.
Krótkopowěsće (28.12.15)
Klětu zaćehnje nowe žiwjenje
Budyšin. W něhdyšej hali solarneho předewzaća Schüco w Großröhrsdorfje započnje Drježdźanska firma Pharmatech klětu produkować. Kaž jeje rěčnik informuje, natwarja tam spočatk januara prěnje připrawy. Někotři přistajeni su hižo na městnje. Pharmatech słuša k skupinje Bosch a zhotowja mjez druhim pjelnjensku a zapakowansku techniku.
Nětko móža płun dać
Zhorjelc. Płunowe zawody města Zhorjelca maja klětu wšitke imobilije Swobodneho stat Sakskeje, mjez druhim hrody, twjerdźizny a zarjadniske twarjenja, z płunom zastarać. Wotnožka Zhorjelskich měšćanskich zawodow móžeše so při wupisanju po cyłej Europje přesadźić. Nětko smě wona 380 přetrjebarjow dołhodobnje z płunom zastarać.
Nowe rekordne hody
Budyšin. Wobydlerjo Hornjeje Łužicy dožiwichu lětsa najćopliše hody minjenych lětdźesatkow. Wjedrowe stacije naměrichu nowe rekordy. We Wojerecach postupi dotalny rekord z lěta 1959 wo 4,2 stopnjej na 15,6 stopnjow. Tež w Zhorjelcu wučinješe temperatura wjace hač 15 stopnjow a přetrjechi rekord lěta 1974 wo dwaj stopnjej.
Policija (28.12.15)
Rodecy. Jako je sej najwjetši dźěl ludźi druhi dźeń hód popołdnju kofej a wosušk słodźeć dało, wołachu wohnjowych wobornikow do lěska mjez Rodecami w Bukečanskej gmejnje a Łuskom, přisłušacym Wósporkej, k hašenju. Tam paleše so štom, kiž bě chětro dudławy. Za 15 kameradow třoch wohnjowych woborow pak njebě problem, płomjenja spěšnje podusyć. Štom na to podrězachu, tak zo z njeho hižo žadyn dalši strach njewuchadźeše. Nětko policija pruwuje, hač drje běchu jón worakawcy zapalili, přetož při nimale nalětnim wjedrje sobotu wuchodnje Budyšina žane njewjedra z błyskami registrowali njejsu.
Kelko je so minjeny čas wo husycach a druhich hodownych pječenjach ...
Tři studnje bórze ponowja
Gmejna firmam z blišeje wokoliny nadawki přepodała
Njeswačidło (SN/MWj). Dźakowano wšelakim spěchowanskim móžnosćam a daram móža tři studnje w Njeswačanskim hrodowym parku ponowić. Kaž wjesnjanosta Gerd Schuster (CDU) zdźěli, budźetaj Smělnjanski kamjenjećesar Rico Wagner a Budyski konserwator Uwe Konjen studnjowe figury restawrować.
Jednotliwe dźěła na studnjach započnu so w januru 2016. Na swojim zašłym posedźenju su Njeswačanscy gmejnscy radźićeljo dźěła na přirodnych kamjenjach, za hłubokotwar kaž tež za wodowu techniku rozdawali. Kaž wjesnjanosta praji, bě wothłós na wupisanje dosć wulki. Wo přirodne kamjenje postara so Biskopičanski zawod, hłubokotwarske dźěła přewozmje zawod ze Židźinoho, při betonowanju ma Rakečanska firma sobu dźěłać, a techniku za wodomjet zatwari Drježdźanske předewzaće.
