Wojerecy. Na tak mjenowany street- food-festiwal přeprošeja wot pjatka hač do njedźele na swjedźenišćo při Wojerowskim gondlowym haće při Łužiskej kupjeli. Tam móžeš so na kulinarisku jězbu po mnohich krajach a kontinentach swěta podać a najwšelakoriše jědźe woptać. Mnohotnosć jědźow, kotrež na městnje čerstwe přihotuja, a jich kwalita stej jónkrótnej. Festiwal je přistupny pjatk wot 14 do 22 hodź., sobotu, wot 11 do 22 hodź. a njedźelu wot 11 do 20 hodź.

Doba zapodaća namjetow so kónči

Wojerecy. Župa „Handrij Zejler“ přijimuje hišće hač do pjatka, 15. oktobra, pod www.domowina.de namjety za wubědźowanje „Moja najlubša kamishibai-powědka“. Tematiski zakład přinoška měła serbska bajka abo baja być. Wurisanje je dźěl projekta „Žiwa kuzłarska křinja serbskich bajkow a bajow“. Kamishibai je forma dźiwadła z papjerjanymi figurami na „kašćikojtym jewišću“.

Šofer mučny był

Sprjewiny Doł. Po wšěm zdaću bě mučnota šofera wina na wobchadnym nje­zbožu, kotrež sta so předwčerawšim dopołdnja na zwjazkowej dróze B 97 pola Sprjewineho Doła. 80lětny muž bě tam ze swojim Golfom z Grodka do směra na Wojerecy po puću, jako najskerje kontrolu nad jězdźidłom zhubi a do srjedźneho wobhrodźenja zrazy. Kaž přiwołanej po­liciji pozdźišo powědaše, bě wón chětro mučny a je drje tohodla njezbožo zawinił. Muža dowjezechu do chorownje. Načinjena wěcna škoda na awće a wobhrodźenju dróhi wučinja dohromady ně­hdźe 4 000 eurow.

Inwesticija je jenička šansa za zanjerodźeny teren pola Bjerwałda

Hamor (CK/SN). Fotowoltaiska připrawa ma na něhdyšej wojerskej ležownosći pola Bjerwałda nastać. Z milinu planowanych 35 500 solarnych modulow móhli 5 100 domjacnosćow zastarać. Z jednym přećiwnym hłosom a třomi hłosawzdaćemi su Hamorscy gmejnscy radźićeljo předwčerawšim wobzamknyli twarski plan zdźěłać.

Najwjetši problem je zanjerodźenje, kotrež so dźeń a bóle rozpřestrěwa. Nimo toho hroža so twarjenja něhdyšeje komandantury sypnyć. Tohodla byštej najprjedy raz 1,2 milionaj eurow trěbnej byłoj, prjedy hač móža scyła twarić započeć, rozłoži Bernd Neitzel z Hamburgskeje firmy, kotraž projekt wuwiwa. Tule sumu dyrbjeli přidatnje k inwesticiji 5,2 milionow eurow zwjesć. „Cyłe předewzaće by so tuž jenož wudaniło, by-li gmejna ­Hamor nimo prěnjeho twarskeho wot­rězka tež za dalši zelenu swěcu dała. Bjez njeho projekt njezwoprawdźimy“, Neitzel jasnje připowědźi.

Njeswačidło (JK/SN). Hižo spočatk lěta diskutowachu radźićeljo Njeswačanskeje gmejny wo tym, kak hodźałoj so njelube nastajenje zahajenskich bilancow a kontrola kónclětnych wotličenjow, kotrež maja gmejny po zakonju přewjesć, najlěpje rjadować. Ćeže při tymle zarjadniskim dźěle je předewšěm personalna situacija na gmejnskim zarjedźe naparała. Nětko pak tak wupada, zo póčnje so swětło do zarjadniskeho dźěła předrěwać. Znajmjeńša wotličenje lěta 2013 hodźi so nětko pruwować. Za to přepo­dachu Njeswačanscy radźićeljo na wčerawšim posedźenju nadawk Drježdźanskej firmje Liska Treuhand GmbH, kotraž hižo we wjacorych gmejnach Budyskeho wokrjesa tajki nadawk wukonja. Tale firma budźe přichodny čas tež wšitke dalše bilancy a kónclětne wotličenja gmejny pruwować. Kaž komornica Liliane Wetzko radźićelam rjekny, móhli hižo hač do kónca decembra tež lěće 2014 a 2015 wotličić. Při tym maja hospodarske plany a wotličenja Bóščanskeje gmejny sobu na starosći, z kotrejž maja zarjadniske zrěčenje.