Na šulski čas so dopominali
Połsta lět po złoženju matury 1971 zetka so minjeny pjatk dwaceći něhdyšich šulerjow serbskeje rjadownje Budyskeje Serbskeje rozšěrjeneje wyšeje šule w Lejnjanskim hosćencu.
Zhromadnje zhladowachu na tehdyši zajimawy šulski čas. Z mjenowaneje rjadownje wuńdźechu wučerki Leńka Wałdźina, Hilža Mehrowa a Marhata Korjeńkowa kaž tež městopředsyda Domowiny Marko Hančik a bywši direktor Załožby za serbski lud Marko Suchy. Nimale wšitcy su swoje powołanske skutkowanje zakónčili. Towaršliwa bjesada, serbski spěw kaž tež rozprawy, kak kóždy swój docpěty wuměnk wupjelnja, zetkanje wobrubichu. Přitomni dopominachu so tež na rjadowniskeju wučerjow Hinca Cušku a na lětsa zemrěteho Gerata Hrjehorja. Tak je so zetkanje maturantow po połsta lětach wšitkim wulkotnje spodobało. Hubert Žur
„... nětk, nětk sym ja spokojena!“
Budyšin (CRM/SN). Skupina Wólbernosće zahaji po dobrej serbskej tradiciji swój nazymski koncert minjenu sobotu nawječor na žurli Serbskeho domu z pěsnju „Ha, widźu-li ptačata ćahnyć“. Jako doklinča poslednja štučka z „Nětk, nětk sym ja spokojena!“, zarža žurla z mócneho přikleska. Spokojeny drje běše publikum hižo na spočatku dobreje hudźbneje hodźiny – wona bě zdobom kermušny poskitk Załožby za serbski lud, kotryž běchu měšćenjo w dosć bohatej ličbje sćěhowali. Ně, wot prěnjeho wokomika běše pytnyć, zo čerpaja tući wokalisća z radosću z njewusakowaceho žórła ludoweje melodiki. Přiwšěm je jich interpretacija nimo moderneho stila tola tež dale njezaměnliwje samowólna a na swoje wašnje čerstwa swójska. Ze zmysłapołnej gestiku kaž tež mimiku je wona hłósnje čista, z wulkej kreatiwitu a tola wěstej čućiwosću harmonisce akcentowaca. To wšo drje je w tymle njeměrnym času někotružkuli rozdrětu dušu pokojało. Haj, ale tute pokojenje je hinašeho razu, hač běše to swój čas Handrij Zejler ze swojej „Mysličku nazymnej“ měnił.
Woda ćeče z noweje wodarnje
Zastaranje tysacow ludźi zawěsćić hoberski projekt było
Hamor (CK/SN). Zo woda wuběrnje słodźi, wobkrućichu njedawno wjesnjanosća sobustawskich gmejnow wodoweho zaměroweho zwjazka (WZV) Srjedźna Nysa-Šepc z małym lunkom. Po tymle symboliskim akće započa nowa Hamorska wodarnja dźěłać.
Zawod móže wob dźeń přerěznje 5 600 kubiknych metrow wody dodawać. Na horcych lěćnych dnjach móže to tež raz 12 800 kubiknych metrow być. Wodarnja wotnětka 35 000 ludźi w Běłej Wodźe a we wosom wokolnych gmejnach, mjez druhim Slepjanskeho regiona z pitnej wodu zastaruje. Woda njewobsahuje žane škódne maćizny a je hygienisce čista. Za to njetrjebaja ju ani wulce rjedźić, ale jeničce přez wapnowc filtrować. Za zastaranje bjeru wob lěto 500 000 kubiknych metrow wody z Bjerwałdskeho jězora a dalše połdra miliona kubiknych metrow wob lěto z podzemskeho wottoka jězora.
Krótkopowěsće (09.11.21)
Wjace stacionarnych pacientow
Budyšin/Zhorjelc. „Štwórta žołma“ koronapandemije wuskutkuje dźeń a wjace natyknjenjow. Incidenca w Budyskim wokrjesu je po Roberta Kochowym instituće (RKI) dźensa 645,3. Tuchwilu 99 pacientow stacionarnje (+14) lěkuja, dwaj staj zemrěłoj. W Zhorjelskim wokrjesu wučinja incidenca po RKI aktualnje 581,1. Tam so w chorownjach wo 119 pacientow (+27) staraja.
Rěča wo folkloriadźe
Budapest. Mjezynarodna organizacija za přewjedźenje folklornych festiwalow (CIOFF) je jubilejny 50. kongres zahajiła. W Budapesće rozjimuje hač do pjatka dohromady 145 wobdźělnikow z 49 čłonskich krajow mjez druhim nutřkowne naležnosće organizacije a chartu za dźěćacu folkloriadu, kaž jednaćel Domowiny a serbski delegat Marko Kowar zdźěli.
Pruwuja 66 projektowych idejow
Wjeselo při nazymskej zaběrje
Wobkedźbuje wjelki a ma njezapomnite dožiwjenja
Hory (SiR/SN). Wuhladnišćo na Horach pola Wojerec je woblubowane zetkanišćo fotografow a lubowarjow přirody. Wottam móžeš ptački runje tak wobkedźbować kaž sorny a liški. Najwjetši dźěl zajimcow pak přińdźe wjelkow dla. Za to je wuhladnišćo jedne z najlěpšich městnow. To wě tež Jana Malin. Rodźenu Awstričanku a nětko w Berlinje bydlacu tam stajnje zaso raz wuhladaš.
Měrowa pedagogowka čita
Budyšin. Mjeztym hižo 65. literarna kofejownja wotměje so srjedu, 10. nowembra, w 19.30 hodź. w Budyskim Dźiwadle na hrodźe. Z hosćom budźe palestinska awtorka a měrowa pedagogowka dr. Sumaya Farhat-Naser. Dźakowano wosobinskemu zwiskej Spenglerec mandźelskeju z Budyšina k awtorce je so poradźiło, ju do sprjewineho města přeprosyć.
Wupisaja spěchowanje
Budyšin. Za w regionje zasydlene towarstwa wupisa Budyski Lionsowy klub wosebite Kaeublerowe spěchowanje w cyłkownym wobjimje 12 000 eurow. Spěchować chcedźa tři towarstwa po 4 000 eurach. Na te wašnje chcedźa projekty sobu podpěrać, za kotrež je wjetša suma pjenjez trěbna. Za to móže so kóžde towarstwo pola Lionsoweho kluba požadać. Powabjenja přijimuja hač do 30. nowembra e-mailnje pod adresu . Nadrobnosće wo wuměnjenjach zhonja zajimcy na internetnej stronje kluba pod . Loni podpěrachu mjez druhim dźěćacy dom we Wuježku.
Policija (08.11.21)
Přepytuja přičinu wohenja
Budyšin. Dale njejasna je přičina wohenja, kotryž bě w nocy na njedźelu pod třěchu wjaceswójbneho domu na Budyskej Šulerskej hasy wudyrił. Płomjenja hašało je nimale 70 wobornikow z jědnaće jězdźidłami. Z potrjecheneho domu ewakuowachu dźesać wosobow. Woni tam najprjedy raz dale bydlić njemóža. Tež 13 ludźi ze susodneho domu dyrbješe won. Woni pak móžachu po hašenju zaso do swojich bydlenjow.
Ma so ze srjedźišćom wsy stać
K Njebjelčanskej kermuši rejwansku lipu sadźili a zjawnje přepodali
Njebjelčicy (JK/SN). Ideju za rejwansku lipu w Njebjelčicach běchu hižo před štyrjomi lětami zrodźili. Składnostnje wjesneho swjedźenja tam dr. Fabian Jacobs zwěsći, zo maja w Njebjelčicach hišće wjele městna na nawsy. Tak wón namjetowaše, na prózdnu łuku lipu sadźić a ju wukmanić k rejwanskej lipje, jako wuraz gmejnskeje politiki, zwuraznić kmanosć za naslědne generacije.
Sobotu popołdnju nětko zetka so šwarna ličba wjesnjanow kaž tež hosći zbliska a zdaloka na łuce niže gmejnskeho zarjada. Hižo do oficialneho přepodaća rejwanskeje lipy hudźeše skupina Serbska reja k zabawje. Mały program při lipje zahaji skupina pěstowarskich dźěći, kotraž sej na kóncu programa staršich do rejki přeprosy a tak zaměr lipy zwobrazni. Tež čłonojo młodźinskeho kluba w narodnej drasće zarejwachu.
Z mnohimi darami pomhali
Zejicy (aha/SN). Hdyž zeznaštaj so před sydom lětami předsyda Towarstwa Cyrila a Metoda Jurij Špitank a prelat dr. Dariusz Kruczyński, direktor diecezanskeho zwjazka Carity w pólskim měsće Ełku, drje woběmaj wědome njebě, zo je to spočatk kruteje zhromadnosće. Tehdy přeprosy Kruczyński Serbow ze słowami: „Přijědźće k nam na Mazury.“
Po tym zo je so w lěće 2017 něhdźe 50 ludźi z busom do 750 kilometrow zdaleneho města ze swojimi nimale 60 000 wobydlerjemi podało a sej tamniše poměry zbližiło, spózna TCM trěbnosć, tamniši maćerny dom do akcije „Łužica pomha“ zapřijeć. W domje, kotryž bě direktor tamnišeje Carity, prelat Kruczyński, lěta 2008 natwarić dał, so rjadniske sotry 18 měsacow wo młode maćerje staraja. Wone dyrbja hakle to najtrěbniše kaž płokać a warić nawuknyć, zo móhli so wo swoje dźěćo starać. Za młode maćerje je TCM nazymu 2017 prěni raz drastu, črije, hygieniske artikle kaž tež płokanski próšk, kuchinske graty a dalše wěcy wšědneje potrjeby zběrało. Wot toho časa bu akcija kóžde lěto přewjedźena. Loni pak dyrbješe wona pandemije dla wupadnyć.
