Sezona łapanja kokotow zahajena
Krótkopowěsće (27.07.21)
Incidenca nimale stabilna
Zhorjelc/Budyšin. W Hornjej Łužicy wostawa incidenca dale pod hódnotu pjeć, tež, hdyž je w Zhorjelskim wokrjesu mjeztym po podaću RKI na 1,6 postupiła. Tam su kaž w Budyskim wokrjesu dwě dalšej koronainfekciji zwěsćili. Za Budyšin poda RKI dźensa z 3,3 tróšku nišu incidencnu hódnotu.
Wjace ludźi na Hrodźe móžnych
Budyšin. Němsko-Serbske ludowe dźiwadło informuje, zo rozšěrja přihladowarsku kapacitu za inscenaciju „Sherlock Holmes a paski Beatlesow“ na Budyskim hrodźe. Hač do 1. awgusta změja na kóždym předstajenju 135 přidatnych městnow. Dale z NSLDź rěka, zo „małe lětnje dźiwadło“, klankowa hra „Verfitzt und zugenäht“, na zahrodźe wulkeho domu kónc tydźenja schorjenja dla wupadnje.
Materielne swědstwa zwěsćić
Gmejny hižo do přewróta zhromadne struktury měli
W zwisku z komunalnym dźěłom w městach a gmejnach nastawaja zas a zaso prašenja, čehodla wobsteja wěste rjadowanja, kak je to a tamne zakonsce předpisane a štó ma poprawom kotre prawa. Na tajke a podobne prašenja wotmołwjamy w małej seriji. Naš awtor je bywši wjelelětny předsyda zarjadniskeho zwjazka Při Klóšterskej wodźe Alfons Ryćer. (8)
Zarjadniski zwjazk Při Klóšterskej wodźe leži ze 102 kwadratnymaj kilometromaj płoniny nimale centralnje w Budyskim wokrjesu. Wón wobsteji z pjeć dwurěčnych gmejnow ze 40 wsami a 7 200 wobydlerjemi. Spočatk 1990tych lět minjeneho lětstotka bu zwjazk załoženy. Zhromadne zarjadniske struktury na teritoriju pak běchu poprawom hižo wjele prjedy nastali.
Bróžnja so dospołnje wotpaliła
Policija (26.07.21)
Milina muža moriła
Běła Woda. Mjeztym zo je so w druhich hornjołužiskich regionach wčera wječor měrnje dešćowało, je wokoło Běłeje Wody njewjedro zachadźało. Tak naměrichu w Trjebinje 43 litrow dešća na kwadratny meter. W Běłej Wodźe samej běchu wohnjowi wobornicy 30 króć zasadźeni. Zwjetša dyrbjachu z pincow wodu klumpać. Tež jedne zahrodnišćo bě přepławjene. Muž chcyše tam swój bungalow před wodu škitać, při čimž pak je wón milinowy dyr poćerpjeł. Najebać lěkarsku pomoc wón na městnje njezboža wudycha.
Na dobro pišćelow koncertował
Wopytowarjo Baćońskeje cyrkwje Jězusoweje wutroby dožiwichu njedawno njewšědny wječor. Na wšěch 80 zajimcow ze wsy a wokoliny kaž tež z Budyšina, Drježdźan a Pirny, je pišćelowy koncert z Klausom-Dieterom Untchom přiwabił. Organist a pedagoga ze Sedmihródskeje w Rumunskej bě na přeprošenje wosadneho fararja Gerata Wornarja přijěł. Na Baćońskich pišćelach hrać bě nazhonitemu cyrkwinskemu hudźbnikej wužadanje, wšako dyrbja je nuznje wobnowić. Hósć hudźeše bjez honorara, koncert měješe beneficny raz. Tak chcedźa wšitke darjene pjenjezy za wobnowjenje pišćelow wužiwać.
Klaus-Dieter Untch bě hižo před dźesać lětami w Baćońskej cyrkwi na swójbnym swjedźenju na pišćelach hudźił. Tak zahaji wón swój nětčiši koncert w spomnjeću na prěnje zetkanje ze Serbami z improwizaciju na serbski kěrluš po słowach a hłosu Michała Wałdy „Knježe, tu smy zhromadźeni“. Druhi barokny kruch „Ciacona“ komponista Josephusa Fazakasa Krisbaciensisa wjedźeše připosłucharjow do sedmihródskeje domizny hudźbnika.
Wobaraja so milinowodej
Kubšicy (CS/SN). Wobydlerjo wjacorych wjesnych dźělow Kubšiskeje gmejny běchu tele dny na posedźenje gmejnskeje rady přišli, zo bychu swoje njezrozumjenje wo planach krajneje direkcije zwuraznili. Při tym dźe wo přihoty elektrifikacije železniskeje čary Drježdźany– Zhorjelc. Konkretnje postorkuja so wobydlerjo na planach, za trěbnu milinu nowy 110 kilovoltow sylny milinowód pod hołym njebjom wjesć, při čimž stej sewjerna a južna warianta namjetowanej. Wobydlerjo pak wobě wotpokazuja, dokelž ma milinowód zdźěla nad wobydlenej kónčinu respektiwnje nad přirodoškitnym pasmom wjesć. Tež přemysłownicy so tajkemu milinowodej wobaraja, dokelž potom hižo wěste dźěła wukonjeć njesmědźa.
Zasadźenje najprjedy raz wotprajene
Hdyž pjenjezy njejsu
Za halowu kupjel nowe puće trěbne
Tematiku Kamjenskeje haloweje kupjele njejsu zamołwići korony dla z wočow zhubili. Na zakładźe wobzamknjenja Budyskeho wokrjesneho sejmika z 20. julija 2020 je zarjadnistwo wokrjesnych radźićelow nětko wo aktualnym stawje planowanjow informowało.
Budyšin/Kamjenc (SN/at). Šulske a towarstwowe płuwanje matej w srjedźišću wužiwanja noweje Kamjenskeje haloweje kupjele stać. Za to přepoda wokrjesny sejmik zarjadnistwu nadawk, dwě warianće předplanować. Warianta 1 předwidźi nowotwar z pjećčarowym płuwanskim basenkom a z basenkom za njepłuwarjow. Tež warianta 2 je nowotwar, ale wotpowědowacy wubědźowanskim wuměnjenjam Němskeho zwjazka płuwarjow. Předwidźanej stej tu šěsćčarowy płuwanski basenk kaž tež finska sawna ze sanitarnym a wotpočnym wobłukom. Po předplanowanju płaći warianta 1 něhdźe 15,8 milionow eurow, tamna je wo dwaj milionaj dróša, zhonichu wokrjesni radźićeljo na posedźenju sejmika dźens tydźenja.
