Nowu dróhu a jubilej swjećili
W Nowym Łusču na 200. róčnicu prěnjeho naspomnjenja spominali
Nowy Łusč (ML/SN). Při nowo twarjenym wjertnišću za šulski bus w Nowym Łusču swjećeše wjace hač 50 wjesnjanow a hosći minjenu sobotu popołdnju swój nadróžny swjedźeń a zdobom 200. jubilej prěnjeho naspomnjenja němskeho mjena wjeski w lěće 1821. Wjesnjanosta Bóšćanskeje gmejny Stanij Ryćer (Bóšćanske rjemjesło) porěča k přepodaću nowo asfaltowaneje, 800 metrow dołheje wjesneje dróhi, kotraž wjedźe z wjeski hač na šoseju z Noweje Jaseńcy do Libonja. Rakečanska twarska firma Martina Stolle je wobnowjenje wjesneje dróhi wukonjała. Z tym su so žiwjenske a wobchadne poměry za 46 wobydlerjow Noweho Łusča jara polěpšili, štož bě tež z rozmołwow mjez wjesnjanami na swjedźenju wusłyšeć. Wjesnjanosta Ryćer wupraji zdobom nadźiju, zo při přichodnych komunalnych wólbach zaso kandidata z Noweho Łusča nastaja a wuzwola. Gmejnski parlament bě na wjesnym swjedźenju nimo wjesnjanosty Ryćerja z radźićelom Bjarnatom Cyžom z Noweje Jaseńcy zastupjeny.
Krótkopowěsće (17.08.21)
Přidatne poskitki za šćěpjenje
Budyšin/Zhorjelc. Strowotniski zarjad Budyskeho wokrjesa je hač do wčerawšeho šěsć dalšich koronainfekcijow zwěsćił. Štyri wosoby w chorowni lěkuja. Roberta Kochowy institut poda za dźensa lochce zwyšenu incidencu 6,0. W Budyšinje a Wojerecach poskicá wokrjes jutře a štwórtk dalše šćěpjenske terminy. W Zhorjelskim wokrjesu je incidenca na 6,7 postupiła. Tam wčera žane nowe natyknjenje zwěsćili njejsu.
Serbsko-němske kemše swjećili
Zły Komorow. 46 wěriwych je njedźelu serbsko-němske ekumeniske kemše w Złokomorowskej Serbskej cyrkwi swjećiło. Wuhotowali su je tamniši farar Manfred Schwarz, farar na wuměnku Dieter Schütt ze Žylowa a referent Złokomorowskeje katolskeje wosady Thomas Lamm. Kemšam přizamkny so zhromadna bjesada z programom Złokomorowskeje Pśězy.
Zmodernizuja chorownju
Bróžnja w Delanach zničena
Policija (16.08.21)
Holanske jahody pokradnyli
Slepo. 87lětna žona w Slepom je so sobotu dopołdnja do bliskeho lěsa podała, zo by holanske jahody šćipała. Po tym zo měješe tři mjeńše žonopowe bowy połne jahodow, poda so domoj. Dokelž wjedźeše jeje puć nimo kěrchowa, so wona rozsudźi, row jeje zemrěteho mandźelskeho wokrjepić. Tónle čas paduši wužichu a njezamknjene koleso rentnarki kaž tež jeje sprócnje našćipane holanske jahody pokradnychu.
Na křižowanišću prasnyło
Budyšin. Dźensa w nocy je so na Budyskim křižowanišću při Serbskim ludowym ansamblu wobchadne njezbožo stało. Krótko do połnocy, jako bě ampla hasnjena, tam wosobowej awće nimale frontalnje do so zrazyštej. Jednoho ze šoferow dyrbjachu do chorownje dowjezć.
Město wjesneho druhi raz lěćny swjedźeń přewjedli
Bórkhamor (JoS/SN). Poradźeny wuspěch za wšitke dźěći z Bórkhamora kaž tež z tamnych wsow gmejny Sprjewiny Doł bě minjeny kónc tydźenja lěćny swjedźeń w tak mjenowanej jantarowej arenje w Bórkhamoru. „Tradicionalne wjesne swjedźenje k spočatkej lěćnych prózdnin wot lońšeho hižo njepřewjedźemy, dokelž dyrbjachmy so koronowym postajenjam přiměrić. Za to wuhotujemy nětko druhi raz lěćny swjedźeń. Tón je předewšěm za swójby mysleny, wšitcy druzy hosćo pak su wězo runje tak witani“, praji Richard Meyer, kiž je wot lěta 2018 předsyda wjesneho kluba. Sobotu popołdnju běchu na dźěćacy swjedźeń přeprosyli. Tón dyrbješe 1. junija wupadnyć. Nětko su jón ćim rjeńšo nachwatali.
Jubileje we wobrazach
Wjacore zarjadowanja w klóštrje Marijinej hwězdźe přewjedli
Pančicy-Kukow (SN/MWj). Móhłrjec swjedźenski kónc tydźenja je klóšter Marijina hwězda minjeny kónc tydźenja dožiwił a hnydom z wjacorymi zarjadowanjemi wjele stow ludźi přiwabił. Sobotu wječor nachwatachu 17. julija wupadnjenu nóc tysac swěčkow. Mjeztym zo so tehdy mócnje dešćowaše, bě tónraz wjedro runjewon idealne. Na jewišću na klóšterskej zahrodźe dožiwi publikum program ze Smjerdźečanskej rejwanskej skupinu, artistomaj, hudźbnikami a z wohnjowej show.
Pomazki město fritkow
Krótkopowěsće (16.08.21)
Wjace ludźi w karantenje
Budyšin/Zhorjelc. W Budyskim wokrjesu je aktualnje 35 wobydlerjow z koronawirusom natyknjenych, štyrjoch lěkuja stacionarnje. 63 wosobow je tuchwilu w karantenje. Incidenca po Roberta Kochowym instituće (RKI) je na 5,7 spadnyła. W Zhorjelskim wokrjesu zwěsćichu tři nowoinfekcije a pjeć dopokazow delta-warianty. W karantenje je hišće 22 wobydlerjow, incidenca tam wučinja 6,7.
Sakska krajne projekty zapodała
Drježdźany. Sakska namjetuje Zwjazkej w zwisku ze strukturnej změnu w brunicowymaj rewěromaj swobodneho stata cyłkownje dźewjeć krajnych projektow. Kaž powěsćernja dpa zdźěla, stej mjez nimi tež planowany „Serbski forum wědy“ na Budyskich Lawskich hrjebjach a campus Łužiskeho slědźenskeho centruma „CircEcon“.
Demokratiska kultura mytowana
Policija (13.08.21)
Do rododendrona zajěła
Kamjenc. Na Pastwinej horje w Kamjencu budu rododendrony klětu snano trochu mjenje kćěć. Přičina je wobchadne njezbožo, kotrež je so tam předwčerawšim stało. Wodźerka Seata chcyše tam něhdźe w 17 hodź. po nahłym puću horje jěć. Najskerje pak bě při tym wopačny chód zapołožiła. Jeje jězdźidło na to wróćo jědźeše a hakle při jednym z wulkich rododendronow stejo wosta. 23lětnu šoferku Seata, kotraž so při tym snadnje zrani, móžachu na městnje lěkarsce zastarać. Jeje wosobowe awto pak dyrbjachu wotwlec. Na nim nasta něhdźe 2 000 eurow škody.
Poslednja składnosć
Budyšin. Hnydom dwě wustajeńcy w Muzeju Budyšin stej jenož hišće hač do njedźele, 15. awgusta, widźeć. Stej to kabinetna přehladka mólbow Ulriki Mětškoweje a wosebita wustajeńca z twórbami Almut-Sophije Zielonka składnostnje jeje 55. narodnin. Přichodna wosebita wustajeńca w Muzeju Budyšin wěnuje so wot 18. septembra kopororytwarjej a nakładnikej Johannej Georgej Schreiberej (1676–1750).
Wuměłcam přez ramjo hladać
Miłoćicy. Mjeztym hižo 15. mjezynarodna rězbarska dźěłarnička při Miłočanskej skale wotměje so wot 16. do 29. awgusta. W tym času móža zajimcy 15 wuměłcam z Čěskeje, Armenskeje, Awstriskeje, Bołharskeje, Pólskeje a Němskeje při dźěle přez ramjo hladać. Šulskim rjadownjam poskićeja hač do kónca oktobra połdrahodźinske darmotne wodźenja. Přizjewjenja su móžne pod www.steinleicht.de. Wosebitej wjerškaj budźetej sobotu, 28. awgusta, hudźbny wječor a nazajtra finisaža.
Zaso regularnje wotewrjenej
