45 młodostnym je Drježdźansko-Mišnjanski biskop Heinrich ...
Stajnje wjesołeje mysle a optimistiski był
Zrudźaca powěsć je so po wšěch wjeskach zarjadniskeho zwjazka Při Klóšterskej wodźe rozšěriła, zo bě sobotu tydźenja Franc Pjetaš w starobje 76 lět zemrěł. Njenadźicy je na dowolu při Sewjernym morju, hdźež z mandźelskej Steffi přebywaše, krótko do swojich 77. narodnin na prawdu Božu wotešoł.
Žane wolóženje komunow
Wokrjes Zhorjelc njemóže zběrnu sadźbu za wokrjesny wotedawk znižić
Zhorjelc (AK/SN). Wokrjes Zhorjelc žada sej wot Sakskeje nuznje financne wolóženja. Změnow zakonja wo financnym wurunanju dla připokaza swobodny stat wokrjesej jědnaće milionow eurow mjenje hač hišće loni. Na to skedźbni komornik Thomas Gampe w zwisku ze schwalenjom etata 2021/2022 na junijskim posedźenju tamnišeho wokrjesneho sejmika. Krajnemu radźe Berndej Lanzy (CDU) su nadawk dali, pobrachowacych srědkow z financneho zarunanja dla w Drježdźanach jednać. Jeli hač do 30. septembra žane pozitiwne wuslědki naležnosć nastupajo njezměja, chce wokrjesny sejmik 13. oktobra rozsudźić, hač přećiwo sakskemu zakonjej wo financnym wurunanju skorži.
Rezerwu 13 milionow eurow, kotruž bě wokrjes w lěće 2019 prěni raz wutworił, dyrbja za dwójny etat 2021/2022 dospołnje přetrjebać. Nimo falowacych jědnaće milionow eurow z mjeńšich připokazankow z financneho wurunanja bědźi so komornik z dale přiběracymi wudawkami wokrjesa za młodźinu a socialne, tu dźe wo 7,2 milionaj eurow, a wo 2,9 milionow eurow za personal.
Krótkopowěsće (12.07.21)
Kreuz znowa wuzwoleny
Pančicy-Kukow. Wolerjo w Pančicach-Kukowje su Markusa Kreuza (CDU) při wčerawšich wólbach wjesnjanosty w zastojnstwje wobkrućili. Kaž wólbna komisija zdźěli, docpě wón 82,9 procentow wotedatych płaćiwych hłosow. Wólbne wobdźělenje pak bě z jenož 28,9 procentami chětro słabe. Kreuz bě jenički kandidat a wukonja zastojnstwo po lěće 2014 nětko dalše sydom lět.
Incidenca lědma změnjena
Budyšin/Zhorjelc. Dźensniša incidenca po Roberta Kochowym instituće je w Budyskim wokrjesu 2,3 a w Zhorjelskim znowa nula. Wo wuwiću korony přez kónc tydźenja wobaj wokrjesaj hakle popołdnju informujetej. Kaž Budyski strowotniski zarjad minjeny pjatk rozprawješe, mějachu tam jedne natyknjenje a jedyn pozdźišo přizjewjeny smjertny pad.
Podpěra šulerskim nowinam
Woda w srjedźišću stała
Policija (09.07.21)
Do piwoweho woza so zadobyli
Wojerecy. Njewšědny cil wupytali su sej njeznaći minjene dny we Wojerecach. Na Dróze měra zadobychu so na wotzamknjenej ležownosći do piwoweho woza, kajkež je často na wjesnych swjedźenjach wužiwaja. Z njeho pokradnychu wulki sud piwa kaž tež dalšej mjeńšej sudaj. Nimo toho wotšrubowachu skućićeljo piwowej honačej a wzachu dohromady 150 metrow milinoweho kabla sobu. Rubizna bě něhdźe 500 eurow hódna, wěcna škoda wučinja nimale sto eurow, kaž policija rozprawja.
Z dźěłoweho městna do jastwa
Wulke Ždźary. Hdyž so po sudniskim wusudźe nimaš, móže so spěšnje stać, zo sy wječor w jastwje, wo čimž rano hišće ničo wědźał njejsy. Takle zeńdźe so předwčerawšim 21lětnemu mužej we Wulkich Ždźarach. Wón njebě wot sudnistwa napołoženy krótkoarest nastupił. Na přikaz sudnistwa policisća tuž młodeho muža na jeho dźěłowym městnje we Wulkich Ždźarach wotewzachu a jeho do jastwa dowjezechu. Tam ma wón nětko swoju nabrěmjenjenu pokutu wotsedźeć. Kak dołho ma 21lětny w jastwje wostać, z nowinskeje zdźělenki policije njewuchadźa.
Dźěło wobornikow wobličić
Zdźěłaja wustawki wo popłatkach za wohnjowe wobory
Worklecy (SN/MWj). Kelko płaći scyła zasadźenje dobrowólneje wohnjoweje wobory, hdyž kameradow na přikład k wobchadnemu njezbožu wołaja? Tele prašenje maja wotmołwić wustawki wo popłatkach za wohnjowu woboru. Tajke maja so nětko za wšitke gmejny zarjadniskeho zwjazka Při Klóšterskej wodźe zdźěłać. Čłonojo Worklečanskeje gmejnskeje rady su na swojim wčerawšim posedźenju schwalili, zo ma tónle nadawk za jich komunu firma z Wilsdruffa za nimale 3 000 eurow přewzać.
Poskićeja stare tafle
Budyšin. Runja mnohim druhim komunam tež město Budyšin swoje kubłanišća z digitalnej techniku wuhotuje a na te wašnje stare tafle a tak mjenowane whiteboardy naruna. Te móža nětko towarstwa a priwatne wosoby za symbolisku płaćiznu kupić. Štóž so za tajke nastroje zajimuje, njech přizjewi so w měšćanskim zarjadnistwje pod telefonowym čisłom 03591/ 534 501.
Porěča wo medijach
Kamjenc. „Nowinarska swoboda – su medije woprawdźe swobodne?“ rěka hesło zarjadowanja Kamjenskeje měšćanskeje skupiny Lěwicy wutoru, 13. julija, w 19 hodź. w Kamjenskim měšćanskim dźiwadle. Redaktor nowiny Neues Deutschland Robert D. Meyer porěči tam wo trěbnej změnje medijow a wo pobrachowacej dowěrje k rozprawnistwu. Zastup je darmotny.
Wotewru wučbnu šćežku
Wustajeńca drastowych klankow
Po dołhej přestawce korony dla Njeswačanski domizniski muzej njedźelu w 13 hodź. swoje durje zaso wotewrje.
Njeswačidło (ML/SN). 45. wosebita wustajeńca poskića wopytowarjam hač do kónca septembra dohlad wo drastowych klankach ze zběrki Moniki Cyžoweje z Noweje Jaseńcy a z eksponatami Serbskeho drastoweho fundusa, kotryž bě wona 1. apryla 1996 załožiła. Zaměr Moniki Cyžoweje je, z fundusom bohaty skład narodneje drasty katolskich Serbowkow w jeje originaliće hladać a zachować.
Do bohateho składa słušeja nimo originalneje narodneje drasty a jeje pyšnych dźělow tež drastowe klanki w serbskej narodnej a w drasće druhich ludow. Hnydom napadnje wopytowarjam w přehladce wulka originalna swjedźenska drasta ewangelskich Serbowkow Budyskeho kraja, w kotrejž běchu tež před sto lětami hišće w Njeswačanskej wosadźe chodźili. Originalna drasta je z wobstatka muzeja.
