Pod Čornobohom so zetkali
Rozrisanje dale wotewrjene
Hamor (AK/SN). Bjerwałdski jězor ma turistiski magnet wostać. Zdobom maja tam rědke družiny ptačkow škitane być. Na wódnej płoninje w formje trapeca nimaja tuž přichodnje žane wodojězdźidła po puću być. To je dopóznaće krajneje direkcije Sakska, kotraž reaguje na protesty Hamorskeje gmejny, sakskeho zwjazka płachtakowarjow a krajneho zwjazka wudźerjow. 27. apryla bě wjesnjanosta Achim Junker (CDU) prezidentce direkcije Reginje Kraushaar wotpowědny list ze stejišćemi přepodał. Přichodne posedźenje gmejnskeje rady ma słužić dorozumjenju. Zaměr direkcije je, wot potrjechenych stron akceptowane prawniske žadanja za časowje wobmjezowane wužiwanje docpěć. „Krajna direkcija žane přirodoškitne pasma njepostaja. Wona pak wukazuje dźěle wodźiznow, kotrež nimaja wodojězdźidła wužiwać, dokelž zwjazkowy zakoń wo škiće zwěriny zakazuje dźiwje ptaki kruće škitanych družin mylić“, zdźěli rěčnik zarjada dr. Holm Felber.
Z wulkej dokonjanosću přaha Jasčan Krystof Šołta (srjedźa) swoje ...
Krótkopowěsće (18.06.21)
Młody wulkoprojekt předstajili
Budyšin. Serbski hudźbny kolektiw Trio a kumple a młodźinske towarstwo Pawk stej dźensa w Budyskej Röhrscheidtowej bašće projekt „Carpe noctem – Njeskónčna nóc“ předstajiłoj. Pop-opera změje 10. septembra w Chróšćanskej wjacezaměrowej hali „Jednota“ premjeru. Dohromady štyri předstajenja su planowane. Na jewišću a za nim skutkuje něhdźe 55 akterow, mjez druhim rejwarjo, spěwarjo a hudźbnicy.
Incidenca na niskim niwowje
Budyšin/Zhorjelc. Strowotniskemu zarjadej Budyskeho wokrjesa zdźělichu hač do wčerawšeho sydom dalšich natyknjenjow z koronawirusom. Aktualnje je 131 inficěrowanych wobydlerjow, 284 wosobow je w karantenje. Incidenca je lochce na 8,7 stupała. W Zhorjelskim wokrjesu zwěsćichu jednu nowoinfekciju. Incidenca tam je so na 4,4 pomjeńšiła. We woběmaj wokrjesomaj njeje wo dalšich smjertnych padach ničo znate.
Podpěra za delnjoněmski zapis
Policija (17.06.21)
Časopisy kradnyli
Wojerecy. Njeznaći su w nocy na wutoru z wulkeje, z lěsycu wobdateje kisty na Łužiskim naměsće wšelake časopisy pokradnyli. Sudobjo namócnje rozpačejo načinichu pakostnicy škodu sto eurow. Hódnota rubizny pak wučinja 2 500 eurow. Kriminalna policija je pad přewzała.
Bydlenski wóz so wotpalił
Rakecy. Z dotal njeznateje přičiny je so wutoru w nocy bydlenski wóz na Minakałskej w Psowjach (Oppitz) wotpalił. Byrnjež kameradojo wohnjowych woborow z Rakec, Stróže-Komorowa, Jeńšec-Psowjow a Minakała płomjenja zhašeć móhli, so mobil dospołnje wupali. Škoda wučinja po informacijach wobsedźerja 10 000 eurow. Fachowcy nětko přičiny wohenja přepytuja. Zdobom so tež policija z nimi zaběra.
Gmejny chcedźa turizm zhromadnje dale wuwiwać
Radwor (SN/MkWj). Gmejny Wulka Dubrawa, Malešecy a Radwor chcedźa ze zhromadnym planom turizm w swojich komunach dale wuwiwać. Tomu je Radworska gmejnska rada na swojim wčerawšim posedźenju přihłosowała. Polěpšić chcedźa system gastronomije, kolesowanskich pućow a informaciskich taflow. Za to budu spěchowanske srědki wužiwać, wšako stat předewzaća z 75 procentami podpěruje. W tym zwisku chcedźa dźěłowu skupinu wutworić a ideje wobydlerjow zběrać, Radworska wjesnjanostka Madeleine Rentsch připowědźi.
Nawodnica gmejnskeho zarjadnistwa zdobom připowědźi, zo chcyła gmejna tuchwilne prowizoriske parkowanišćo při Radworskim kěrchowje wutwarić a tež tam spěchowanje 75 procentow wužiwać. Nastać ma 19 parkowanskich městnow. Gmejna dyrbi 24 500 eurow ze swojeje kasy přinošować, projekt płaći cyłkownje 100 000 eurow.
Skónčnje zaso zwěrjata picować
Wustajenišća zaso witaja
Kamjenc. Lessingowy kaž tež sakralny muzej a Słodarnja w Kamjencu su wotnětka zaso w znatym času wotewrjene. To zdźěli Matthias Hanke, zastupowacy nawoda Lessingoweho muzeja. W galeriji sakralneho muzeja Hanineje cyrkwje su widźeć dźěła pod hesłom „Transicija – fotografije Michaela Krusche“. Nastała je zběrka składnostnje 60. narodnin we Wojerecach rodźeneho wuměłca, kiž dźensa w Berlinje bydli a skutkuje. Motiwy za swoje fotografije je Kruscha našoł w mnohich krajach swěta – w Marokku, Kazachstanje, Južnej Africe a Patagoniskej, w Omanje, Jemenje a Israelu. Zapopadnył je tam po zdaću pozabyte městnosće. Pod titulom „Tekstury“ pokazuje wón wot čłowjeka wopušćene přebywanišća jako kolažu.
Wuměłstwo a přiroda
Znjesliwe zwyšenje přinoška
Někotři starši dyrbja wot septembra hłubšo do kapsy přimnyć
Rakecy (JK/SN). Prawidłownje abo we wěstych wotstawkach zaběraja so gmejnske rady z přinoškami staršich za hladanje jich dźěći w dnjowych přebywanišćach. Zwjetša činja to krótko po tym, zo su zhromadnje z nošerjom wudawki za wobhospodarjenje dźěćacych zastaranišćow wotličili.
W Rakecach měješe so gmejnska rada na swojim wčerawšim posedźenju z mjenowanej naležnosću zaběrać. Nawodnica financneho wotrjada gmejny Franziska Pfeiffer rozłoži radźićelam wotličenje kóštow wobhospodarjenja a kalkulaciju nowych popłatkow. Při tym skedźbni wona na to, zo złožuje so namjet gmejny na zakonske postajenje, w kotrym ramiku smědźa so staršiske přinoški pohibować. Rakečanska kalkulacija a namjet wostanjetej pod maksimalnym podźělom, a namjetowany popłatk je tež w přirunanju z dalšimi gmejnami wokrjesa w znjesliwym srjedźnym polu.
Wulke znamjo mjezsobnosće
Akcija „Dźeń a nóc tolerancy“ je so lětsa najebać koronapandemiju wotměła. Město Wojerecy sadźa z njej jasne znamjo mnohotnosće a mjezsobnosće. W zhromadnym dźěle z iniciatiwu Ciwilna kuraža a Dźěłanišćom za koordinaciju kubłanja su projekt jako wjacore online-zarjadowanja přewjedli.
Wojerecy (SiR/SN). „Naš zaměr z tajkimi akcijemi je, zo jedyn na tamneho bóle dźiwa, zo so rozumimy, tež hdyž smy rozdźělneho měnjenja“, rozjasnja Franziska Grabowski. Nawodnica kluboweho domu za młodźinu Ossi je nětko dobyćerjow na wuznamjenjenje přeprosyła, kotřiž běchu wuměłske twórby zapodali. Namołwjeni, na wubědźowanju w molowanju a fotografowanju so wobdźělić, běchu dźěći a młodostni. Hesło rěkaše: „Toleranca rěka za mnje ...“.
