Chcedźa serbsku rěč dožiwić
Patrona domu wopominali
Smječkecy (SN). Za wobydlerjow a sobudźěłaćerjow Domu swj. Jana w Smječkecach běše 24. junij wosebity dźeń. Wopominali su woni patrona swojeho domu w Njebjelčanskej cyrkwi ze swjatočnej Božej mšu, kotruž swjećeše wosadny farar Michał Nawka z diakonom Stephanom Klosu. Kemše na pišćelach přewodźał je René Juriš. Hesło lětušeho swjedźenja běše „Sy dźěl zhromadnosće a njejsy ženje sam.“ Hladajo na wuzwolenu tematiku su so wobydlerjo kaž tež personal hišće raz z koronapandemiju rozestajeli. Božu słužbu je chór sobudźěłaćerjow wobrubił, a wosebite připóznaće žněješe reja, kotruž běchu wobydlerjo domu w swojim wólnym času nazwučowali.
Nowotwar budźe dróši
Gmejna Wulka Dubrawa ma wjace pjenjez za gratownju wudać
Klukš (CS/SN). Gmejna Wulka Dubrawa ma so na to nastajić, zo budźe nowotwar wohnjowoborneje gratownje w Klukšu dróši, hač dotal předwidźane – a to wo něhdźe 20 procentow. Na kóncu drje změja inwesticisku sumu něhdźe dweju milionow eurow. Planowane bě 1,8 milionow. Pobrachowace financne srědki wozmu z njewužiwanych kóštow za Dźěćacu kupu Wulka Dubrawa a za Dom zetkawanja w Chwaćicach. Wobě naprawje přesunu, a tak dyrbi gmejna tele srědki za swój klětuši etat zaplanować.
Projekt „Njebjesa“ w Miłoćicach ludźi zas a zaso zaběra
Njebjelčicy (SN/JaW). Projekt Njebjelčanskeje gmejny „Njebjesa“ pola Miłoćic wobydlerjow komuny dale zaběra. Stajnje zaso jewja so prašenja k tomu, tak tež na minjenej zhromadźiznje tamnišeje gmejnskeje rady w Njebjelčicach.
Karty su wčera jenož tak zalětowali, jako serbscy seniorojo w ...
Krótkopowěsće (30.06.21)
Dale mało nowoinfekcijow
Budyšin/Zhorjelc. Komuny we wokrjesu Budyšin su nimale bjez jeničkeje koronainfekcije. Jenož z Worklečanskeje zdźělichu jednu a z Radworskeje dwě. Tež w městach je mało natyknjenjow, we Wojerecach kaž w Budyšinje dwě. Za wčera zdźělichu pjeć nowoinfekcijow. Incidenca wučinja po RKI dźensa 3,7. Wokrjes Zhorjelc poda wčera tři dalše natyknjenja. Incidenca po RKI tam je 2,0.
Nowe předsydstwo wuzwolene
Budyšin. Spěchowanske towarstwo Serbskeho gymnazija Budyšin ma nowe předsydstwo. Na wčerawšej „hłownej“ wuzwolichu dr. Daniela Měrćinka za předsydu, Katrin Suchec-Dźisławkowu jako městopředsydku a Katharinu Čornakowu za pokładnicu. Po 13 lětach skutkowanja njeběchu dr. Cordula Ratajczakowa a Marcela Wowčerjowa kaž tež po šěsć lětach Maria Hantušowa hižo nastupili.
Dale mjenje bjezdźěłnych
Křiž w Słonej Boršći poswjećeny
Wjesny dźěl Budyšina Słona Boršć zhladuje na wotměnjate stawizny, kotrež wopřijimaja mjez druhim přisłušnosć ke křesćanskimaj konfesijomaj. Na to je minjeny pjatk we wsy tež poswjećenje křiža pokazało.
Słona Boršć (CS/SN). Wjes Słona Boršć, přisłušaca Budyskemu tachantstwu, bu pjenježneje nuzy dla w lěće 1649 ewangelskemu knježkej jako zawdawk přewostajena. Wjetšina Słonoboršćanow bě katolskej wěrje přiwšěm dale swěrna. Tak postajichu w lěće 1902 wosrjedź wsy křiž ze serbskim napisom „Jězuso, smil so“. Na městnje, hdźež so wjacore puće křižuja, bě drje tež hižo wjele lět do toho křiž stał. Wšako wjedźe tam mjez druhim dawna putniska šćežka do španiskeho Santiaga de Compostela.
Loni hišće bě křiž z kerkami wobrosćeny a njebě hižo hladany. Tak je město Budyšin, kotremuž ležownosć słuša, městnosć z křižom sporjadkować dało. Móžno bě to dźakowano spěchowanju 7 500 eurow z komunalneje pawšale Sakskeje. Kaž Budyski financny měšćanosta dr. Robert Böhmer rjekny, bě zhromadne dźěło mjez městom a cyrkwjomaj jara płódne. Tak su křiž nětko we wobłuku ekumeniskeje nutrnosće poswjećili.
Policija (29.06.21)
Do štoma zajěł
Rakecy. Póndźelu popołdnju je wodźer VWja Caddy na zwjazkowej dróze B 96 mjez Rakecami a Budyšinom w křiwicy z awtom z dróhi zjěł a do štoma zrazył. W jězdźidle zatłusnjeneho šofera dyrbješe wohnjowa wobora z ćežkej techniku wuswobodźić. Z helikopterom dowjezechu jeho wuchowanske mocy do kliniki. Wohnjowej woborje z Rakec a Njeswačidła stej ze 37 kameradami na městnje pomhałoj. Zwjazkowa dróha bě něhdźe hodźinu za zjawny wobchad dospołnje zawrjena.
Turizm wožiwić najwažniše
Puć zrunany za přihot infrastruktury a medije při Hórnikečanskim jězoru
Łaz (AK/SN). Gmejna Łaz prócuje so dale zaměrnje wo to, towarstwowe žiwjenje kaž tež turizm při Hórnikečanskim jězoru zaso wožiwić. K tomu je so tamniša gmejnska rada na swojim minjenym posedźenju jasnje wuznała. Tak gremij jednohłósnje wobzamkny, přepodać nadawki za infrastrukturne wotkrywanje towarstwoweho centruma při južnym přibrjohu Hórnikečanskeho jězora njedaloko Koblic (Koblenz) a Wulkich Ždźarow (Groß Särchen). Nadawk dósta Budyska wotnožka firmy Strabag. Cyłkowne kóšty za nadawk wučinjeja 1 081 000 eurow. Hłowne ćežišćo nadawka je wotkrywanje za pitnu wodu a wopłóčki, za dróhotwar kaž tež krajinotwar.
Pjeć młodych baćonow w Ralbicach
Zańdźeny pjatk běše zaso tak daloko, dźěl hornjołužiskich baćonow dósta pjeršćenje, hačrunjež njeběše přijomne wjedro. Wjacore šwihele běchu k tomu wjedli, zo akterojo kaž młodźata chětro zmoknychu, kaž je to na wobrazu widźeć. Wšitko pak ničo njepomhaše, ornitologa Stefan Siegel, kiž tele dźěło hižo wjacore lěta tu pola nas wukonja, bě ekstra z Zschopauwa přijěł. Tež wotpowědna technika, kotruž firma Lift Manager kóžde lěto sponseruje, bě na městnje.
Prěnja stacija bě Komorow pola Klukša. Dale dźěše mjez druhim přez Šćeńcu (Steinitz) a Komorow pola Rakec do Ralbic. Tamniši porik baćonow běše hižo w zańdźenych lětach jedyn z najproduktiwnišich, štož dorost nastupa. Lětsa měješe samo pjeć młodźatow. Na přichodnych stacijach, kaž w Sernjanach, Nuknicy a Chasowje, běchu jich tři młodźata. Dohromady su 34 młodych baćonow na jědnaće městnach wopjeršćenili. Bohužel njemějachu wjac pjeršćenjow k dispoziciji, dokelž bě so dźěl skazanych mjez Finskej a Němskej zhubił.
