Wjele dobrych idejow zrodźili a wěru zjawnje wuznawali

Pančicy-Kukow (SN/MWj/JaW). Zo změja jutry 2020 historiski charakter, bě z toho časa wěste, jako bu znate, zo křižerjo tónraz­ jěchać móc njebudu. Mnozy drje wobchowachu sej škričku nadźije, zo so hišće něšto změni, spjelniła pak so wona njeje. Ćim bóle bě wobdźiwajomne, na kak wšelakore wašnje su křižerjo hromadźe z wobydlerjemi přiwšěm jutrowne poselstwo Zrowastanjeneho zjawnje wozjewjeli. Njemóžachu drje je na konju do susodneje wosady njesć, zjawnje zaklinčało jutrowne haleluja přiwšěm na mnohich městnach je.

Tak so na přikład we Wěteńcy woby­dlerjo hižo sobotu wječor po w Serbskim rozhłosu wusyłanych kemšach z Chrósćic na nawsy zhromadźichu a pod kantorstwom Hawštyna Smoły jutrowne kěrluše zaspěwachu. W samsnym času zestupachu so tež wjacore swójby w Róžeńće před swojimi ležownosćemi a zhromadnje kěrluše spěwachu. Mnozy mějachu při tym jutrownu swěčku w ruce a dalši pisachu jutrowne poselstwo z krydu na dróhi.

Štož smy jutrońčku w katolskich Serbach dožiwili, bě bjez přehnawanja historiske. Lětuše jutry zańdu do stawiznow. Jako bě jasne, zo křižerjo lětsa njepojěchaja, bě skorženje najprjedy wulke a něchtóžkuli hnydom připowědźi, zo chce přiwšěm jěchać. Někotři wšak su to tež činili. Za wjele wjetši skutk pak mam, kak je wulka wjetšina křižerjow z njezwučenej situaciju wobchadźała a z njeje to najlěpše sčiniła. Zo su woni na telko městnach hromadźe z wěriwymi jutrowne kěrluše zaspěwali a so modlili, bě krasny wuraz zjawneho wuznawanja wěry. Hdźež sym to sam dožiwił, je mje huškało a we mni hłuboki zaćišć zawostajiło. A što sej z tychle jutrow za přichod wobchowamy? Nadźijomnje to, zo sej wuwědomimy, kotre bohatstwo z kóždolětnymi křižerskimi procesionami mamy. Zo wone samozrozumliwe njejsu, smy lětsa nazhonili. A jeli klětu z hinašimi wočemi na nje hladamy, měješe to wšo swój zmysł. Marian Wjeńka

Kamjenc/Budyšin (SN/at). Podawkaj stej so minjenu srjedu skoro kryłoj: W Budyšinje pominaše dr. Jana Gärtner, hamtska lěkarka Budyskeho wokrjesa, ludźi, koronawirusa dla nětko hubu a nós ze samošitym tekstilnym zakryćom škitać. W Kamjenskej radnicy je tamniše předewzaće Sachsen Fahnen GmbH prěnje 3 000 tekstilnych maskow přepodało, kotrež­ bě komuna tam skazała. Krótkodobnje je firma swoju produkciju rozšěriła, wobkrući jednaćel Jürgen Ruhland.

Kriza koronawirusa dla bě zamołwitym w Lessingowym měsće kazała, wulce njerěčeć, ale jednać. „Smy so po rozmyslowanjach w radźe staršich a w měšćanskej radźe za to rozsudźili, kóždemu wobydlerjej města Kamjenca wysokohódnotne, znowa wužiwajomne zakryće za hubu a nós přewostajić“, wuswětla Ka­mjen­ski wyši měšćanosta Roland Dantz (njestronjan), „wšitkim měšćanam, tež tym, kotřiž w starownjach a hladarnjach bydla.“ Dantz rěči nastupajo tajki škit strowoty wo „prěnim wuhotowanju“ za wšitkich 17 000 wobydlerjow.

Dalšej wosobje zemrěłoj

Budyšin/Zhorjelc. W Radebergskej hladarni je w zwisku z koronawirusom dalša wosoba zemrěła, runje tak kaž pacientka w jednej chorowni Zhorjelskeho wokrjesa. Tak su w Budyskim wokrjesu mjeztym dohromady štyri, w Zhorjelskim jědnaće smjertnych padow pan­demije dla. Přez jutry je ličba inficěro­wanych tu na 224 (+25), w Budyskim wo­krjesu na 294 (+65) přiběrała.

Dale jenož hač do Zhorjelca

Budyšin. Pólske knježerstwo je zastaće mjezynarodnych železniskich zwiskow najprjedy hač do 3. meje 2020 podlěšiło. Na to skedźbni dźensa wobchadny zwisk Hornja Łužica-Delnja Šleska (ZVON). Tak jězdźa ćahi Trilex z Drježdźan do Zgor­zeleca dale jenož hač do Zhorjelca. Tam žana móžnosć njeje přestupić do směra na Pólsku. Ćahi KD do Jelenjeje Góry w Zgorzelecu skónča.

Jandźelej do njebja swěćitaj