Dobre powěsće je wčera statny sekretar w sakskim nutřkownym ministerstwje dr. Michael Wilhelm w Kamjencu wozjewił. Lessingowe město ma so takrjec z IT-centrumom sakskeho statneho knježerstwa stać .
Kamjenc (BG/SN). To samo najwjetši optimisća wčera wočakowali njeběchu, jako sćěhowachu přeprošenje na nowinarsku rozmołwu ze statnym sekretarom w sakskim nutřkownym ministerstwje. W Kamjencu matej so hłowne zarjadnistwo Sakskeje informaciskeje słužby Drježdźany (SID) a nowe kubłanske srjedźišćo za IT zasydlić, a to w Schweitzerowym domje Lessingoweho gymnazija na Macherowej. To přinjese 90 nowych dźěłowych městnow do města. Hižo klětu chcedźa projekt planować započeć a lěto pozdźišo po wšěm zdaću twarske dźěła zahajić.
Budyšin (CK/SN). Za wudźeržowanje hwězdarnje přizwola město Budyšin lětnu přiražku 14 000 eurow za personalne kóšty a dalše 70 000 eurow, zo bychu so připrawy, twarjenja a ležownosć hladali. Na to běštej so financny wuběrk města a spěchowanske towarstwo hwězdarnje loni w nowembru dojednałoj. Nimo toho chcychu spěchowanske zrěčenje wotzamknyć, zo byštej wobě stronje wot klětušeho planowansku wěstotu měłoj. Do toho měješe towarstwo koncept zdźěłać, kak ma so hwězdarnja wobhospodarjeć. Zo bychu kontakt mjez spěchowanskim towarstwom a nawodami šulow nawjazali, přewjedźechu swoje klawsurne posedźenje we hwězdarni. Wo wšěm tym informowaše nětko financny měšćanosta Michael Böhmer měšćanskich radźićelow na jich zašłym posedźenju. Mjeztym koncepcija předleži, kubłanski a socialny zarjad ju fachowje posudźuje.
Film ze Serbowku počesćeny
Wien. Hrajny film „Frau Müller muss weg“ ze serbskej dźiwadźelnicu Gabrielu Šmajdźinej w jednej z hłownych rólow su wčera we Wienje w kategoriji „najlěpši kinofilm“ ze Złotej Romy počesćili, najwyšim wuznamjenjenjom Awstriskeje za filmowe a telewizijne produkcije. Film je hižo milion ludźi widźało.
Namócnosće w Pólskej
Knurów. Po ćežkich namócnosćach wokoło koparskeje hry z jednym smjertnym woporom w pólskim Knurowje (Delnja Šleska) su hooliganojo wčera wječor znowa policajsku staciju nadběhowali a pjeć policajskich jězdźidłow wobškodźili. Policija 30 z nich zaja. Sobotu bě w Knurowje po hrě k namócnosćam dóšło, při čimž bu 27lětny wot gumijoweje kulki policista smjertnje trjecheny.
Němskej łódźi dojěłoj
Pančicy-Kukow (SN/MWj). Na wšě 30 porow pěstowarskich a trochu staršich dźěći kaž tež młodostnych je sobotu w Kukowje na 25. mejemjetanju wokoło meje rejwało, štož běštej Mechthild Hogowa a Anja Hejdušcyna z nimi nazwučowałoj. Mejske pory běchu mjez małymi Janik Pjetaš a jeho kuzina Lotta Pjetašec, mjez srjedźnymi Jakub Clausen a jeho sotra Hanka a mjez młodostnymi Richard Hawš a Pia Šołćic. Wšitke holcy běchu serbske wuslěkane. Za jubilejny swjedźeń bě Maria Šołćina někotre nowe mejske pěsnje spisała, kotrež wona hromadźe z Měrćinom Weclichom přewodźeše a kotrež w bohatej ličbje přichwatany publikum sobu spěwaše. W stanje bě widźeć wustajeńca z mnohimi fotami a z nowinskimi wurězkami wo mejemjetanjach minjeneho štwórćlětstotka, zestajena wot Bianki Vacekoweje. Něchtóžkuli z wopytowarjow so sam na wobrazach spózna a so na tu abo tamnu stawizničku dopomni.
Budyšin (SN). Wulka młodźinska chłostanska komora Budyskeje wotnožki Zhorjelskeho krajneho sudnistwa zaběra su jutře a srjedu z nadpadom, kotryž sta so před lětomaj před Kubšiskim dwórnišćom. Statne rěčnistwo dźensa 35lětnemu wobskorženemu z pólskeje Jelenjeje Góry wumjetuje, zo bě wón hromadźe z dalšim skućićelom, kiž je mjeztym hižo zasudźeny, do připadnje nimoduceho muža bił. Po tym zo bě škodowany padnył, kopaštaj bičkaj swojemu woporej do hłowy a do brjucha. Na to pokradnychu zbitemu móšeń ze sto eurami, EC-kartku, časnik, zapalak a cigarety.
Wobskorženy je w Němskej wjacekróć předchłostany, jónu tež w Pólskej. Do njeskutka w Kubšicach bě wón alkohol pił. Dokelž je při kóždym z předchłostanych njeskutkow pod wliwom alkohola stał, statne rěčnistwo namjetuje, 35lětneho psychisce posudźować dać. K wumjetowanjam je so wón dotal jeno sporadisce wuprajił. Po jutřišim zahajenju jednanja w 9 hodź. je srjedu w samsnym času dalši termin.
Harley z garaže pokradnyli
Wojerecy. W času wot minjeneho štwórtka hač do soboty zadobychu so njeznaći do garaže blisko Wojerowskeje industrijoweje přestrjenje. Z njeje pokradnychu motorske typa Harley Davidson FXST z čisłom HY-T 29. Jeho wobsedźer bě mašinu z někotrymi přidatnymi dźělemi wuhotował, tak zo trochuja hódnotu jězdźidła na něhdźe 15 000 eurow.