Dale wjace infekcijow
Zhorjelc/Budyšin. W Budyskim wokrjesu je tuchwilu 383 (+ 9) z koronawirusom natyknjenych. Nowoinfekcije zwisuja přewažnje z chětro potrjechenej ambulantnej hladanskej słužbu w Kamjencu. W Zhorjelskim wokrjesu je dalša wosoba na wirus zemrěła. Dohromady je tam dotal 22 smjertnych padow. Dokelž njejsu wčera žane dalše natyknjenje zwěsćili, wosta ličba inficěrowanych 268.
Druhi raz nominowanaj
Drježdźany. Předewzaće „Helmheld“ Gordiana Krala z Chelna a Tima Döki z Budyšina je znowa za sakske předewzaćelske myto w kategoriji „Start-Up“ nominowane. W Drježdźanskim wobchodźe a w interneće předawataj wonaj kolesowarske nahłowniki. W škleńčanej manufakturje sakskeje stolicy chcedźa předewzaćelske myto 5. junija spožčić.
Poskitk Płomjenja w syći
Měšćanska biblioteka a zwěrjenc we Wojerecach stej zaso přistupnej, Měšćanski muzej na tamnišim hrodźe pak wostanje dale zawrjeny.
Wojerecy (SN/JaW). Po mjeztym sydomtydźenskej nanuzowanej přestawce stej Wojerowska měšćanska biblioteka Brigitty Reimann a tamniši zwěrjenc nětko zaso přistupnej. Wo tym informuje sobudźěłaćer Měšćanskeho zawoda zwěrjenc, kultura a kubłanje Felix Pál w nowinskej zdźělence. „Wjeselimy so ze swojim poskitkom k tróšku normaliće w tymle ćežkim času přinošować a tak předewšěm swójbam po tydźenjach wulkich wobmjezowanjow znowa wotměnu, wjeselo a wočerstwjeneje skićić směć“, pisa jednaćel měšćanskeho zawoda Arthur Kusber k znowawotewrjenju wobeju zarjadnišćow we Wojerecach.
Kontroluja škitne naprawy
Budyšin/Zhorjelc. Policija wokrjesaj Budyšin a Zhorjelc tele dny podpěruje, zwoprawdźenje wukazow škitnych naprawow koronawirusa dla pruwować. Kaž w zdźělence policije rěka, su zastojnicy tohodla w zjawnosći prezentniši, tež na dwurěčnych wsach Hornjeje Łužicy, a pruwuja zdobom pokiwy wobydlerjow. Wjetšina so po postajenjach ma. Wutoru pak dyrbjachu uniformowani wjacore razy zakročić a zetkanja rozpušćić.
Budyšin. Domowinske župy a serbske towarstwa kaž tež wšitcy jednotliwcy su namołwjeni hač do 30. junija swoje namjety třěšnemu zwjazkej zapodać, kotre zasłužbne wosobiny měli lětsa z Mytom Domowiny, Mytom Domowiny za dorost a čestnym znamješkom wuznamjenić.
Z Mytom Domowiny česći třěšny zwjazk tych, kotřiž so zaměrnje a wuspěšnje za zachowanje a wozrodźenje serbskeje kultury, wosebje pak serbskeje rěče zasadźeja. Myto Domowiny za dorost spožča młodostnej/młodostnemu abo tež skupinje, kiž so na wusahowace wašnje za serbsku rěč a kulturu angažuja. Z čestnym znamješkom připóznawa Domowina zasłužby w towarstwowym dźěle, zwoprawdźace program a směrnicy třěšneho zwjazka.
Mytowanski wuběrk prosy wo to, za namjet nowy formular wužiwać, kotryž je na internetnej stronje www.domowina.de/hsb/domowina/wuberki/mytowanski-wuberk/formular-za-zapodace-namjeta wozjewjeny. Wupjelnjeny dokument móža namjetowacy z mejlku referentej za kulturne naležnosće Clemensej Škodźe na abo z listom Domowinje, Póstowe naměsto 2, 02625 Budyšin pósłać.
Chrósćicy (JK/SN). Tež gmejnska rada Chrósćicy je swoje prěnje posedźenje pod wuměnjenjemi koronapandemije wotměła. Na nowym městnje a z trěbnym wotstawkom we wjacezaměrowej rumnosći „Jednoty“ wěnowachu so radźićeljo wčera wjacorym nadawkam.
Prjedy hač zabrachu stejišćo k twarskim próstwam wobydlerjow, předstaji zastupjer energijoweho zastaraćela ENSO skrótka zrěčenje z gmejnu nastupajo přestajenje nadróžneho wobswětlenja na LED-techniku. Wobsah a nadrobnosće běchu hižo w měrcu rozjimali, nětko dźěše wo formulaciju zrěčenja. Z jednohłósnym wobzamknjenjom móže ENSO planować započeć. W běhu přichodnych dwanaće měsacow budu krok po kroku wobswětlenje přestajić a přidatnje wosom lampow nastajić.
Gmejna Slepo je wjacore ležownosće z nuzoweho přizamknjenja k wopłóčkowej syći wuwzała. Hač do kónca lěta pak dyrbja wobsedźerjo swoje připrawy na biologiske wotstronjenje přetwarić.
Slepo (CK/SN). Z jednym hłosawzdaćom su zapósłancy Slepjanskeje gmejnskeje rady předwčerawšim štwórte přiměrjenje wopłóčkoweho koncepta wobzamknyli. Z hospodarskich a techniskich přičin je móžno ležownosće z nuzoweho přizamknjenja k centralnej wopłóčkowej syći wuswobodźić. Tam maja wopłóčki decentralnje w biologiskich małorjedźernjach abo w zběrnikach wotstronjeć. Wobstejace mechaniske čisćernje dyrbja wobsedźerjo ležownosćow hač do 31. decembra na biologiske přetwarić. Spěchowanske srědki za to wudawachu jenož hač do lěta 2015. Hórnistwa dla pak běchu dobu za Slepo-juh, Trjebink a Rowno dwójce podlěšili.