Washington (dpa/SN). Prezident USA Donald Trump je pod wěstymi wuměnjenjemi zwólniwy, z wikowanskimi partnerami wo wolóženjach nastupajo nowe cła rěčeć, kotrež sej USA wot najnowšeho žadaja. Kónc tydźenja je Trump ze statnikami ze wšeho swěta telefonował, wón žurnalistam w swojim prezidentskim lětadle přeradźi. „Woni napjeće na to čakaja, zo móhli deal z nami wotzamknyć.“ Zdobom Trump rjekny, zo njeje dlěje zwólniwy, wikowanske deficity akceptować, hdyž druhe kraje wjace tworow do USA dowožuja hač tam sami kupuja. Trump kritizuje wosebje Chinu. „Sym zwólniwy, z Pekingom rěčeć. Woni pak dyrbja nadbytk wottwarić.“

Tež europskim statam njeje prezident USA dobry, dokelž maja tohorunja wikowanski nadbytk. Europa z USA „jara špatnje wobchadźa“, Trump znowa twjerdźeše. Na bursach so cła USA raznje wuskutkuja. DAX, indeks najwažnišich předewzaćow, je wo dźesać procentow spadnył.

Čłonojo so na koaliciskich jednanjach mjez uniju a SPD postorkuja

Berlin (dpa/SN). Woteběraceje nahladnosće mjez wolerjemi a interneje kritiki na bazy dla steji unija CDU/CSU při koaliciskich jednanjach z SPD pod ćišćom. Tež w rjadach SPD jewi so kritika.

Dźensa su posrědkowarjo stron w Berlinje dale wo koaliciskim zrěčenju wuradźowali. Wodźacy zastupnicy unije su sej wěsći, zo je z tym poslednja doba zahajena. W tutej rozsudnej fazy CDU a CSU na tym wobstawatej, zo ma koaliciske zrěčenje jasny profil wobeju stron měć. Tak rjekny hessenski ministerski prezident Boris Rhein (CDU) nowinarjam hladajo na wuslědk minjenych wólbow zwjazkoweho sejma: „Zasadnje płaći, zo je mjez uniju a SPD na zwjazkowej runinje wulki procentualny wotstawk. Tole dyrbi so w koaliciskim zrěčenju jasnje wotbłyšćować.“

Pozadk je njespokojnosć na bazy CDU/CSU, zo njeje šef CDU Friedrich Merz ­we wólbnym boju přilubjenu změnu politiki na polu migraciskeje, hospodarskeje a zakitowanskeje politiki přećiwo woli socialdemokratow přesadźić móhł.

Jako wozjewich, zo budu prěni raz na hłownej zhromadźiznje Domowiny pódla, to mi mnozy wutrobnu sobuželnosć wuprajichu. To wšak je najwostudliše zarja­dowanje, kotrež móžeš jako nowinar přewodźeć, mi přišeptnychu. Z něšto wotstawkom móžu nětko rjec: Haj, tež hłowna ­Domowiny je, kaž ta mnohich druhich ­towarstwow, struchła naležnosć. Ale: Hłowna a wólbna zhromadźizna třěšneho zwjazka serbskich towarstwow je mi tež dopokazała, zo móža Serbowki a Serbja přezjednje hromadźe dźěłać. Nimale wšitke namjety k wothłosowanju su delegatki a delegaća jednohłósnje přiwzali, napřećiwneho hłosa ani jeničkeho wuhladał njejsym. Prašam so nětko wězo, hač zaleži tute zadźerženje na samym konsensu w kruhu delegowanych, abo hač so cyle jednorje konfliktow boja. Samsny zaćišć zawostaji we mi tež wašnje wolenja: Woprawdźe wolił mjenujcy nichtó njeje, jenož přihłosował. Socialistiske poměry, móhło wótre pjero pisać. Maximilian Gruber

Łužiska premjera filma „Mit der Faust in die Welt schlagen“ je minjeny pjatk něhdźe 120 přihladowarjow do Budyskeho filmoweho palasta přiwabiła. Po předstajenju su awtor literarneje předłohi Lukaš Ričel, režiserka Constanze Klaue a producent ­Alexander Wadouh (wotlěwa) na prašenja publikuma wotmołwili. Wjetšinu wopytowarjow je pask hnuł a tójšto hosći překwapił, dokelž „pokazuje Łužicu z perspektiwy, kajkuž sej w ‚serbskim pucherju‘ dotal wuwědomili njejsmy“. Jednotliwcy su ­kritizowali, zo wuwostaja film porno romanej „wažne figury“, štož pak njehodźi so po słowach režiserki w tajkichle adapcijach-zhusćenjach wobeńć. Foto: Hanka Šěnec