Komisija: Rozsudźimy sami
Berlin (dpa/SN). Hladajo na debatu wo zwyšenju minimalneje mzdy w Němskej je zamołwita komisija swoju njewotwisnosć potwjerdźiła. Komisija minimalneje mzdy je stajny gremij tarifowych partnerow. Jeje čłonojo njejsu na žanežkuli wukazy wjazani, rjekny předsydka komisije Christiane Schönefeld. Pozadk su wuprajenja předsydy CDU Friedricha Merza hladajo na mzdu 15 eurow w lěće 2026. Wón chcył pak ju hakle 2027 měć.
Ukrainske truty Kursk trjechili
Moskwa (dpa/SN). Zapadnoruske město Kursk bě minjenu nóc po ruskich informacijach zaměr ukrainskeho nadpada z trutami. Znajmjeńša jedyn wobydler je žiwjenje přisadźił. Wjacore twarjenje so zapalichu. Minjene měsacy bě Ukraina wospjet ruske města njedaloko ukrainskeje mjezy z trutami nadběhowała. Při tym so stajnje zaso poradźi, tež daloko za ruskej mjezu města a zawody industrije trjechić a wulke škody zawostajić.
Hamas žadanje wotpokazuje
Madźarscy policisća su wčera před twarjenjom parlamenta w stolicy ...
Wójsko so schadźowało
Sumy (dpa/SN). Po ćežkim ruskim raketowym nadpadźe na město Sumy w sewjerowuchodźe Ukrainy je guwerner wobkrućił, zo je so tam zarjadowanje ukrainskeho wójska wotměło. „Běch na to přeprošeny“, rjekny Wolodymyr Artjuch powěsćerni Suspilne. Tež wjesnjanosća kónčiny kritizuja, zo je so ukrainske wójsko w měšćanskej hali njedaloko ruskeje mjezy schadźowało. „To je wězo potencielny cil ruskeho nadpada a wohrožuje ciwilnych wobydlerjow.“
Při ruskim raketowym nadpadźe je wčera 35 ludźi žiwjenje přisadźiło. Nadpad bě mjezynarodne rozhorjenje zbudźiło. Fachowcy z toho wuchadźeja, zo je ruske wójsko wo zeńdźenju zhoniło a rakety na objekt w měsće wusměriło.
Blokuja srědki
Pistorius spjećuje so planam Merza
Hannover (dpa/SN). Amtěrowacy zakitowanski minister Boris Pistorius (SPD) zhladuje skeptisce na plany přichodneho zwjazkoweho kanclera Friedricha Merza (CDU), po wothłosowanju z europskimi partnerami Ukrainje němske daloko sahace rakety typa Taurus přewostajić. Na konferency SPD w Hannoveru Pistorius wuprajenjam znapřećiwi, zo je pječa hižo přeco za tajku wojersku pomoc na dobro Ukrainy był, prajo: „To njejsym ženje rjekł.“ Pistorius ma dobre argumenty za raketu w rukach Ukrainjanow. „Je pak tež tójšto argumentow přećiwo tomu“, rjekny Pistorius, kiž budźe prawdźepodobnje tež w nowej koaliciji CDU/CSU a SPD zakitowanski minister.
Merz bě předwčerawšim, njedźelu, w sćelaku ARD swoju zasadnu zwólniwosć zwuraznił, Ukrainje rakety Taurus přewostajić. Rakety móhli teoretisce hač do Moskwy lećeć. Ruska je wospjet zwurazniła, zo by zasadźenje tuteje brónje jasne sćěhi za Němsku měło. Zwjazkowy kancler Olaf Scholz (SPD) bě Taurus w rukach Ukrainjanow stajnje wotpokazał.
SPD wothłosuje wo koaliciji
Čłonojo socialdemokratiskeje strony rozsudźa internetnje
Berlin (dpa/SN). Dwaj tydźenjej ma dobrych 358 000 čłonow SPD wot dźensnišeho chwile, wo koaliciskim zrěčenju z CDU/CSU wothłosować. Wot 8 hodź. je internetna platforma přistupna, na kotrejž móža socialdemokraća hač do 29. apryla w połnocy swój hłós wotedać. 30. apryla chcedźa wuslědk wozjewić.
Předsydka strony Saskia Esken w rozmołwje z powěsćernju dpa 144 stronski dokument zrěčenja zakituje. Wona drje widźi tam tohorunja „dwě stronje medalje“. Zběhnjenje mjezy zadołženja za zakitowanje, wurjadne zamóženje za inwesticije a naprawy k sylnjenju hospodarstwa ma wona za dobry zakład zhromadneho dźěła z uniju. „Wuchadźam z toho, zo dóstanje zrěčenje dobre přihłosowanje.“
Za wotzamknjenje koaliciskeho zrěčenja njeje jenož wjetšina hłosow trěbna. Na ryzy digitalnym wothłosowanju dyrbi so znajmjeńša 20 procentow wšěch čłonow wobdźělić. Čłonam su z póštu tajne klučowe słowo pósłali, z kotrymž móža woni zhromadnje z čłonskim čisłom swój hłós wotedać. Štóž žadyn internet nima, móže swój hłós tež w jednaćelskim běrowje wotedać.
Zahubny njerozum SPD
Porjedźenka
To a tamne (15.04.25)
Sto hodźin žiwy pohrjebany być – z tutej nowej show chce internetny poskićowar Joyn zajim přihladowarjow budźić. Šěsć němskich, w interneće aktiwnych wosobinow chce so na eksperiment zwažić, mjez nimi entertainer Jens Knosalla. Pospyt ma „psychiske mjezy zwěsćić a prastary strach čłowjeka“ zapřijeć. 16 dźělow wopřijaca show „Deep Down – zahrjebani“ započina so 4. meje, Joyn zdźěla.
Zranjeny hołbik na dróze je w Porynsko-Pfalcy wobchadne njezbožo zawinował, při kotrymž so dwě wosobje zraništej. 40lětna šoferka wosoboweho awta bě borzdźidła, jako ptačka wuhlada. Wodźerka awta za njej móžeše drje hišće reagować, 23lětny motorski pak situaciju přepozdźe spózna a do awtow zrazy. Wón a sobujěduca so zraništaj.
Požadarjow azyla wróćo pósłać
Berlin (dpa/SN). Přichodny zwjazkowy kancler Friedrich Merz (CDU) chce ličbu nowych požadarjow azyla w Němskej na 100 000 wob lěto wobmjezować. Tole rjekny Merz wčera wječor w sćelaku ARD. Mjeza přežadanja městow, gmejnow, šulow, chorownjow a infrastruktury je docpěta, wón rjekny. Tohodla chce nowe knježerstwo pod jeho nawodom iniciatiwu zahajić, z kotrejž požadarjow wróćo sćelu a přićah swójbnych migrantow wobmjezuja.
Wjace milionarow w Sakskej
Kamjenc (dpa/SN). Ličba ludźi, kotřiž wob lěto wjace hač milion eurow zasłužeja, tež w Sakskej dale přiběra. Kaž krajny statistiski zarjad w Kamjencu zdźěla, je ličba tak mjenowanych dochodowych milionarow w swobodnym staće lěta 2020 na 490 rozrostła. 2019 bě jich 476 milionarow a lěto do toho 427. Najwjace zamóžnych ludźi bydli w Lipsku (106). Do toho běchu Drježdźany na prěnim městnje. Tam je 88 milionarow.
Chorownja w Gazy wobškodźena
