Opozicija: To je jara njesprawne
Drježdźany (dpa/MkWj). Připowědźene naprawy sakskeho krajneho knježerstwa k zaručenju trěbneje ličby wučerjow a k jich lěpšemu zastaranju su rozdźělne reakcije zbudźili.
Tak rěči frakciski předsyda sobu knježaceje SPD w Sakskim krajnym sejmje Dirk Panter wo zasadnej změnje. „Zapłaćimy našich wučerjow přichodnje lěpje, wukubłujemy tych, kotřiž přińdu z druhich powołanjow do wučerstwa, a mamy srědki, młodych ludźi za wučerske powowanje zdobyć a jich tam zdźeržeć“, rjekny Panter nowinarjam.
Opozicija porno tomu ma dalše kročele za trěbne. Přirunujo z druhimi zwjazkowymi krajemi naprawy njedosahaja dosć wučerjow zdobyć, měni kubłanskopolitiska rěčnica Lěwicy Cornelia Falken. Nimo toho dyrbja zasłužbni starši pedagogojo nětko přihladować, kak nowopřistajeni sta eurow wjace zasłužeja hač woni. „To je jara njesprawne.“
To a tamne (27.10.16)
Na štom předrasćeneho muža je policija w Portlandźe, w zwjazkowym staće USA Maine, nachwilnje zajała, dokelž bě nadróžny wobchad haćił. Do toho bě so z hałzami tarnowany 30lětny spjećował, wjele wužiwane křižowanišćo wopušćić. Po tym zo bě muž kawciju 60 dolarow zapłaćił, smědźeše policajsku stražu wopušćić. Za motiwom prašany wón rjekny, zo bě jenož wćipny, kak ludźo na jeho „předstajenje“ reaguja.
Swojeho pjećlětneho bratra na tankowanišću zabył je 25lětny šofer awta w Delnjej Sakskej. Muž při tankowanju w Elze njepytny, zo bě pachoł z awta wulězł, a jědźeše dale do směra na Hamburg. Tankownik so tuž wo hólca staraše a zawoła policiju. Přez čisłowu taflu awta móžachu mać wobeju zwěsćić a informować. Wona zabyćiweho syna zawoła a pósła jeho wróćo do Elze.
Zwyša minimalnu mzdu
Berlin (dpa/SN). Zakonska minimalna hodźinska mzda w Němskej so klětu wot 8,50 na 8,84 eurow zwyši. To je zwjazkowe knježerstwo dźensa wobzamknyło. Je to prěnje zwyšenje mzdy po wšoněmskim zawjedźenju loni. Zwyšenje wo 34 centow orientuje so na powšitkownym wuwiću mzdow. Zhromadna komisija dźěłodawarjow a dźěłopřijimarjow bě so srjedź lěta za zwyšenje wuprajiła. Knježerstwo chce wobzamknjenje jako prawniski wukaz přesadźić.
Přewinu-li blokowanje Ceta?
Brüssel (dpa/K/SN). Do wjerška EU a Kanady so Belgiska dale wo to prócuje, namakać wupuć z blokowanja wikowanskeho zrěčenja Ceta. Wčerawše jednanja knježerstwa z regionomaj su njewuspěšnje wušli. Předewšěm Waloniska měješe hač do kónca wobmyslenja. „Njekłonimy so žanomu ultimatej“, zwurazni ministerski prezident regiona Paul Magnette. Přiwšěm dźensa naležnje dale wuradźuja. Poprawom měli zrěčenje wo swobodnym wikowanju jutře podpisać.
Pola Eurowings jutře stawkuja
Šulerjo Freyburgskeje sekundarneje šule smědźachu dźensa cyle ...
NATO wuchod dale wobrónja
Nowe strašne formy
Wadźeńca deficita dla
17 500 ludźi bomby dla ewakuowali
Kamjenica (dpa/MkWj). We wusko wobsydlenym Kamjeničanskim měšćanskim dźělu Kaßberg su wčera wječor 250 kilogramow ćežku lětarsku bombu wuspěšnje znješkódnili. Do toho dyrbjachu něhdźe 17 500 wobydlerjow ewakuować, kaž powěsćernja dpa zdźěla. Bě to dotal najwjetša akcija tutoho razu w Kamjenicy. Wokoło namakaneje bomby zarjadowachu šěroke wěstotne pasmo. Busy a nadróžne w potrjechenej kónčinje njejězdźachu. Bydlenja, běrowowe domy, štyri šule a pjeć pěstowarnjow dyrbjachu rumować. Tójšto ludźi dyrbješe we wječornych hodźinach swoje bydlenje wopušćić abo njemóžeše so po swjatoku domoj wróćić. Woni dyrbjachu pola přećelow a znatych abo w přihotowanych sportowych halach na znješkódnjenje bomby čakać. Ewakuowanje njebě bjez problemow, kaž z měšćanskeho zarjadnistwa rěka. Někotři wobydlerjo so spjećowachu swoje bydlenje wopušćić. W jednym padźe bě so muž ze swojim kijom do policistki dał a ju při tym snadnje zranił.
Knježerstwo nima informacije
Prašenja łužiskeje zapósłanče Zelenych k antiserbskim podawkam
Drježdźany (SN/MkWj). Zapósłanča Zelenych w Sakskim krajnym sejmje Franziska Schubert je so z wjacorymi prašenjemi na krajne knježerstwo wobroćiła, kotrež poćahuja so na antiserbske aktiwity w dwurěčnej Łužicy. Tak chcyše wona wědźeć, kotre dopóznaća ma sakske knježerstwo wo aktiwitach tak mjenowaneho Ariskeho bratrowstwa (Aryan Brotherhood) w Sakskej, předewšěm pak w zwisku z antiserbskimi podawkami. Sakske knježerstwo wobkrući, zo je skupina předewšěm w interneće wo wjacorych zarjadowanjach a swjedźenjach rozprawjała a zo běchu jeje čłonojo tež na namócnosćach mjez wukrajnikami a neonacijemi 9. septembra w Budyšinje wobdźěleni. Wo přećiwo Serbam měrjenych podawkach krajnemu knježerstwo informacije njepředleža, kaž z lista nutřkowneho ministra Markusa Ulbiga (CDU) wuchadźa. Wuraznje wón w tym zwisku na to skedźbnja, zo informacije wo tutej skupinje tež z pomocu wustawoškita tajnje zběraja. Tele informacije njejsu zapósłancam krajneho sejma přistupne.
To a tamne (26.10.16)
Hillary Clinton budźe prezidentka USA. Tak znajmjeńša wěšći to pinguin Flocke w Lubnjowskej Sprjewinej kupjeli. Pinguina, kotryž je dotal skerje na polu kopańcy dobyćerjow wěšćił, běchu so zamołwići dwaj tydźenjej do prezidentskich wólbow USA „woprašeli“. Woni połožichu jemu bulej z mjezwočomaj Hillary Clinton a jeje kontrahenta Donalda Trumpa k hrajkanju. Flocke rozsudźi so bjez wahanja za Clinton-bul.
Na policajskej straži dale kradnył je runje lepjeny paduch w sewjerorynsko-westfalskim Güterslohu. Ze swojim přećelom bě so wón do garaže policista zadobył. Tón jeju lepi, jako sej kapsnej lampje do zaka tyknyštaj. Lědma, zo běchu jeju na policajsku stražu dowjezli, jedyn z njeju w njewobkedźbowanym wokomiku dalšu kapsnu lampu spakosći. Nětko ma so 17lětny dwójneho padustwa dla před sudnistwom zamołwić.
