Klětuši etat załožby w naćisku steji
Komisija Załožby za serbski lud je wčera w Choćebuzu přichodne posedźenje załožboweje rady 22. nowembra w Podstupimje přihotowała. Hłowne ćežišćo bě při tym etat za lěto 2017.
Choćebuz (SN/JaW). Naćisk klětušeho hospodarskeho plana Załožby za serbski lud steji. To zdźěli załožbowy direktor Jan Budar na naprašowanje našeho wječornika. „Wudawki kryja so z dochodami a plan wobsahuje tež dojednane přiražki spěchowanym institucijam“, tak Budar. Wo móžnych změnach w financnym połoženju wón ničo njepraji, skedźbnjejo na to, zo móže so w diskusiji na załožbowej radźe stajnje hišće něšto změnić, wšako jedna so wo naćisk. Hakle hdyž je załožbowa rada etat wobzamknyła, je wón tež płaćiwy.
DNA terorista namakana
Bayreuth (dpa/K/SN). Dźělčki DNA, kotrež buchu na městnje wuslědźene, hdźež běchu ćěłko zamordowaneje Peggy nadešli, dyrbja so prawdźepodobnje teroristej z NSU Uwej Böhnhardtej přidźělić. To rjekny wyši statny rěčnik Harald Potzel wčera wječor w Bayreuće. Po informacijach časopisa Spiegel jedna so při tym wo kónčk płatu. Rozhłosowy sćelak BR rozprawja, zo ma wón wulkosć nochća.
Dźe wo financne poćahi
Berlin (dpa/K/SN). Na přichodne financne poćahi mjez zwjazkom a krajemi hlada porynsko-pfalcska ministerska prezidentka Malu Dreyer optimistisce. „W zasadźe smy so hižo dojednali“, wona zwurazni. Tele financne poćahi dyrbja so znowa zrjadować, dokelž skónčitej 2019 financne wurunanje mjez krajemi kaž tež solidarny pakt. Dźensa su poslednje wuradźowanja wo tym. Po internych informacijach je so zwjazkowa kanclerka Angela Merkel (CDU) z ministerskimi prezidentami krajow minjenu nóc na kompromis dojednała.
Merkel namołwjena
Z wulkej poraženosću a zrudobu su ludźo w Thailandskej na poswěsć ...
Tilich zmylki w zwisku ze suicidom přiznał
Łužiski kruh w Brüsselu
Rěčne myto tež w Braniborskej?
Kalawa (SN/at). Nowa braniborska kulturna statna sekretarka a knježerstwowa społnomócnjena za naležnosće Serbow Ulrike Gutheil budźe so přichodne měsacy předewšěm wo rozsudy k serbskemu sydlenskemu rumej starać. Wotpowědne próstwy ma ministerstwo za wědomosć, slědźenje a kulturu na zakładźe Serbskeho zakonja dokładnje pruwować. Tole zdźěla ministerstwa po zetkanju Gutheil ze społnomócnjenymi za serbske naležnosće wokrjesow Dubja-Błóta, Hornje Błóta-Łužica, Sprjewja-Nysa a města Choćebuza wčera w Kalawje.
Serbski społnomócnjeny wokrjesa Dubja-Błóta Dieter Freihoff ma rozmołwu za přewšo wotewrjenu. „Dźěše wo to, so mjezsobnje zeznajomić. Nastupajo serbski sydlenski rum běchu jej naše nazhonjenja jara wažne“, rjekny Freihoff, „runje tak smy jej swoje starosće a nuzy z widom na předwidźane přerjadowanje braniborskich wokrjesow zwuraznili.“
To a tamne (14.10.16)
Dary domchowanki z wołtarja pokradnył je njeznaty w katolskej měšćanskej cyrkwi w delnjofrankskim Hammelburgu. Pomocnikam bě při wottwarje dekoracije nadpadnyło, zo tójšto žiwidłow pobrachuje, kaž policija zdźěli. Natočenja widejokamery pokazuja, kak něhdźe 65lětny muž kofej, słódkosće a zela z wołtarja bjerje – a so po tym pokřižuje. Policija nětko za paduchom pyta.
Při hribypytanju zabłudźiłoj stej so žonje w starobje 43 a 62 lět w Durinskej. Kaž policija zdźěli, běštej wonej w Altenburgskim kraju do lěsa šłoj. Jako po wjace hač šěsć hodźinach puć domoj njenamakaštej, zawołaštej policiju. Policajske psy zabłudźenej žonje skónčnje namakachu. Zastojnicy jeju z lěsa přewodźachu.
Zelenu swěcu za Ceta
Berlin (dpa/SN). Zwjazkowy hospodarski minister Sigmar Gabriel (SPD) je zelenu swěcu zwjazkoweho wustawoweho sudnistwa dźensa w Karlsruhe nastupajo wikowanskeho zrěčenje Ceta witał. „Wěrju, zo smy z dobrymi argumentami wustawowe sudnistwo přeswědčili“, wón w Berlinje wozjewi. Dowolnosć a z tym zwisowace žadanja sudnistwa chce zwjazkowe knježerstwo spjelnić. Gabriel je so za zrěčenje Ceta mjez Europskej uniju a Kanadu zasadźił. Přichodnje chcedźa wuměnjenja sudnistwa na Europskej runinje diskutować.
Za raketu bomby
Al-Hudaida (dpa/K/SN). Na to reagujo, zo su so huthiscy rebelojo z jemenskeho teritorija z raketu na amerisku wójnsku łódź na Čerwjenym morju měrili, su lětadła USA w Jemenje objekty na teritoriju bombardowali, kontrolowane wot zběžkarjow. Wona raketa rebelow wšak ničak (Zerstörer) USS Mason njebě trjechiła a tuž nikoho njezraniła a tež hewak žaneježkuli škody njenačiniła.
Wuwoz wjaznył
Dźesaćitysacy Kolumbiančanow su za zwoprawdźenje měroweho ...
Pawšalnu kritiku wotpokazuje
Drježdźany (dpa/SN). Po sebjemordarstwu podhladneho terora Dschabera al-Bakra w Lipsćanskim jastwje je sakski justicny minister Sebastian Gemkow (CDU) wumjetowanja wotpokazał, po kotrychž móhło so tomu zadźěwać. Po tuchwilnym přepytowanskim stawje je so wšitko činiło, zo njeby so tole stało, rjekny politikar dźensa w Drježdźanach. Za wotstup ze zastojnstwa tuchwilu přičiny njeje. Přiwšěm wón přizna, zo njebě so tole stać směło. Al-Bakr je so ze swojej košlu na lěsycach pójsnył. Ćěło Syričana chcedźa dźensa hišće přepytować. Spočatnje bu podhladny wšitke 15 mjeńšin kontrolowany. Fachowcy pak so wčera popołdnju na interwall 30 mjeńšin dojednachu. Čas pak dosahaše so sam morić.
Sakski ministerski prezident Stanisław Tilich (CDU) je saksku justicu mjeztym zakitował. „Pawšalna kritika bjez toho zo su pozadki jasne, raznje wotpokazuju“, wón dźensa zdźěli. Nětko je dokładna analyza trěbna, zo móhli prawe rozsudy tworić. Dale zakitowaše wón sakskeho justicneho ministra a wupraji jemu swoju dowěru.
