Slepo (JoS/SN). Jutrownu wosebitu wustajeńcu „Jejka swěta – Swět jejkow“ su minjeny pjatk w Slepjanskim Serbskim kulturnym centrumje (SKC) wotewrěli. Widźeć je něhdźe 600 jejow z 45 krajow. Znosył a zestajił bě přehladku 68lětny Erhard Schwerin z Lipska. Wón bě wjele lět konserwator w Lipšćanskim Grassijowym muzeju, hdźež je zběrka debjenych jejkow jeho zahoritosć zbudźiła. Dźensa je něhdźe 3 000 jejkow z 50 krajow w jeho wobsydstwje.

Budyšin (SN/bš). Aktualne powěsće njeposrědkuja jenož „tradicionalne“ kanale kaž nowiny, radijo abo telewizija, ale dźensniši čas tež socialne medije. Wosebje wójnu na Ukrainje nastupajo hodźa so informacije wo podawkach we woprawdźitym času sćěhować. Jednu móžnosć wozjewjenja skići swětoznata internetna platforma Twitter.

Ukrainski prezident Wolodymyr Zelenskyj bě sej w aprylu 2019 na Twitteru oficialny přistup zarjadował, někotre měsacy do swojeho wólbneho dobyća jako prezident. Jeho sćěhuja hač do dźensnišeho něhdźe 4,4 miliony wužiwarjow. Wot spočatka wójny pisa Zelenskyj wo aktualnym połoženju runje tak wo rozmołwach ze statnymi nawodami. To čini wón w ukrainšćinje a jendźelšćinje. Tak tematizowaše na přikład 1. měrca w telefonaće z němskim kanclerom Olafom Scholzom wobtřělenje ukrainskich by­dlen­skich štwórćow přez ruske wójsko – w samsnym času měrowych jednanjow mjez Ukrainu a Ruskej. Mjez druhim skedźbni tež na nuznosć přistupa Ukrainy k Europskej uniji. Kancler Scholz na to w syći reago­waše, wuprajejo Ukrainjanam sobu­čuće a solidaritu Němskeje.

Dźensa před 125 lětami narodźi so we Wojerecach syn železnicarja, pozdźišo krawski mišter, mějićel wobchoda za narodnu drastu, braška, ludowy wuměłc a aktiwny Domowinski funkcionar Jan Wjacsławk. Wón nawukny powołanje krawca a wotewrě 1926 na Złokomorowskej w ródnym měsće wosebity wobchod a krawcownju za serbsku narodnu drastu. Po jeho smjerći 9. awgusta 1963 je jeho dźowka Hana Bejmina wobchod přewzała. Jan Wjacsławk bě wuběrny znajer wosebje Wojerowskeje drasty, poradźowaše jeje nošerki, zhotowješe a předawaše jim drastu a wušiwanki, kotrež zdźěla sam zhotowi. Njebě jenož wušiwar, ale tež wuběrny debjer jutrownych jejkow. Na mnohich wustajeńcach je jejka prezentował a z nimi na wubědźowanjach prěnje myta dobył. Za čas NDR bě poradźowar a hłowny akter dokumentarneju filmow „Hdyž Jank a Hanka kwasujetaj“ a „Přa­slica a póstniski kwěćel“. 38 lět bě woblubowany ewangelski braška. Do lěta 1937 bě předsyda Serbskeho burskeho towarstwa Wojerecy a po 1945 Domowinskeje skupiny Wojerecy-Stare město. W lěće 1935 je posledni Domowinski zjězd do zakaza přez nacijow sobu organizował. Manfred Laduš

Před 75 lětami bu Swobodny stat Pruska přez zakoń čisło 46 Aliěrowaneje kontrolneje rady rozpušćeny. Zastupnicy štyrjoch dobyćerskich wulkomocow Druheje swětoweje wójny podpisachu zakoń, z kotrymž skónči so wažna etapa powójnskich stawiznow Němskeje po ka­pitulaciji 8. meje 1945.

Jako wopodstatnjenje zakonja rěkaše w preambli: „Pruski stat bě wot dawna stajnje hižo nošer militarizma a reakcije w Němskej. Wotpowědnje zajimam za zachowanje měra a wěstoty mjez ludami a přeću, noworjadowane politiske za­kłady zawěsćić, so pruski stat jako knježerstwo, kaž tež wšitke jemu podrjadowane zarjady a institucije rozpušća.“