Roberto Lombino je 24 lět a pochadźa z Prahi. Tučasnje studuje Čech z italskimi korjenjemi polonistiku ze specializaciju na nowinarstwo a zjawnostne dźěło w Poznanju. Do toho přebywaše dwaj semestraj we wobłuku stipendija Załožby za serbski lud na Instituće za sorabistiku Lipšćanskeje uniwersity. Rozsud za studij w Lipsku wobkrući wón z wulkim zajimom za cuze rěče, wosebje za słowjanske a rěče narodnych mjeńšin. Hornjo- a delnjoserbšćinu bě sej hižo we wulkej měrje do studija přiswojił – a to hłownje přez radijo, kotrež wot lěta 2007 hač do dźens­nišeho prawidłownje słucha.

Budyšin (SN/bn). Załožba za serbski lud je lětsa prěni raz wubědźowanje „Rěč wjaza – Rěc zwězujo – Sorbisch verbindet“ wupisała. Zaměr wurisanja je „pytać za inowatiwnymi a naslědnymi idejemi, z kotrymiž hodźała so serbšćina we wšědnym dnju lěpje zakótwić, zo by so serbska zhromadnosć zesylniła a iden­tita skrućiła“. Dohromady 66 namjetow bu zapodatych. Wěcywustojna jury, pa­ritetisce zestajana z čłonow z Hornjeje, Delnjeje a srjedźneje Łužicy, je 24 z nich jako mytowanjahódnych wuzwoliła, při čimž měješe „na to dźiwać, cyłu Łužicu na wuwažene wašnje wobkedźbować“, kaž direktor załožby Jan Budar na minjeny pjatk digitalnje wuhotowanym spožčenju wuznamjenjenjow podšmórny.

Kulturny konwent Hornja Łužica-Delnja Šleska je so minjeny pjatk znowa w Budyskim Kamjentnym domje schadźował. Mjez druhim su tam spěchowanje za klětuše projekty kaž tež inwesticije wobzamknyli.

Budyšin (SN/CoR). Přepruwowanje hospodarjenja zaměroweho zwjazka kulturny rum Hornja Łužica-Delnja Šleska za lěto 2020 je z dobrym wuslědkom zakónčene. Tak zwěsći zličbowanski zarjad Budyskeho wokrjesa nadbytk dohromady 620 000 eurow. „Mějachmy wjace připokazankow ze stron kraja, hač smy wočakowali. A dokelž njejsu so korony dla wšitke projekty zwoprawdźili, su tuž spěchowanske srědki zbyli“, rozłoži komornica kulturneho ruma Anja Kramer. Suma wuruna tak na poslednim posedźenju zwěsćeny deficit w etaće lěta 2022.

Annamaria Hadankec z Berlina/Kopšina je najwuspěšniša wobdźělnica lětušeho literarneho wubědźowanja Ludoweho nakładnistwa Domowina a Załožby za serbski lud.

Budyšin (SN/at). To je zawěsće tež jurorki a jurorow literarneho wubědźowanja překwapiło: Annamaria Hadankec bě we wšěch třoch kategorijach najwuspěšniša, dwójce z prěnim a jónu z druhim mytom. W kategoriji „basnje a mała proza“ (A) spožči jej jury 1. myto za basnje „Powjaz“, „Naši mužojo!“, „Za tebje“, „Pizza“, „Žedźba“ a „Raj“, runje tak w kategoriji dlěša proza, dramatika (C) za powědančce „Rabies – płaćizna wědy“ a „Čeji lěs?“. W kategoriji „krótka proza“ (B) bě powědančko „Spytowanje“ Annamarije Hadankec 2. myto hódne.