Sobu jedne z najwjetšich jutrownych wikow Hornjeje Łužicy wotměwaja so kóžde lěto we Wojerowskej Łužiskej hali. Tam bě sobotu a wčera widźeć, zo zajim za serbske jutrowne jejka po wšěm zdaću přiběra.

Wojerecy (JoS/SN). Štóž je so kónc tydźenja na 23. jutrownych wikach we Wojerecach rozhladował, móžeše zwěsćić, zo so młodźi ludźo přiběrajcy za debjenje jutrownych jejkow zajimuja. „Wjele motiwow swójby přez generacije dale dawaja“, rjekny kulturny měšćanosta Thomas Delling w swojej zahajenskej narěči.

Wjac hač 1 000 młodych dźiwadźelnikow je dźensa we wjace hač 40 inscenacijach na 16 jewišćach sprjewineho města Budyšina na 18. swětowym dnju šulerskeho dźiwadła swój talent poakzało. Němsko-Serbske ludowe dźiwadło přewjeduje wosebite zarjadowanje hižo wot lěta 2000. Prěni raz wobdźěli so na dnju šulerskeho dźiwadła tež skupina dźěći z Wojerec. Wone předstajichu w Budyskim Serbskim domje znatu bajku „Čerwjenawka“. Foto: SN/Maćij Bulank

Po štyrjoch dnjach wčera zakónčene Lipšćanske knižne wiki su z 285 000 znowa wjace wopytowarjow přiwabili. Loni bě jich 260 000. Na terenje wikow zličichu lětsa 208 000 hosći, zbytk je literarny swjedźeń „Lipsk čita“ přinošował.

Lipsk (SN/CoR). Tež bilanca Ludoweho nakładnistwa Domowina je pozitiwna. „Ludźo su so zajimowali, a smy tež knihi předawali. Wosebje požadane běchu nowostka wo reformaciji a zwjazkaj z historiskimi fotografijemi kaž tež znowa wuhotowany 5. nakład knihi ‚Kurze Geschichte der Sorben‘“, rozprawja wotrjadnica rozšěrjenja LND Manja Bujnowska.

Na předstajenju knihi „Sorben im Blick der Staatssicherheit“ dr. Tima Meškanka pjatk witaše zajimcow Tobias Hollitzer z Lipšćanskeho wobydlerskeho komiteja. W rozmołwje z awtorom je sakski krajny społnomócnjeny za podłožki stasi bywšeje NDR Lutz Rathenow wosebitu situaciju Serbow mjez statnym spěchowanjom na jednej a sylnym wobkedźbowanjom wšitkich kulturnych aktiwitow na tamnej stronje wobswětlić spytał.

Budyšin (SN/CoR). Z kompozicijemi „Hommage à Albinus Mollerus“ I a II kaž tež „Knježe, smil so nad nami“ Jana Pawoła Nagela su so hudźbnicy komorneho orchestra SLA wčera wo prawu duchownu atmosferu na wotewrjenju wustajeńcy „Pjeć lětstotkow – Serbja a reformacija“ w Budyskim Serbskim muzeju starali. Na połnej žurli móžeše muzejowa direktorka Christina Boguszowa mjez něhdźe 80 hosćimi tež generalneho superintendenta Martina Herchu, serbskeho superintendenta Jana Malinka, zapósłanca Sakskeho krajneho sejma Marka Šimana (CDU), kulturneho sekretara kulturneho ruma Hornja Łužica-Delnja Šleska Joachima Mühlu, direktora Załožby za serbski lud Jana Budarja kaž tež jednaćelku LND Marku Maćijowu witać. „Začuwam tule hodźinu jako jara wosebitu. Serbski muzej je z wulkim respektom wulkemu wužadanju wotpowědował, reformacisku wustajeńcu wuhotować“, rjekny Boguszowa a dźakowaše so mnohim wupožčowarjam za podpěru kaž tež kulturnemu rumej za přewzaće do zwjazkoweho spěchowanskeho programa.